ក្រុមសិទ្ធិមនុស្សស្នើឲ្យរដ្ឋាភិបាលខ្មែរចាត់វិធានការប្រឆាំងនឹងការធ្វើទារុណកម្ម

ដោយ កេសរណ្ណីយ្យា

2009-06-24

គណៈកម្មាធិការការពារសិទ្ធិមនុស្សប្រចាំតំបន់អាស៊ី បានស្នើដល់រាជរដ្ឋាភិបាលខ្មែរថា គប្បីប្រឹងប្រែងចាត់វិធានការប្រឆាំងនឹងការធ្វើទារុណកម្មនិងការពារដល់សិទ្ធិសេរីភាពរបស់ពលរដ្ឋក្នុងប្រទេសឲ្យកាន់តែមានប្រសិទ្ធភាពថែមទៀត។

ក្នុងសេចក្តីថ្លែងការណ៍មួយដែលផ្សព្វផ្សាយនៅថ្ងៃពុធនេះ គណៈកម្មាធិការការពារសិទ្ធិមនុស្សអាស៊ី បានគូសបញ្ជាក់ថា ក្នុងអំឡុងពេលចាប់ពីឆ្នាំ១៩៧៥ ដល់ឆ្នាំ១៩៧៩ ប្រជាពលរដ្ឋខ្មែរបានទទួលរងគ្រោះក្រោមរបបខ្មែរក្រហម ដែលជារបបមួយក្នុងចំណោមរបបដ៏ព្រៃផ្សៃបំផុតនានាលើពិភពលោក។

សេចក្តីថ្លែងការណ៍បានសរសេរទៀតថា របបខ្មែរក្រហមបានប្រើការធ្វើទារុណកម្មជាផ្នែកមួយនៃមធ្យោបាយការពារពង្រឹងការគ្រប់គ្រងប្រទេសរបស់ខ្លួនដែលក្នុងនោះ មនុស្សប្រមាណ ១ម៉ឺន ៦ពាន់នាក់ បានស្លាប់យ៉ាងគួរឲ្យរន្ធត់ដោយសារការធ្វើទារុណកម្មដែលមានលក្ខណៈជាប្រព័ន្ធដើម្បីសួរយកចម្លើយនៅក្នុងមន្ទីរឃុំឃាំង ស-២១ ឬគុកទួលស្លែង។

ទាក់ទងនឹងស្ថានភាពនៅក្នុងប្រទេសកម្ពុជា បច្ចុប្បន្ននេះវិញ សេចក្តីថ្លែងការណ៍បានបង្ហាញថា អស់រយៈពេលជាច្រើនឆ្នាំមកហើយ ក្រសួងមហាផ្ទៃបានអនុញ្ញាតឲ្យអង្គការពុំមែនរដ្ឋាភិបាលនានា ចូលទៅពិនិត្យស្ថានភាពនៅតាមពន្ធនាគារទាំងឡាយ ប៉ុន្តែមិនបានអនុញ្ញាតឲ្យចូលទៅផ្តល់ការពិនិត្យព្យាបាលនិងសាកសួរព័ត៌មានពីអ្នកជាប់ឃុំឃាំងនៅតាមស្ថានីយប៉ូលិសនានានោះឡើយ។

មិនទាន់មានប្រតិកម្មពីរាជរដ្ឋាភិបាល តបទៅនឹងសេចក្តីថ្លែងការណ៍នេះនៅឡើយទេ៕

បោះពុម្ព អ៊ីម៉េល

មតិ

អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។