មន្ត្រីរដ្ឋាភិបាលប្រតិកម្មចំពោះរបាយការណ៍សិទ្ធិមនុស្សរបស់លោក ស៊ូប៊ែឌី
ay.mp3
ប្រតិកម្មនេះកើតមានក្រោយពេលលោក ស៊ូប៊ែឌី ចេញផ្សាយរបាយការណ៍ឆ្នាំ២០១២ ស្តីអំពីការរំលោភបំពានរបស់រដ្ឋាភិបាលលើសិទ្ធិមនុស្ស សិទ្ធិបញ្ចេញមតិ និងសិទ្ធិលំនៅឋាន។
មន្ត្រីគណៈកម្មាធិការសិទ្ធិមនុស្សរដ្ឋាភិបាលកម្ពុជា និងមន្ត្រីទីស្ដីការគណៈរដ្ឋមន្ត្រី បានប្រតិកម្មចំពោរបាយការណ៍របស់លោក សុរិយា ស៊ូប៊ែឌី ដែលទើបចែកផ្សាយល្ងាចថ្ងៃទី២៧ ខែសីហា ឆ្នាំ២០១២ ដែលចោទការដឹកនាំរបស់រដ្ឋាភិបាលបច្ចុប្បន្ន ថាបានរំលោភសិទ្ធិមនុស្ស និងបង្កឲ្យមានជម្លោះដីធ្លីជាដើម។
លោកទេសរដ្ឋមន្ត្រី ឱម យ៉ិនទៀង ជាប្រធានគណៈកម្មាធិការសិទ្ធិមនុស្សរដ្ឋាភិបាលកម្ពុជា។ លោកបានប្រដូចរបាយការណ៍របស់លោក ស៊ូប៊ែឌី អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា ដូចគ្នានឹងសំឡេងគណបក្សប្រឆាំង និងសង្គមស៊ីវិលនៅកម្ពុជា។
លោក ឱម យ៉ិនទៀង បានថ្លែងរបៀបចំអក និងណែនាំឲ្យលោក ស៊ូប៊ែឌី គួរទៅធ្វើជាទីប្រឹក្សាឲ្យគណបក្សប្រឆាំងជាជាងមាននាទីជាអ្នករាយការណ៍ពិសេសរបស់អង្គការសហប្រជាជាតិ។ លោកថ្លែងដូច្នេះនៅអាកាសយានដ្ឋានអន្តរជាតិភ្នំពេញ ក្នុងពេលជូនដំណើរលោកនាយករដ្ឋមន្ត្រី ហ៊ុន សែន ទៅចូលរួមកិច្ចប្រជុំនៅប្រទេសអ៊ីរ៉ង់ និងប្រទេសចិន ព្រឹកថ្ងៃទី២៩ ខែសីហា ឆ្នាំ២០១២។ លោក ឱម យ៉ិនទៀង ឲ្យដឹងថា ស្ថានភាពសិទ្ធិមនុស្សកម្ពុជា មិនមែនល្អក់កករដូចរបាយការណ៍លោក សុរិយា ស៊ូប៊ែឌី បានចងក្រងនោះទេ។
បន្ថែមលើនេះ លោក ផៃ ស៊ីផាន រដ្ឋលេខាធិការ និងជាមន្ត្រីនាំពាក្យទីស្ដីការគណៈរដ្ឋមន្ត្រី ក៏បានច្រានចោលរបាយការណ៍របស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជានេះដែរ។ លោកថា របាយការណ៍លោក ស៊ូប៊ែឌី ជារឿងចាស់ និងមិនបានឆ្លុះបញ្ចាំងពីស្ថានភាពសិទ្ធិមនុស្សកំពុងវិវឌ្ឍន៍វិជ្ជមានក្នុងប្រទេសកម្ពុជាទេ។
លោកបន្តថា សព្វថ្ងៃនេះរាជរដ្ឋាភិបាលកម្ពុជា កំពុងជំរុញឲ្យមានលទ្ធិប្រជាធិបតេយ្យគោរពសិទ្ធិមនុស្ស និងធ្វើកំណែទម្រង់ដីធ្លីទទួលបានជោគជ័យបំផុត។ ដូច្នេះលោកថា របាយការណ៍របស់លោក ស៊ូប៊ែឌី ដែលចោទកម្ពុជា ថាមានការរំលោភសិទ្ធិមនុស្ស គ្រាន់តែជាសារបន្ទរតាមសំឡេងបន្តពីគណបក្សប្រឆាំង និងសង្គមស៊ីវិលមួយចំនួនទេ។
របាយការណ៍លោក សុរិយា ស៊ូប៊ែឌី ផ្សព្វផ្សាយថ្ងៃទី២៧ ខែសីហា បានបង្ហាញរដ្ឋាភិបាលកម្ពុជា បានបន្តឲ្យកើតមានបញ្ហារំលោភសិទ្ធិមនុស្ស រំលោភសិទ្ធិបញ្ចេញមតិ សិទ្ធិលំនៅឋាន បង្កឲ្យមានជម្លោះដីដោយសារសកម្មភាពផ្ដល់ដីសម្បទានសេដ្ឋកិច្ច នាំឲ្យកើតមានជម្លោះដីធ្លីស្ទើទូទាំងប្រទេសជាដើម។
យ៉ាងនេះក្តី របាយការណ៍របស់លោក ស៊ូប៊ែឌី ទទួលការសាទរពីមន្ត្រីសង្គមស៊ីវិល និងមន្ត្រីគណបក្សប្រឆាំងមួយចំនួននៅកម្ពុជា។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ និងជាប្រធានសហភាពសហជីពកម្ពុជា។ លោកបានចាត់ទុករបាយការណ៍លោក ស៊ូប៊ែឌី ថាពិតជាឆ្លុះឲ្យឃើញនូវសកម្មភាពរំលោភសិទ្ធិមនុស្ស កំពុងកើតមានក្នុងសង្គមកម្ពុជាពិតប្រាកដ។ លោកថា សព្វថ្ងៃនេះសិទ្ធិជួបជុំធ្វើកូដកម្ម-បាតុកម្ម សិទ្ធិសម្ដែងមតិ ឬសិទ្ធិមានលំនៅឋាន និងសិទ្ធិមានដីធ្វើកសិកម្ម ត្រូវគំរាមកំហែង និងរងគ្រោះដោយសាររដ្ឋាភិបាលផ្ដល់ដីសម្បទានសេដ្ឋកិច្ច។ លោកថា រដ្ឋាភិបាលកម្ពុជា មិនទាន់បានជំរុញឲ្យមានការគោរពសិទ្ធិមនុស្ស ឬលទ្ធិប្រជាធិបតេយ្យពិតប្រាកដនោះទេ។
