តំណាងរាស្ត្រមកពីគណបក្សសមរង្ស៊ី គឺលោក សុន ឆ័យ បានថ្លែងជុំវិញការទាមទារឲ្យរដ្ឋាភិបាលបង្ហាញគម្រោងថវិកាជាតិឆ្នាំ២០០៩នោះយ៉ាងដូច្នេះថា ៖ «យើងចង់បញ្ជាក់ជាមួយរដ្ឋាភិបាលអំពីបំណង ឬក៏មូលដ្ឋានដែលមានការពង្រីកថវិកាជាតិ ហើយដែលចាប់អារម្មណ៍ទៅលើវិស័យយោធា អាចចំនួននេះទ្វេមួយជាពីរ ប្រៀបធៀបទៅនឹងការចំណាយពីឆ្នាំមុន នេះជាបញ្ហាមួយ។ បញ្ហាទី២ យើងចង់ដឹងថា តើរដ្ឋយកប្រាក់ឯណាមកបន្ថែមទៅលើការពង្រីកការចំណាយ ពង្រីកពន្ធដារ? តើពង្រីកពន្ធលើវិស័យអី? ឬមួយក៏យើងពង្រឹងវិស័យពន្ធដារ ដែលយើងឃើញហើយមានពន្ធគយ ដែលមានការបន្លំអស់ជាច្រើន និងកេងបំបាត់ដោយធ្វើការទប់ស្កាត់អំពើពុករលួយ ឬយ៉ាងណា? នេះគឺយើងចង់ដឹងអំពីមធ្យោបាយនៃការរកថវិកាបន្ថែមទាំងនេះ»។
យោងតាមឯកសារពីកិច្ចប្រជុំគណៈរដ្ឋមន្ត្រីខ្មែរ នាថ្ងៃទី១៧ ខែតុលា ក្រោមអធិបតីភាពលោកនាយករដ្ឋមន្ត្រី ហ៊ុន សែន គឺរដ្ឋាភិបាលខ្មែរសម្រេចបង្កើនការចំណាយថវិកាជាតិ សម្រាប់ឆ្នាំ២០០៩នោះ រហូតដល់ជិត ២.០០០លានដុល្លារ គឺកើនឡើងជិត៣០% ច្រើនជាងខ្ទង់ចំណាយថវិកាជាតិឆ្នាំកន្លងទៅ។
មន្ត្រីរដ្ឋាភិបាលនៅថ្ងៃនេះ មិនអាចទាក់ទងបានដើម្បីឆ្លើយតបនឹងការទាមទាររបស់គណបក្សជំទាស់នោះទេ ក៏ប៉ុន្តែតំណាងរាស្ត្រមកពីគណបក្សប្រជាជនកម្ពុជាគឺលោក ជាម យៀប បានថ្លែងថា ការសម្រេចចែកផ្សាយឬមិនផ្សព្វផ្សាយឯកសារនោះ គឺជាសិទ្ធិរបស់រដ្ឋាភិបាល។
ជាមួយគ្នានេះ លោក ជាម យៀប ថ្លែងថា នឹងមានការជជែកដេញដោលមួយនៅក្នុងខែវិច្ឆិកា នៅមុននឹងរដ្ឋសភាពិនិត្យលើគម្រោងថវិកាជាតិនោះ។
លោក ជាម យៀប មានប្រសាសន៍ដូច្នេះថា ៖ «នៅពេលខាងមុខនេះ ខ្ញុំនឹងបបួលគ្នាដើម្បីរៀបចំបើក(សិក្ខាសាលា)មួយ នៅរដ្ឋសភា។ ខ្ញុំអញ្ជើញ International Community (សហគមន៍អន្តរជាតិ) អញ្ជើញ NGO មួយចំនួន បើជាការចាំបាច់ ហើយអញ្ជើញសមាជិកព្រឹទ្ធសភា រដ្ឋសភា ហើយតំណាងរាជរដ្ឋាភិបាល ឯកឧត្ដម គាត ឈន់ ចូលរួមធ្វើបាឋកថាដើម្បីឲ្យគេរៀបចំឲ្យបានមុនពេលដែលសភាអនុម័ត ដើម្បីយើងយកខ្លឹមសារចូលរួមជាមួយ នឹងឲ្យសភាអនុម័តនៅពេលខាងមុខ»។
សូមជម្រាបថា គម្រោងថវិកាជាតិឆ្នាំ២០០៩នោះ ទើបត្រូវបានអនុម័តដោយគណៈរដ្ឋមន្ត្រីប៉ុណ្ណោះ ហើយគេគ្រោងបញ្ជូនផែនការថវិកាជាតិនេះឲ្យរដ្ឋសភាពិនិត្យ នៅសប្តាហ៍ទី១នៃខែវិច្ឆិកា ហើយរដ្ឋសភាគ្រោងប្រជុំអនុម័តជាផ្លូវការនៅថ្ងៃទី២៥ ខែធ្នូ ឆ្នាំនេះ៕