សួន សេរីរដ្ឋា ឆ្លើយតបនឹងការចោទរបស់រដ្ឋាភិបាលទៅលើបក្សប្រឆាំង

ដោយ ហាស់ សាន

2008-06-23

ទាក់ទងនឹងការលើកឡើងជាថ្មីរបស់លោកនាយករដ្ឋមន្រ្តី ហ៊ុន សែន ដែលថា គណបក្សសមរង្ស៊ី ជាប់ជំពាក់នឹងការវាយប្រហារបាញ់រ៉ុកែ្កត ប៉ុនប៉ងធ្វើឃាតរូបលោក ក្នុងក្បួនរថយន្តធ្វើដំណើរទៅខេត្តសៀមរាប កាលពីឆ្នាំ១៩៩៨ ហើយទាមទារ កាលពីប៉ុន្មានថ្ងៃមុន ឲ្យតុលាការស៊ើបអំពើឩក្រិដ្ឋនោះជាថ្មី នៅមុនថ្ងៃបោះឆ្នោតខាងមុខនេះ មានពលរដ្ឋខ្មែរខ្លះ យល់ដឹងថា ជាការប៉ុនប៉ងបំបែកគណបក្សប្រឆាំង ដឹកនាំដោយលោក សម រង្ស៊ី ។

ថ្មីៗនេះ រដ្ឋាភិបាល បានយកបុរសម្នាក់ ឈ្មោះ ឡឹក ប៊ុនញាណ ឲ្យបកស្រាយហេតុការណ៍នោះ ដោយទម្លាក់កំហុសលើលោក សម រង្ស៊ី ។ តើ ឡឹក ប៊ុនញាណ ចេញពីប្រភពណា ?

នៅថ្ងៃអាទិត្យ ២២ មិថុនា គណៈកម្មាធិការប្រព្រឹត្តកម្មខ្មែរ ដើម្បីយុត្តិធម៌និងសមធម៌នៅរដ្ឋរ៉ូដអាយឡិន សហរដ្ឋអាមេរិក បានធ្វើសេចក្តីថ្លែងការណ៍មួយ បកស្រាយរឿងរ៉ាវខ្លះ ដែលសាធារណជនភាគច្រើនមិនបានដឹងទាល់តែសោះ ។

លោក ហាស់ សាន បានសួរលោក សួន សេរីរដ្ឋា នាយបេសកកម្មនៃអង្គការនេះតាមទូរស័ព្ទ ដែលមានខ្លឹមសារដូចខាងក្រោម ៖
ហាស់ សាន ៖ នៅថ្ងៃអាទិត្យ ទី២២ មិថុនានេះ អង្គការរបស់លោក គឺ គណៈកម្មាធិការប្រព្រឹត្តិកម្មខ្មែរដើម្បីយុត្តិធម៌និងសមធម៌ បានចេញសេចក្ដីថ្លែងការណ៍ដាក់ចំណងជើងថា សេចក្ដីថ្លែងការណ៍ពិសេសមួយ ហាក់ដូចជាឆ្លើយតបទៅនឹងអ្វីដែលកំពុងកើតមាននៅក្នុងប្រទេសកម្ពុជា ហើយខ្លឹមសារនៃសេចក្ដីថ្លែងការណ៍នោះ ហាក់ដូចជាពណ៌នាអំពីសកម្មភាពនយោបាយខ្លះៗ ទាក់ទិននឹងគណបក្សប្រជាជនកម្ពុជា ដែលកំពុងកាន់អំណាចនិងគណបក្សសមរង្ស៊ី ដែលថា មានការប៉ុនប៉ងធ្វើឃាតលោកនាយករដ្ឋមន្ត្រី ហ៊ុន សែន និងការចោទប្រកាន់ថា គណបក្សប្រឆាំងជាអ្នកបង្កើតចលនា CFF ជាអ្នកបង្កើតចលនាមហានគរ ហើយនិងរបាយការណ៍មួយនៅក្នុងកាសែតបារាំង ឈ្មោះថា Cambodge Soir នៅថ្ងៃ១៨ ខែមិថុនានេះថា ឃាតកម្មលើលោក ជា វិជ្ជា គឺគណបក្សសមរង្ស៊ី ជាអ្នកប្រព្រឹត្តផ្ទាល់ថែមទៀតផង ហើយលោកហាក់ដូចជាបានបកស្រាយបញ្ច្រាសអំពីរឿងហ្នឹងផង ។ ខ្ញុំសូមលោកបរិយាយថាតើរឿងពិតនៅត្រង់ណា ហើយលោកសំអាងលើអ្វី ?