ដូចគ្នានេះដែរ លោក យឹម សុវណ្ណ មន្ត្រីនាំពាក្យ និងជាសមាជិកសភាគណបក្ស សម រង្ស៊ី ក៏បានគាំទ្ររបាយការណ៍ស្ដីពីការរំលោភសិទ្ធិមនុស្សនេះដែរ។ លោកថា រដ្ឋាភិបាលកម្ពុជា សព្វថ្ងៃនេះបានធ្វើឲ្យពលរដ្ឋខ្មែរទឹកភ្នែក និងមានទុក្ខស្ទើររាល់ថ្ងៃ ព្រោះពួកគាត់ត្រូវបានបណ្ដេញចេញពីដីធ្លី និងផ្ទះសម្បែងដោយគ្មានសំណងសមរម្យ ព្រោះរដ្ឋាភិបាលត្រូវការដីសំរាប់ធ្វើការអភិវឌ្ឍន៍។
លោក យឹម សុវណ្ណ ថ្លែងថា រដ្ឋាភិបាលកម្ពុជា សព្វថ្ងៃ ត្រូវទទួលខុសត្រូវរាល់បញ្ហារំលោភសិទ្ធិមនុស្សក្នុងប្រទេសកម្ពុជា មិនត្រូវពោលដោះសាយកល្អនោះទេ។
ទាក់ទងបញ្ហានេះ លោក អ៊ូ ចន្ទឫទ្ធិ ជាសមាជិកសភាគណបក្សសិទ្ធិមនុស្ស បានថ្លែងថា រដ្ឋាភិបាលមិនគួរមិនទទួលស្គាល់ការគោរពសិទ្ធិមនុស្សដែលរដ្ឋាភិបាលអនុវត្តមិនទាន់បាននោះទេ។ លោកបន្តថា រូបភាពនៃការរំលោភសិទ្ធិមនុស្ស និងការគំរាមកំហែងទៅលើគណបក្សប្រឆាំង សង្គមស៊ីវិល ប្រជាពលរដ្ឋ ឬកម្មករ កម្មការិនីជាដើម រដ្ឋាភិបាលបានប្រើប្រព័ន្ធតុលាការ និងកម្លាំងប្រដាប់អាវុធសំរាប់គាបសង្កត់ធ្ងន់ធ្ងរបំផុត។
ទោះយ៉ាងណា លោក សុរិយា ស៊ូប៊ែឌី បានសរសេរក្នុងរបាយការណ៍ថា កន្លងមករដ្ឋាភិបាលកម្ពុជា បានទទួលអនុសាសន៍ជាច្រើនពីភាគីពាក់ព័ន្ធ ប៉ុន្តែគួរឲ្យសោកស្តាយ អនុសាសន៍ភាគច្រើនរដ្ឋាភិបាលមិនបានកែលម្អទេ ដូចជាបញ្ហាស្ថានភាពសិទ្ធិមនុស្ស និងសិទ្ធិនយោបាយជាដើម។
លោកបានចាត់ទុក សកម្មភាព ឬការអនុវត្តរបស់រដ្ឋាភិបាលកម្ពុជា លើបញ្ហាអ្វីមួយ ថាធ្វើឡើងដោយមិនបានពិគ្រោះយោបល់ជាមួយអ្នកពាក់ព័ន្ធ ឬជាមួយប្រជាពលរដ្ឋរងការប៉ះពាល់ឲ្យបានសមរម្យជាមុននោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អ្នកអានអនាមិក
ពី សៀមរាបលោក ជំទៀង ត្រូវនិយាយបោកប្រាស់ដូចនេះ ទើប លោក ហ៊ុន សែន ឲ្យតំណែងធំ និងលុយចាយមិនអស់ ប៉ុនែ្ត លោក ទៀង និយាយដូចនេះ គឺកុហកខ្លួនឯង និងរាស្រ្តខែ្មរធំណាស់ ។
Aug 31, 2012 05:56 AM
frank
ពី sd caOm Yin Teang. I know you do your job. But you don't know how good it is. You should listen other better than you fight back. I don't know how much you know about cambodian people. They are cries, worries, hungry and don't know who can help.
Aug 31, 2012 12:53 AM
Khmer kid
ពី Phnom PenhOm Yin Teang is a puppet of Hun Sen to say what Sen said.
Aug 30, 2012 09:41 PM
Ratha
ពី LowellOne statement that Oum Yentiang said right was Subuedi as well NGO and SRP as in Cambodia has arrived at the same conclusion. It is the fact that everyone must accept. Mr. 007 wants to bring anyone who disagrees with this assessment to court, I certainly welcome that charge. International court is not a Kangaroo court of Hun Sen and his group, freak. Go ahead and show me that you can SUE all of the free people.
Aug 30, 2012 09:36 PM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
