លោកស្រី មូរ សុខហួរ តំណាងរាស្ត្រគណបក្សប្រឆាំងកាលពីថ្ងៃពុធ ទី១៥ មិថុនា បានចោទប្រកាន់រដ្ឋាភិបាលកម្ពុជា ដែលបានផ្ដល់គម្រោងវិនិយោគទុនផលិតចរន្តអគ្គិសនីដើរដោយធ្យូងថ្មដោយគ្មានតម្លាភាពទៅឲ្យក្រុមហ៊ុនចិន និងក្រុមហ៊ុនក្នុងស្រុកជាដៃគូមួយនៅកម្ពុជា។ លើសពីនេះទៀត រដ្ឋាភិបាលនៅព្រឹកថ្ងៃព្រហស្បតិ៍នេះ ក៏នឹងស្នើសុំឲ្យរដ្ឋសភាជាតិផ្ដល់ការធានាលើកិច្ចសន្យាសម្រាប់ក្រុមហ៊ុននេះមុននឹងបង្កើតរោងចក្រនៅក្នុងខេត្តព្រះសីហនុ។
គម្រោងផលិតចរន្តអគ្គិសនីដោយធ្យូងថ្មនេះមានតម្លៃប្រមាណ ៣៦២លានដុល្លារ ដែលនឹងត្រូវបង្កើតឡើងនៅតំបន់ឧស្សាហកម្មស្ទឹងហាវ ដែលមានកម្លាំងប្រមាណ ២៧០ម៉េហ្គាវ៉ាត់។ រដ្ឋាភិបាលបានផ្ដល់សម្បទានរយៈពេល ៣៣ឆ្នាំ ឲ្យក្រុមហ៊ុនធ្វើអាជីវកម្ម។
មន្ត្រីក្រសួងឧស្សាហកម្មធ្លាប់មានប្រសាសន៍ថា គម្រោងចរន្តអគ្គិសនីនេះនឹងចាប់ផ្ដើមសាងសង់នៅក្នុងឆ្នាំ២០១១ និងបញ្ចប់នៅឆ្នាំ២០១៥។
លោកស្រី មូរ សុខហួរ មានប្រសាសន៍បន្តថា តំណាងរាស្ត្រគណបក្ស សម រង្ស៊ី នឹងមិនអាចផ្ដល់ការធានាកិច្ចសន្យាឲ្យរដ្ឋាភិបាលបានទេ ពីព្រោះរដ្ឋាភិបាលមិនបានផ្ដល់ព័ត៌មានចាំបាច់មួយចំនួនពីក្រុមហ៊ុនឲ្យតំណាងរាស្ត្រសិក្សាមុននឹងកិច្ចប្រជុំរដ្ឋសភា។
របាយការណ៍កាសែតក្នុងស្រុកបានឲ្យដឹងថា ក្រុមហ៊ុនដៃគូក្នុងស្រុកសម្រាប់គម្រោងរោងចក្រអគ្គិសនីនេះឈ្មោះថា Cambodia International Investment Development Group។ ក្រុមហ៊ុននេះ ក៏ជាក្រុមហ៊ុនអភិវឌ្ឍន៍តំបន់បឹងកក់ផងដែរ។ ក្រុមហ៊ុនអភិវឌ្ឍន៍បឹងកក់បានរងការចោទប្រកាន់ថា បានរំលោភយកដីរបស់ពលរដ្ឋដោយមិនផ្ដល់សំណងសមស្រប។ បច្ចុប្បន្នពលរដ្ឋបឹងកក់ជាងមួយពាន់គ្រួសារកំពុងតវ៉ាអាជ្ញាធររាជធានីភ្នំពេញ ដើម្បីអនុញ្ញាតឲ្យពួកគេអភិវឌ្ឍតំបន់បឹងកក់ដោយខ្លួនផ្ទាល់។
លោកស្រី មូរ សុខហួរ បន្តថា រដ្ឋាភិបាលគួរពិនិត្យមើលក្រុមហ៊ុនមុននឹងផ្ដល់កិច្ចសន្យា ពីព្រោះលោកស្រីបារម្ភថា ក្រុមហ៊ុនខ្លះមានបំណងចង់ធ្វើគម្រោងដោយគ្មានថវិកា។ លោកស្រីក៏បានសម្ដែងក្ដីបារម្ភពីបរិស្ថាននៅក្នុងខេត្តព្រះសីហនុ ដែលអាចបណ្ដាលឲ្យមានផលប៉ះពាល់ដល់សុខភាពពលរដ្ឋ។ មន្ត្រីរដ្ឋាភិបាលបានអះអាងថា គម្រោងចរន្តអគ្គិសនីធ្យូងថ្មនេះ នឹងមិនប៉ះពាល់ដល់បរិស្ថានសមុទ្រកម្ពុជាទេ ដោយសារចំហាយផ្សែងចេញពីរោងចក្រមានកម្រិតទាបជាងធម្មតា។ គម្រោងនេះជាគម្រោងទី២ ដើរដោយធ្យូងថ្មនៅក្នុងខេត្តព្រះសីហនុ។
តាមឯកសារដែលវិទ្យុអាស៊ីសេរី រកឃើញក្នុងទំព័រវ៉ឹបសាយមួយឈ្មោះ Energy World ឬប្រែថា ថាមពលពិភពលោក ដែលនិយាយអំពីកិច្ចប្រជុំលើកទី៧ ស្តីអំពីសន្និសីទអន្តរជាតិលើការដុតបញ្ឆេះធ្យូងថ្ម គេបានរាយនាមក្រុមហ៊ុន Cambodia International Investment Development Groupនេះ ដែលទទួលបានកិច្ចសន្យាសាងសង់រោងចក្រដោយក្រុមហ៊ុនវិស្វកម្មចិនឈ្មោះ China Huadian Engineering ហើយផ្ទេរហ៊ុន ឬចែកហ៊ុនចុះឡើងរវាងក្រុមហ៊ុនម៉ាឡេស៊ី ឈ្មោះ Leader Universal Holding និងក្រុមហ៊ុនក្នុងស្រុកមួយឈ្មោះ MKCSS Holding។ បន្ទាប់មក ចូលហ៊ុននឹងក្រុមហ៊ុនមួយទៀត ដោយកំណត់ភាគហ៊ុន ៥០/៥០ ឈ្មោះក្រុមហ៊ុន Power Synergy Corporation។
គេរាយនាមអ្នកគ្រប់គ្រងឈ្មោះ Chin Jeen Tan , Joanna Lim និង Nian Gao Cheng ជាអនុប្រធាន។ តាមកិច្ចសន្យា ក្រោយពេលរោងចក្រដំណើរការ គេនឹងលក់ភ្លើងឲ្យក្រុមហ៊ុនអគ្គិសនីកម្ពុជា ហើយធានាសន្តិសុខទុនដោយរាជរដ្ឋាភិបាល៕