លោក សន ជ័យ ស្ថាបនិកវិទ្យាស្ថានខ្មែរសម្រាប់អភិវឌ្ឍន៍ជាតិ បានចាត់ទុកការសម្រេចរបស់លោកនាយករដ្ឋមន្ត្រី ហ៊ុន សែន ក្នុងការលើកយកសេចក្តីព្រាងច្បាប់ស្តីពីការប្រឆាំងនឹងអំពើពុករលួយឆ្លងគណៈរដ្ឋមន្ត្រីនាពេលនេះ ថាជាការវិវត្តន៍មួយជំហានទៀតនៃច្បាប់ប្រឆាំងអំពើពុករលួយដែលរាំងស្ទះរាប់ឆ្នាំមកហើយ។
លោក សន ជ័យ បានបញ្ជាក់ថា ៖ «យើងសង្ឃឹមថា អនុសាសន៍ទាំងឡាយរបស់សង្គមស៊ីវិលកន្លងមកនឹងត្រូវបានដាក់បញ្ចូលទៅក្នុងសេចក្ដីព្រាងច្បាប់ ហើយសង្ឃឹមថា ច្បាប់ហ្នឹងនឹងត្រូវបានអនុម័តក្នុងពេលឆាប់ៗ»។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ ក៏បានសាទរទៅនឹងសេចក្តីសម្រេចរបស់ប្រមុខដឹកនាំរដ្ឋាភិបាលខ្មែរក្នុងលើកយកច្បាប់ប្រឆាំងអំពើពុករលួយឆ្លងគណៈរដ្ឋមន្ត្រីពេលនេះ បើទោះបីជាច្បាប់នេះនៅពេលអនុម័តរួចការអនុវត្តមានប្រសិទ្ធភាពឬមិនមានប្រសិទ្ធភាពបែបណាក៏ដោយនោះ។
លោក រ៉ុង ឈុន បានមានប្រសាសន៍ថា ៖ «ច្បាប់ប្រឆាំងអំពើពុករលួយជាង១០ឆ្នាំហើយនៅតែចេញមិនរួច។ អ្វីដែលយើងចង់បាន យើងចង់ឲ្យចេញឲ្យបានឆាប់ ទោះបីថា ដំណើរការអនុវត្តច្បាប់នោះយ៉ាងណាក៏ដោយ!»។
លោក យឹម សុវណ្ណ មន្ត្រីអ្នកនាំពាក្យគណបក្សសមរង្ស៊ីនិងជាតំណាងរាស្ត្រផងនោះ មានប្រសាសន៍ថា ក្នុងនាមតំណាងរាស្ត្រមួយរូប លោកនឹងតាមដានខ្លឹមសារនៃសេចក្តីព្រាងច្បាប់នេះជាបន្តទៀត។
របាយការណ៍របស់អង្គការតម្លាភាពអន្តរជាតិថ្មីៗនេះបានវាយតម្លៃថា អំពើពុករលួយនៅប្រទេសកម្ពុជាមានលក្ខណៈប្រសើរជាងឆ្នាំមុនបន្តិច ប៉ុន្តែអំពើពុករលួយនៃប្រទេសនេះនៅតែស្ថិតនៅលេខរៀងប៊ិះជួរក្រោយគេដដែលក្នុងចំណោមប្រទេសពុករលួយខ្លាំងក្លា។
ក្នុងចំណោមប្រទេស១៨០ប្រទេសដែលគេវាយតម្លៃនោះ ប្រទេសកម្ពុជា ប្រទេសលាវ ប្រទេសតាហ្សីគីស្ថាននិងសាធារណៈរដ្ឋអាហ្រ្វិកកណ្តាល សុទ្ធតែជាប្រទេសដែលជាប់លេខរៀងនៃអំពើពុករលួយទី១៥៨។ ដោយឡែកប្រទេសកម្ពុជាបានគ្រាន់ប្រើជាងគេតែមួយប្រទេសប៉ុណ្ណោះនៃប្រទេសអាស៊ី គឺប្រទេសភូមាដែលជាប់លេខរៀងដល់ទៅទី១៧៨។
គួរជម្រាបជូនថា សេចក្តីព្រាងច្បាប់ប្រឆាំងនឹងអំពើពុករលួយត្រូវបានគេលើកឡើងតាំងពីឆ្នាំ១៩៩៤។
ក្រុមមន្ត្រីបក្សប្រឆាំង អង្គការសង្គមស៊ីវិលនិងម្ចាស់ជំនួយ ដែលធ្លាប់តែទទូចច្រើនដងឲ្យរដ្ឋាភិបាលធ្វើរឿងនេះ កំពុងរង់ចាំមើលច្បាប់នេះដោយអន្ទះសា៕