រដ្ឋាភិបាលកម្ពុជាគ្រោងនឹងប្រកាសតម្លៃផ្គត់ផ្គង់សេវាទូរស័ព្ទចល័តដែលកំណត់ដោយក្រសួងប្រៃសណីយ៍ និងទូរគមនាគមន៍កម្ពុជា នៅថ្ងៃសុក្រ ទី៥ កុម្ភៈនេះ ហើយបានព្រមានថា រដ្ឋាភិបាលនឹងបិទទ្វារក្រុមហ៊ុន ប្រសិនបើក្រុមហ៊ុនទូរស័ព្ទណាមួយមិនប្រតិបត្តិតាមសេចក្តីប្រកាសនេះ។
លោក សារ៉ាក់ ខាន់ រដ្ឋលេខាធិការក្រសួងប្រៃសណីយ៍ និងទូរគមនាគមន៍ មានប្រសាសន៍ប្រាប់វិទ្យុអាស៊ីសេរីនៅថ្ងៃអង្គារ ទី២ កុម្ភៈនេះថា ៖ «ប្រហែលក្នុងសប្តាហ៍នេះ ខ្ញុំនឹងប្រកាសដល់ប្រតិបត្តិករទូរស័ព្ទទាំងអស់ហើយគឺថា អ្នកណាមិនអនុវត្តគឺឲ្យព្យួរអាជ្ញាប័ណ្ណ ឬលុបអាជ្ញាប័ណ្ណតែម្តង។ សប្តាហ៍ហ្នឹងខ្ញុំគ្រោង (ប្រកាស) ថ្ងៃសុក្រ»។
ដោយអនុលោមទៅតាមគោលការណ៍សេដ្ឋកិច្ចទីផ្សារសេរី រដ្ឋាភិបាលកម្ពុជាបានបើកដៃឲ្យក្រុមហ៊ុនទូរស័ព្ទប្រកួតប្រជែងដោយសេរី។ ក៏ប៉ុន្តែខុសពីការរំពឹងទុក ចាប់តាំងពីឆ្នាំ២០០៨មក ក្រុមហ៊ុនខ្លះបានផ្គត់ផ្គង់សេវាដល់អតិថិជនរបស់ខ្លួនដោយមិនគិតថ្លៃរយៈពេលយូរដើម្បីផ្សព្វផ្សាយពាណិជ្ជកម្មរបស់ខ្លួន ឬហៅថា Promotion ហើយក្រុមហ៊ុនខ្លះទៀតដែលមិនអាចធ្វើ Promotion បានដូច្នេះនោះ ក៏បានផ្តាច់ប្រព័ន្ធហៅចូលពីប្រព័ន្ធបណ្តាញទូរស័ព្ទក្រុមហ៊ុនផ្សេងកុំឲ្យហៅចូលបាន ហើយក៏កើតជាជម្លោះ និងអនាធិបតេយ្យលើទីផ្សារផ្គត់ផ្គង់សេវាទូរស័ព្ទចល័ត។
លោក សារ៉ាក់ ខាន់ បន្ថែមថា ៖ «ប្រតិបត្តិករទូរស័ព្ទចាស់ហ្នឹងគឺបានតវ៉ាប្រតិបត្តិករទូរស័ព្ទថ្មីថាមានបំណងធ្វើឲ្យបង្ខូចតម្លៃទីផ្សារផ្តល់សេវាដោយឲ្យគេនិយាយទទេមួយរយៈធំទៅ គឺបានន័យថា អត្រា ០ ។ ដល់ប្រតិបត្តិករទូរស័ព្ទថ្មីគឺបានចោទប្រកាន់ទៅក្រុមហ៊ុនទូរស័ព្ទចាស់ៗពីមុនហ្នឹងថា មានបំណងរាំងខ្ទប់ការហៅឆ្លងបណ្តាញរបស់ខ្លួន ដល់អីចឹងទៅ សម្តេចនាយករដ្ឋមន្ត្រីបានចេញបទបញ្ជាមួយលេខ ០១ គឺហាមដាច់ខាតការប្រកួតប្រជែងគ្នាបែបហ្នឹងគឺមិនអាចឲ្យមានទេ»។
ចំពោះការកំណត់តម្លៃសេវាថ្មីនេះ សេចក្តីប្រកាសបានកំណត់ថា ក្រុមហ៊ុនផ្គត់ផ្គង់សេវាទូរស័ព្ទនីមួយៗមិនអាចកំណត់តម្លៃសេវាទាបជាងតម្លៃដើមរបស់ក្រុមហ៊ុនដែលវិនិយោគនោះបានទេ ពោលគឺ ចំពោះសេវាការហៅឆ្លងប្រព័ន្ធមានន័យថា ហៅចេញពីប្រព័ន្ធក្រុមហ៊ុនមួយទៅប្រព័ន្ធក្រុមហ៊ុនមួយទៀតត្រូវបានរដ្ឋាភិបាលកំណត់តម្លៃអប្បបរមាមិនឲ្យលើស ៩,៩៥សេន (ដុល្លារ) ស្មើប្រហែល ៤០០រៀលក្នុង១នាទី និងថ្លៃ ៤,៥សេន (ដុល្លារ) ក្នុងមួយនាទី គឺស្មើ ២០០រៀលចំពោះតម្លៃហៅក្នុងប្រព័ន្ធ។
សព្វថ្ងៃមានក្រុមហ៊ុនទូរស័ព្ទចំនួន ៩ កំពុងប្រតិបត្តិការនៅលើទីផ្សារកម្ពុជា។ ទាក់ទងទៅនឹងការកំណត់តម្លៃសេវាថ្មីដោយក្រសួងប្រៃសណីយ៍នេះ មន្ត្រីតំណាងក្រុមហ៊ុនជាច្រើនបដិសេធមិនអធិប្បាយទេ។
លោក អ៊ុំ រត្តនា អ្នកនាំពាក្យក្រុមហ៊ុនស្មាតម៉ូបាល (Smart Mobile) មានប្រសាសន៍ថា វាហាក់ដូចជាឆាប់ពេកណាស់នៅក្នុងការអធិប្បាយលើការកំណត់តម្លៃនេះ ៖ «អត់ទាន់ហ៊ាននិយាយទេព្រោះចាំចេញមកសិន ព្រោះក្រែងលោគេមានស្អីថែមទៀត»។
លោករដ្ឋលេខាធិការ សារ៉ាក់ ខាន់ បញ្ជាក់ថា វិធានការថ្មីនេះមានបំណងធ្វើឲ្យការប្រកួតប្រជែងទីផ្សារផ្គត់ផ្គង់សេវាទូរស័ព្ទមានសមធម៌៕