មន្រ្តីនៃការិយាល័យបចេ្ចកទេសនិងផែនការស្ថិតិរបស់ក្រសួងកសិកម្ម រុក្ខាប្រម៉ាញ់និងនេសាទ សុំមិនបញ្ចេញឈ្មោះបានមានប្រសាសន៍ប្រាប់វិទ្យុអាស៊ីសេរីថា ៖ «សម្រាប់ស្រូវរដូវវស្សាយើងគ្រាន់តែគ្រោងទុកជាបណ្ដោះអាសន្ន២លាន(ហិកតារ)ជាង។ សង្ឃឹមថាបាន៦លានតោនជាង ថាប្រហាក់ប្រហែលនឹង៧លានតោន»។
លោកស្រីបន្ថែមទៀតថា ស្របពេលនេះដែរក្រសួងកសិកម្មមានផែនការឲ្យកសិករខែ្មរធ្វើស្រូវរដូវប្រាំងនៅក្រោយរដូវវស្សាខាងមុខនេះចំនួនជាង៣ម៉ឺនហិកតារ។
លោក ឡឹង ម៉ៅ ជាប្រជាពលរដ្ឋខែ្មររស់នៅក្នុងភូមិស្វាយព្រៃ ឃុំសណ្តែក ស្រុកបាធាយ ខេត្តកំពង់ចាម បានថែ្លងថា កសិករអាចផលិតស្រូវបានតាមផែនការទៅបានលុះត្រាតែជីមានតម្លៃថោកនិងមានប្រព័ន្ធធារាសាស្រ្តល្អដោយមិនពឹងផ្អែកតែលើទឹកភ្លៀងទាំងស្រុង។
លោក ឡឹង ម៉ៅ បានឲ្យដឹងថា ៖ «កសិករវាពិបាកនូវការភ្លៀងធ្លាក់មិនដិតដល់ ហើយនៅជីហ្នឹងតម្លៃខ្ពស់ អ៊ីចឹងហើយប្រជាកសិករហ្នឹងគាត់ខ្វះខាតនូវជីហ្នឹង មិនអាចបាចគ្រប់គ្រាន់ អ៊ីចឹងហើយស្រូវអត់មានផលគ្រប់គ្រាន់ បានកើនផល។ បញ្ហាស្រូវពូជ កសិករនៅស្រុកខ្ញុំនេះធ្វើអត់មានសូវសុទ្ធល្អទេ»។
បើទោះបីជាក្រុមមន្ត្រីមានផែនការក្នុងការជំរុញកសិកម្ម ប៉ុន្តែកសិករខ្លះទៀតដូចជានៅខេត្តកំពងចាមនិងខេត្តព្រៃវែងជាដើមបានត្អូញតែ្អរថា ផលស្រូវរបស់ពួកគាត់កាលពីឆ្នាំ២០០៨ទៅនោះទទួលផលមិនគ្រប់គ្រាន់សម្រាប់បរិភោគទេសម្រាប់ឆ្នាំ២០០៩នេះទេ ដោយសារតែគ្រោះរាំងស្ងួតអូសបន្លាយយូរពេកកាលពីឆ្នាំ២០០៨កន្លងទៅនោះ។
កាលពីខែមីនាកន្លងទៅនេះ មន្រ្តីជំនាញនៃក្រសួងកសិកម្ម រុក្ខាប្រម៉ាញ់និងនេសាទ បានបញ្ជាក់ថា បរិមាណស្រូវជាផ្លូវការដែលបានប្រមូលផលនៅក្នុងឆ្នាំ២០០៨កន្លងទៅមានចំនួន៥លាន៧សែនតោននៃទិន្នផលស្រូវរដូវវស្សាបូកជាមួយទិន្នផលស្រូវរដូវប្រាំងចំនួន១លាន៤សែនតោនទៀតបានញ៉ាំងឲ្យប្រទេសកម្ពុជាសល់ស្រូវចំនួនជាង២លានតោនសម្រាប់ឆ្នាំ២០០៩នេះ។
សូមជម្រាបជូនថា ការនាំស្រូវទៅលក់នៅក្រៅប្រទេសនាពេលបច្ចុប្បន្នគឺនាំទៅប្រទេសវៀតណាមនិងថៃប៉ុណ្ណោះ។
កសិករខ្មែរជាច្រើននាក់បានអះអាងថា បើទោះបីជាទីផ្សារស្រូវពិភពលោកចេះតែឡើងថ្លៃក៏ដោយ ប៉ុន្តែស្រូវរបស់កសិករខ្មែរនៅតែលក់បានតម្លៃថោក មិនរួចថ្លៃផលិតឡើយ ដោយសារប្រេងសាំងនិងជីមានតម្លៃថ្លៃ ហើយមកដល់ពេលនេះដែរគេមិនទាន់ឃើញស្ថាប័នណាមួយជួយកសិករក្នុងការរកទីផ្សារស្រូវឲ្យបានតម្លៃខ្ពស់នៅឡើយទេ៕