សួន សេរីរដ្ឋា ៖ «នៅក្នុងគណៈកម្មាធិការប្រព្រឹត្តិកម្មខ្មែរដើម្បីយុត្តិធម៌និងសមធម៌ គឺយើងបានចេញសេចក្ដីថ្លែងការណ៍ដើម្បីគូសបញ្ជាក់អំពីចំណុចសំខាន់ៗ ដែលរដ្ឋាភិបាលក្រុងភ្នំពេញកំពុងកាន់អំណាចចោទប្រកាន់ទៅលើក្រុមគណបក្សប្រឆាំង គឺគណបក្សលោក សម រង្ស៊ី យើងសង្កេតឃើញថា បីចំណុចសំខាន់ដែលគេចោទហ្នឹង គឺជាចំណុចមិនពិតប្រាកដ ។ លោក ឈុន យ៉ាសិទ្ធិ ដែលអន្តរជាតិស្គាល់ថា ជាក្រុម CFF នោះ បានឆ្លើយតបនៅតុលាការក្នុងក្រុង Los Angeles ថា ចលនានេះអត់មានទាក់ទងទៅនឹងក្រុមណាទេ ឬបុគ្គលណាទេ គឺខ្លួនគាត់តែម្នាក់ឯងគត់ ជាអ្នកទទួលខុសត្រូវ ។ ដូច្នេះ ការដែល ឡឹក ប៊ុនញាណ បង្កើតឡើងនូវបញ្ជីឈ្មោះ CFF រួចហើយទៅចុះចូលជាមួយរដ្ឋាភិបាល ចោទប្រកាន់ទៅក្រុមគណបក្សសមរង្ស៊ី យើងបានធ្វើការអង្កេតឃើញថា ឡឹក ប៊ុនញាណ បន្ទាប់ពីត្រូវបានអង្គការសហប្រជាជាតិ ទទួលបន្ទុកជនភៀសខ្លួននៅប្រទេសថៃ ទម្លាក់សិទ្ធិមិនឲ្យឋានៈជាជនភៀសខ្លួន គឺបានដើរទាក់ទងជាមួយប្រជាពលរដ្ឋដែលកំពុងសុំសិទ្ធិជ្រកកោននៅប្រទេសថៃទាំងអស់ឲ្យចូលរួមជាមួយខ្លួន ស៊ីញ៉េ ផ្ដិតមេដៃ ដាក់ឈ្មោះ ដាក់អាសយដ្ឋាន រួចហើយបានបោកប្រាសថា យកឈ្មោះហ្នឹង យកទៅសុំអង្គការជំនួយមនុស្សធម៌មកជួយប្រជាពលរដ្ឋខ្មែរដែលកំពុងស្នាក់នៅក្នុងប្រទេសថៃ សុំសិទ្ធិជ្រកកោន ប៉ុន្តែតាមពិត ឈ្មោះនេះ [ឡឹក ប៊ុនញាណ] បានចូលបម្រើនៅក្នុងឋានៈជាបេសកជនពិសេសនៃក្រុមចារកម្មរបស់រដ្ឋាភិបាលក្រុងភ្នំពេញ នៅក្នុងចលនាក្រុមអ្នកដែលសុំសិទ្ធិជ្រកកោននៅប្រទេសថៃ គឺគេបានយកហត្ថលេខា ឈ្មោះ និងស្នាមមេដៃនៃជនរងគ្រោះដែលមិនមែនជាសមាជិករបស់ CFF ទេ ហើយមួយទៀតទាក់ទងនឹងចលនាខ្មែរមហានគរ យើងបានរកឃើញថា ចលនានេះ ត្រូវបានចាប់បដិសន្ធិឡើង ក្នុងរយៈកាលដ៏ខ្លី ហើយចំណាត់ការរបស់រដ្ឋាភិបាលក្រុងភ្នំពេញ ក៏ខ្លីដែរ ។ ការពិត គឺ ច័ន្ទ ដារាវាសនា ដែលជាប្រធានចលនានេះ គឺជាក្មួយប្រសារបស់លោក សាយ ឈុំ ជាអគ្គលេខាធិការគណបក្សប្រជាជនកម្ពុជា ហើយមានឋានៈជាតំណាងរាស្ត្រនៅមណ្ឌលកំពង់ស្ពឺ» ។

មន្ត្រីរដ្ឋាភិបាលនិងគណបក្សប្រជាជនកម្ពុជា មិនទាន់បង្ហាញប្រតិកម្មអ្វីនៅឡើយទេ ចំពោះសេចក្តីថ្លែងការណ៍ ដែលចោទមន្រ្តីកាន់អំណាចថា បានច្នៃប្រឌិតរឿងដើម្បីកម្ទេចគណបក្សប្រឆាំង ៕

បោះពុម្ព អ៊ីម៉េល