រដ្ឋាភិបាលប្រទេសកម្ពុជានៅថៃ្ងអង្គារនេះ បានកោះប្រជុំអន្តរក្រសួងជាបន្ទាន់មួយដើម្បីបំភ្លឺ និងបដិសេធចំពោះសេចក្តីថែ្លងការណ៍របស់អង្គការឃ្លាំមើលសិទ្ធិមនុស្សអាស៊ី ឬ Human Rights Watch Asia ដែលបានចោទប្រកាន់ថា មណ្ឌលស្តារនីតិសម្បទាអ្នកញៀនគ្រឿងញៀននានានៅកម្ពុជាបានធ្វើទារុណកម្ម ឆក់ខ្សែភ្លើង វាយនឹងខ្សែតី និងវាយធ្វើបាបជាដើម។
កិច្ចប្រជុំជាសំខាន់ និងជាបន្ទាន់នោះបានធ្វើទ្បើងក្រោមអធិបតីភាពរបស់លោក កែ គឹមយ៉ាន ជាឧបនាយករដ្ឋមន្រ្តី និងជាប្រធាននៃអជ្ញាធរជាតិប្រយុទ្ធប្រឆាំងគ្រឿងញៀន ដែលមានតំណាងមកពីក្រសួងពាក់ព័ន្ធមានដូចជាក្រសួងសង្គមកិច្ច អតីតយុទ្ធជន និងយុវនីតិសម្បទា ក្រសួងមហាផ្ទៃ ក្រសួងការពារជាតិ និងអាជ្ញាធរជាតិប្រយុទ្ធប្រឆាំងគ្រឿងញៀន។
លោក នាក់ យុទ្ធា ជាប្រធាននាយកដ្ឋាននៃនីតិកម្មអប់រំ និងស្តារនីតិសម្បទានៃអគ្គលេខាធិការដ្ឋាន របស់អាជ្ញាធរជាតិប្រយុទ្ធប្រឆាំងគ្រឿងញៀនបានមានប្រសាសន៍ប្រាប់វិទ្យុអាស៊ីសេរីនៅថៃ្ងអង្គារ ថា អន្តរក្រសួងនឹងចេញសេចក្តីបដិសេធមួយនាពេលឆាប់ៗនេះ។
លោក នាក់ យុទ្ធា បញ្ជាក់ថា ៖ «គឺឆន្ទៈរដ្ឋាភិបាលគ្មានគំនិតធ្វើអ្វីដូចជាការចោទប្រកាន់ទេ យើងខិតខំប្រឹងប្រែងធ្វើបានល្អ។ ប៉ុន្តែអ្វីដែលគាត់យល់គឺជារឿងរបស់គាត់ ហើយសេចក្តីថ្លែងការណ៍នឹងចេញថ្ងៃស្អែក ពុំមានការវាយដំច្រំធាក់អីទេសម្រាប់មជ្ឈមណ្ឌលបន្សាបគ្រឿងញៀនដែលស្ថិតនៅក្រោមការគ្រប់គ្រងស្ថាប័នរដ្ឋ ហេតុអីបានជាខ្ញុំនិយាយអីចឹង គឺភាគច្រើននៃពួកគេគឺស្ម័គ្រចិត្តត្រូវបានម៉ែឪយកទៅ»។
ប្រភពបានឲ្យដឹងថា ប្រទេសកម្ពុជាមានមណ្ឌលអប់រំ និងស្តារនីតិសម្បទាអ្នកញៀនគ្រឿងញៀនចំនួនជាង ១០ កន្លែងដែលមានមនុស្សចំនួនជាង ១០០០នាក់កំពុងតែទទួលការអប់រំ និងបន្សាបគ្រឿងញៀនឲ្យចេះកាត់សក់ ជួសជុលម៉ូតូ កុំព្យូទ័រ និងជួសជុលម៉ាញ៉េជាដើម។
ផ្ទុយពីការអះអាងនោះ អង្គការឃ្លាំមើលសិទ្ធិមនុស្សអាស៊ី ឬ Human Rights Watch Asia កាលពីថៃ្ងទី៣១ ចុងខែមករាថ្មីៗនេះ បាននិយាយចោទប្រកាន់ថា មានការរីករាលដាលនៃអំពើធ្វើទារុណកម្មដូចជាវាយធ្វើបាបឆក់ខ្សែភ្លើង វាយនឹងខ្សែតីជាដើមលើមនុស្ស និងកុមារនៅក្នុងមណ្ឌលជាច្រើនក្នុងនោះមានមណ្ឌលចោមចៅជាយទីក្រុងភ្នំពេញផងដែរ។
សេចក្តីថែ្លងការណ៍បានទទូចសុំឲ្យអង្គការ UNICEF និងការិយាល័យរបស់អ.ស.ប. គ្រប់គ្រងគ្រឿងញៀន និងបទឧក្រិដ្ឋកម្មនៅក្នុងប្រទេសកម្ពុជា បញ្ជាក់ទៅរដ្ឋាភិបាលកម្ពុជាថា មណ្ឌលទាំងនោះគប្បីត្រូវបានបិទ ដោយសារតែមានអំពើរំលោភបំពាន និងខុសច្បាប់។
អង្គការការពារសិទ្ធិមនុស្ស លីកាដូ បានចេញរបាយការណ៍ស្រាវជ្រាវមួយកាលពីថៃ្ងទី២៨ ខែមិថុនា ឆ្នាំ២០០៨នោះ ដោយបានសុំឲ្យរដ្ឋាភិបាលបិទជំរំឃុំឃាំងមនុស្សដែលខុសច្បាប់ចំនួន ២កន្លែងនៅក្នុងនោះមានមណ្ឌលព្រៃស្ពឺ នៅក្នុងសង្កាត់ចោមចៅ ខណ្ឌដង្កោ ជាយទីក្រុងភ្នំពេញ និងមណ្ឌលកោះគ នៅលើកោះមួយនៅក្នុងស្រុកស្អាង ខេត្តកណ្តាល។
របាយការណ៍នោះបានបង្ហាញថា ស្ថានការណ៍រស់នៅក្នុងមណ្ឌលនោះគឺគ្មានអនាម័យ គ្មានទឹកស្អាតប្រើប្រាស់ គ្មានថ្នាំព្យាបាល ព្រមទាំងមានអំពើហិង្សាដោយក្រុមសន្តិសុខយាមការពារមណ្ឌលនោះ។ មន្រ្តីនៃក្រសួងមហាផៃ្ទធ្លាប់បានបដិសេធទៅនឹងរបាយការណ៍នោះកន្លងមក៕