កម្ពុជាប្រកាសលុបបំបាត់គ្រឿងញៀនឲ្យអស់នៅឆ្នាំ២០១៥

នៅក្នុងទិវាប្រយុទ្ធប្រឆាំងគ្រឿងញៀនអន្តរជាតិ ថ្ងៃទី២៦ មិថុនា មន្ត្រីជាន់ខ្ពស់ក្រសួងមហាផ្ទៃ ប្រកាសថា កម្ពុជាមានគោលដៅបំបាត់គ្រឿងញៀនឲ្យអស់នៅឆ្នាំ២០១៥។ ទន្ទឹមនេះដែរ ក្រុមមន្ត្រីក្រសួងមហាផ្ទៃ ជំរុញឲ្យផ្នែកពាក់ព័ន្ធទាំងអស់រួមគ្នាអនុវត្តគោលដៅនេះឲ្យបានជោគជ័យ។

ដោយ វណ្ណ វិចារ
2012-06-26

sv.mp3

៤-វិច្ឆិកា-២០១១៖ មន្ត្រីកងរាជអាវុធហត្ថក្រុងភ្នំពេញ កំពុងពិនិត្យវត្ថុតាង ជាគ្រឿងញៀន ក្រោយចាប់ខ្លួនជនជាតិចិន ៩នាក់។

RFA/Sok Serey

គោលដៅលុបបំបាត់គ្រឿងញៀនឲ្យអស់នៅឆ្នាំ២០១៥ ត្រូវបានលើកឡើងដោយប្រមុខដឹកនាំក្រសួងមហាផ្ទៃ ក្នុងទិវាប្រយុទ្ធប្រឆាំងគ្រឿងញៀនអន្តរជាតិ ថ្ងៃទី២៦ មិថុនា នៅពហុកីឡាដ្ឋានជាតិអូឡាំពិក។

រដ្ឋមន្ត្រីក្រសួងមហាផ្ទៃ និងជាឧបនាយករដ្ឋមន្ត្រី លោក ស ខេង មានប្រសាសន៍ថា រដ្ឋាភិបាលកម្ពុជា កំពុងតែចាត់វិធានការបង្ការ ទប់ស្កាត់ និងបង្ក្រាបបទល្មើសគ្រឿងញៀននៅទូទាំងប្រទេស។ លោកបន្តថា កម្ពុជាមិនមែនជាប្រទេសផលិតគ្រឿងញៀនទេ ហើយកម្ពុជាទទួលរងនូវផលប៉ះពាល់ពីគ្រឿងញៀនពីប្រទេសនានា ក្នុងតំបន់ និងលើពិភពលោក។

លោក ស ខេង បញ្ជាក់ថា ដើម្បីបំបាត់គ្រឿងញៀនឲ្យអស់នៅឆ្នាំ២០១៥ គ្រប់ស្ថាប័នត្រូវចូលរួមផ្សព្វផ្សាយអប់រំពីផលវិបាកនៃគ្រឿងញៀនឲ្យបានទូលំទូលាយបំផុត។

យ៉ាងណាក៏ដោយ អ្នកជំនាញធ្វើការជាមួយជនរងគ្រោះដោយសារគ្រឿងញៀនលើកឡើងថា ការអនុវត្តច្បាប់របស់មន្ត្រីនៅថ្នាក់ក្រោមមិនបានល្អ ជាមូលហេតុសំខាន់ដែលបណ្ដាលឲ្យមានការរីករាលដាលនៃបទល្មើសគ្រឿងញៀន។

ប្រធានសមាគមជនរងគ្រោះដោយសារគ្រឿងញៀន លោក មាស សុវណ្ណ មានប្រសាសន៍ថា ការលើកឡើងពីគោលដៅបំបាត់គ្រឿងញៀនឆ្នាំ២០១៥ មិនប្រាកដថា បានជោគជ័យឡើយ ប្រសិនណារដ្ឋាភិបាលមិនតាមដានការអនុវត្តការងាររបស់ក្រុមសមត្ថកិច្ចថ្នាក់ក្រោមឲ្យបានល្អប្រសើរ។

លោកបន្តថា ការអនុវត្តច្បាប់ជាកត្តាចាំបាច់បំផុតសម្រាប់បោសសម្អាតគ្រឿងញៀន៖ «អ្នកខ្លះហ្នឹងបានតួនាទីភារកិច្ចជាអ្នកបង្ក្រាប តែងតែយកតួនាទីរបស់ខ្លួន ហើយអនុវត្តផ្ទុយនឹងច្បាប់ នេះជាចន្លោះប្រហោង»។

ទាក់ទិនបញ្ហាគ្រឿងញៀននេះ ស្ថាប័នប្រឆាំងគ្រឿងញៀនកម្ពុជា ធ្លាប់មានរឿងអាស្រូវមួយដែលចារជាប្រវត្តិសាស្ត្រ កាលពីដើមឆ្នាំ២០១១ ដោយអង្គភាពប្រឆាំងអំពើពុករលួយបានរកឃើញថា អតីតអគ្គលេខាធិការអាជ្ញាធរជាតិប្រឆាំងគ្រឿងញៀន លោក ម៉ឹក ដារ៉ា និងបក្សពួកប្រព្រឹត្តបទល្មើសពុករលួយក្នុងសំណុំរឿងគ្រឿងញៀន ហើយបច្ចុប្បន្នត្រូវបានតុលាការកាត់ទោសរួចហើយ។

ក្រៅពីច្បាប់គ្រឿងញៀន រដ្ឋាភិបាលកម្ពុជា រៀបចំគោលនយោបាយបំបាត់គ្រឿងញៀននៅតាមមូលដ្ឋាន តាមរយៈគោលនយោបាយភូមិឃុំមានសុវត្ថិភាព។

អ្នកឃ្លាំមើលបញ្ហាសង្គមឲ្យដឹងថា មានបទល្មើសព្រហ្មទណ្ឌជាច្រើនករណី កើតឡើងដោយសារអ្នកប្រព្រឹត្តសេពគ្រឿងញៀន ជាប្រការដែលរដ្ឋាភិបាលត្រូវតែចាត់វិធានការឲ្យបានខ្លាំងក្លាបំផុត ដើម្បីធានាឲ្យបាននូវសន្តិសុខសណ្ដាប់ធ្នាប់សង្គម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។