លោក ផៃ ស៊ីផាន បានឲ្យដឹងដូច្នេះថា ៖ «យើងអត់មានបំពេញចិត្តអ្នកអត់មានសមត្ថភាព ហ្នឹងអាចជាការរំលោភដល់អ្វីដែលជាសុវត្ថិភាព និងប្រសិទ្ធភាពការងាររបស់វិស័យសុខាភិបាល ជាវេជ្ជបណ្ឌិត»។
ការប្រកាសជាថ្មីយ៉ាងដូច្នេះ បានធ្វើឡើងក្រោយពីនិស្សិតប្រហែល៥០០នាក់ ក្នុងចំណោមនិស្សិតដែលប្រឡងធ្លាក់ជាង១.០០០នាក់ បានប្រកាសតវ៉ាប្រឆាំង ដោយចោទថា ការប្រឡងនោះមានភាពមិនប្រក្រតី ពោលគឺមានការទាក់ទងទៅនឹងអំពើពុករលួយ ស៊ីសំណូកសូកប៉ាន់នៅក្នុងវិស័យនេះ។
ម្នាក់ក្នុងចំណោមនិស្សិតដែលធ្វើការតវ៉ា កញ្ញា ម៉ូលីនិក បានរៀបរាប់អំពីភាពមិនប្រក្រតីនៅក្នុងការប្រឡង ដែលរៀបចំដោយសាកលវិទ្យាល័យវិទ្យាសាស្ត្រសុខាភិបាល ហើយដែលកញ្ញាអះអាងថា កញ្ញាមិនអាចទទួលយកបាន។
កញ្ញា ម៉ូលីនិក បានអះអាងដូច្នេះថា ៖ «ថ្ងៃបិទក្រដាសលទ្ធផលប្រឡង បិទនៅម៉ោង៩យប់ អ៊ីចឹងពួកខ្ញុំអត់យល់ថា ហេតុអីប្រឡងថ្នាក់ជាតិមួយទាំងមូល ដែលមិនមែនជាការប្រឡងលេងសើចត្រឹមតែឆមាសរបស់សាលា ហេតុអីក៏មានការឆ្វេសប្រហែស ខ្វះចន្លោះច្រើនម្ល៉េះ?»។
ចំណែកឯនិស្សិតជាបុរសមួយរូប ក៏ដូចជានិស្សិតដទៃទៀត ដែលបានថ្លែងក្នុងលក្ខខណ្ឌមិនបញ្ចេញឈ្មោះ ក៏បានបញ្ជាក់ពីភាពមិនប្រក្រតីមួយចំនួនស្រដៀងគ្នានឹងការលើកឡើងរបស់កញ្ញា ម៉ូលីនិក ដែរ។ ទោះយ៉ាងណា លោកនៅតែសង្ឃឹមថា នឹងមានអន្តរាគមន៍ពីសំណាក់ប្រមុខរដ្ឋាភិបាលចំពោះបញ្ហានេះ។
និស្សិតដែលសុំមិនបញ្ចេញឈ្មោះបានថ្លែងដូច្នេះ ៖ «និស្សិតទាំងអស់សង្ឃឹមជឿជាក់យ៉ាងមុតមាំថា សម្ដេចអគ្គមហាសេនាបតីតេជោ ហ៊ុន សែន នឹងផ្ដល់ដំណោះស្រាយឲ្យសមស្របសម្រាប់ពួកខ្ញុំទាំងអស់គ្នា ដែលជានិស្សិតស្រេកឃ្លានការសិក្សាទាំងអស់»។
ប្រធានសមាគមគ្រូបង្រៀនកម្ពុជាឯករាជ្យ និងជាអ្នកតាមដានការតវ៉ារបស់ក្រុមនិស្សិត លោក រ៉ុង ឈុន បានថ្លែងថា ក្រុមនិស្សិតទាំងនោះមិនមែនអសត្ថភាពទេ ព្រោះពួកគេមានវិញ្ញាបនបត្រ ហើយអាចនឹងបន្តការសិក្សានៅឆ្នាំទី២បាន។
លោក រ៉ុង ឈុន បានថ្លែងដូច្នេះ ៖ «យើងទទួលបានព័ត៌មានគ្រប់ច្រកល្ហកមក នៅសាលាពេទ្យហ្នឹងមានអំពើពុករលួយសម្បើមណាស់ ការដែលប្រឡងឡើងថ្នាក់ ប្រឡងឆមាស ប្រចាំឆ្នាំ ប្រចាំខែអី សូកទៅតាមមុខវិជ្ជាបួនដប់ដុល្លារ ម្ភៃដុល្លារ។ អ៊ីចឹងការដែលពង្រឹងគុណភាពនៅក្នុងវិស័យសុខាភិបាល មិនមែនការពង្រឹងដោយជម្រុះនិស្សិតចោលបែបហ្នឹងទេ»។
គួររំឭកជូនថា ក្រុមនិស្សិតអ្នកតវ៉ាទាំងនោះ បានរៀនថ្នាក់ត្រៀមដោយម្នាក់ៗត្រូវបង់ប្រាក់៨០០ដុល្លារក្នុង១ឆ្នាំ។ ក្រុមនិស្សិតបានចាប់ផ្ដើមការតវ៉ាតាំងពីថ្ងៃទី៩ តុលា ដោយទាមទារឲ្យបានចូលរៀនបន្តទៀត ហើយបដិសេធនូវលទ្ធផលនៃការប្រឡងនោះ ប៉ុន្តែមន្ត្រីជាន់ខ្ពស់ដដែលបានជំរុញឲ្យមានការប្តឹងទៅតុលាការបើសិនជាពួកគេនៅតែមិនសុខចិត្ត៕