ប្រភពពីមន្រ្តីជាន់ខ្ពស់នៃរដ្ឋាភិបាលកម្ពុជា បានបង្ហើបឲ្យដឹងថា លោក សុខ អាន ជាឧបនាយករដ្ឋមន្រ្តី និងជារដ្ឋមន្រ្តីនៃទីស្តីការគណៈរដ្ឋមន្រ្តីនោះ បានបដិសេធមិនព្រមឲ្យមានការលើកលែងទោសលោក ហង្ស ចក្រា ជាចាងហ្វាងកាសែតខែ្មរម្ចាស់ស្រុកនោះទេ បើទោះបីជាព្រះករុណា ព្រះមហាកក្សត្រខែ្មរ ព្រះបាទបរមនាថ នរោត្តម សីហមុនី បានស្នើសុំឲ្យប្រមុខរដ្ឋាភិបាលកម្ពុជា លោក ហ៊ុន សែន ពិនិត្យមើលអំពីការលើកលែងទោសនោះក៏ដោយ។
លោក ខៀវ កាញារីទ្ធ ជារដ្ឋមន្រ្តីក្រសួងព័ត៌មាននិងជាមន្រ្តីអ្នកនាំពាក្យរដ្ឋាភិបាលកម្ពុជាផងដែរនោះ បានមានប្រសាសន៍ប្រាប់វិទ្យុអាស៊ីសេរីនៅថៃ្ងច័ន្ទ ទី៩ ខែវិច្ឆិកានេះថា លោកគាំទ្រឲ្យលើកលែងទោសលោក ហង្ស ចក្រា នោះ ប៉ុន្តែលោក សុខ អាន ជាដើមបណ្ដឹងមិនយល់ព្រមទេ ពីព្រោះលោកយល់ថា ការលើកលែងទោសនោះវានឹងក្លាយជាទម្លាប់មិនល្អទៅថៃ្ងក្រោយទៀត។
លោក ខៀវ កាញារីទ្ធ បានមានប្រសាសន៍ទៀតថា នេះជាជម្រើសចុងក្រោយហើយរបស់លោក ហង្ស ចក្រា ដោយលោកបានបញ្ជាក់ទៀតថា លោកនឹងបន្តជួយឧត្ថម្ភនានាដល់គ្រួសាររបស់លោក ហង្ស ចក្រា នោះទៀត ដែលមានជីវភាពក្រលំបាក។
លោក យឹម សុវណ្ណ តំណាងរាស្រ្តនៃគណបក្សសមរង្ស៊ី និងជាមន្រ្តីអ្នកនាំពាក្យរបស់គណបក្សនេះផងដែរ បានមានប្រសាសន៍ថា ៖ «ទម្លាប់ដែលល្អ គឺទម្លាប់ឲ្យមានការអធ្យាស្រ័យ អត់ឱនគ្នាចំពោះអ្នកទន់ខ្សោយ អ្នកដែលគ្មានអំណាច អ្នកដែលគ្រាន់តែប្រើស្លាបប៉ាកកា ដើម្បីប្រកបមុខរបររបស់ខ្លួនតែប៉ុណ្ណឹងទេ។ ខ្ញុំយល់ឃើញថា លោក ហង្ស ចក្រា គឺជាមនុស្សស្លូតត្រង់»។
លោក អំ សំអាត ប្រធានក្រុមស៊ើបអង្កេតនៃអង្គការការពារសិទ្ធិមនុស្សក្រៅរដ្ឋាភិបាល ហៅកាត់ថា លីកាដូ បានមានប្រសាសន៍ថា លោកមានការសោកស្តាយចំពោះការមិនយល់ព្រមនោះ។
លោក អំ សំអាត មានប្រសាសន៍ដូច្នេះ ៖ «គ្រាន់តែបញ្ចេញមតិរបស់ខ្លួន ហើយត្រូវជាប់ពន្ធនាគារដោយពុំមានការលើកលែងទោស ដើម្បីផ្ដល់ឱកាសឲ្យគាត់មកប្រកបមុខវិជ្ជាជីវៈជាអ្នកសារព័ត៌មានវិញ»។
កាលពីថៃ្ងទី២៧ ខែតុលា ថ្មីៗនេះ ព្រះករុណាព្រះមហាក្សត្រខែ្មរ ព្រះបាទបរមនាថ នរោត្តម សីហមុនី ព្រះអង្គបានផ្ញើព្រះរាជសារលិខិតមួយច្បាប់ជូនលោកនាយករដ្ឋមន្រ្តី ហ៊ុន សែន មេត្តាពិនិត្យដោយអនុគ្រោះ ចំពោះអ្វីដែលព្រះអង្គបានទទួលសំណើទូលថ្វាយពីសំណាក់តំណាងរាស្រ្តគណបក្សសមរង្ស៊ី សុំឲ្យព្រះអង្គប្រទានការលើកលែងទោសលោក ហង្ស ចក្រា នោះ។
ប្រភពបានឲ្យដឹងថា ព្រះមហាក្សត្រអាចប្រទានការលើកលែងទោសទៅបាន លុះត្រាណាមានសំណើពីនាយករដ្ឋមន្រ្តីជាមុនសិន។ នៅមិនទាន់ទាក់ទងមន្រ្តីនៃខុទ្ទកាល័យរបស់លោកនាយករដ្ឋមន្រ្តី ហ៊ុន សែន បានទេ នៅថៃ្ងច័ន្ទ ទី៩ ខែវិច្ឆិកានេះ ពីព្រោះជាថ្ងៃឈប់សម្រាកបុណ្យជាតិ។
លោក ហង្ស ចក្រា អាយុ៥៥ឆ្នាំ ជាចាងហ្វាងកាសែតខែ្មរម្ចាស់ស្រុក គាំទ្រគណបក្សសមរង្ស៊ី ត្រូវបានតុលាការសាលាដំបូងរាជធានីភ្នំពេញ បានកាត់ទោសឲ្យជាប់គុក១២ខែ និងផាកពិន័យជាប្រាក់៩លានរៀល កាលពីថៃ្ងទី២៦ ខែមិថុនាកន្លងទៅ ក្រោមបទផ្សាយព័ត៌មានមិនពិត ជុំវិញការបំបែកមន្រ្តីពុករលួយនៅជុំវិញលោក សុខ អាន ជាឧបនាយករដ្ឋមន្រ្តីនិងជារដ្ឋមន្រ្តី នៃទីស្តីការគណៈរដ្ឋមន្រ្តីកន្លងទៅនេះ។
ក្រោយមកតុលាការសាលាឧទ្ធរណ៍ប្រទេសកម្ពុជា បានសម្រេចតម្កល់សាលក្រមរបស់តុលាការក្រុងភ្នំពេញនោះ ចាត់ទុកថាជាបានការ កាលពីថៃ្ងទី១១ ខែសីហា កន្លងទៅនេះ ដោយបន្តឃុំខ្លួនលោក ហង្ស ចក្រា ជាបន្តទៀតនៅក្នុងគុកព្រៃសនោះ៕