ការស្នើនេះ គឺនៅគ្រាដែលសេចក្ដីព្រាងច្បាប់ស្ដីពីការគ្រប់គ្រងប្រេងកាត ការយកពន្ធលើអាជីវកម្មប្រេងកាតកំពុងតែស្ថិតនៅទីស្ដីការគណៈរដ្ឋមន្ត្រីនៅឡើយ ហើយកំពុងតែពិនិត្យដោយអន្តរក្រសួងដើម្បីអនុម័តចុងក្រោយ។
លោក ជាម យៀប ប្រធានគណៈកម្មការទទួលបន្ទុកសេដ្ឋកិច្ច និងហិរញ្ញវត្ថុ និងជាសមាជិកគណៈកម្មការអចិន្ត្រៃយ៍សភាជាតិ បានមានប្រសាសន៍ថា សភាជាតិត្រូវការពេលវេលាគ្រប់គ្រាន់ដើម្បីពិនិត្យ និងអនុម័តលើសេចក្ដីព្រាងច្បាប់សំខាន់នេះ។
លោកបន្តថា ៖ «អង្វរករដោយទទូចដល់រាជរដ្ឋាភិបាល លោករៀបចំឲ្យបានទាន់ពេលវេលានូវច្បាប់សំខាន់ គឺ៣ គឺថា បណ្ដាប្រទេសដែលទទួលបានបណ្ដាសាប្រេង ដូចជានីហ្សេរីយ៉ា (Nigeria) អីហ្នឹង មិនមានច្បាប់គ្រប់គ្រាន់ទេ អ៊ីចឹងទៅអ្នកដែលអនុវត្តហ្នឹង អនុវត្តក៏បានមិនអនុវត្តក៏បាន»។
ប្រធានក្រុមប្រឹក្សាភិបាលរបស់សម្ពន្ធភាពដើម្បីតម្លាភាពចំណូលធនធានប្រេងកាត ឧស្ម័ន និង រ៉ែ លោក ម៉ម សម្បត្តិ បានមានប្រសាសន៍ថា លោកចង់ឲ្យមានការចូលរួមពីអង្គការសង្គមស៊ីវិលដើម្បីផ្ដល់យោបល់ឲ្យច្បាប់នេះទទួលយកបានពីគ្រប់មជ្ឈដ្ឋាន ៖ «មកដល់ពេលនេះ គឺយើងមិនទាន់មានឃើញសេចក្ដីព្រាងច្បាប់នេះបានចែកចាយ ឬក៏ធ្វើឲ្យមានសិក្ខាសាលាមួយដើម្បីជជែកពិភាក្សាផ្ដល់យោបល់លើសេចក្ដីព្រាងច្បាប់នេះបាននៅឡើយទេ»។
ផ្អែកតាមកិច្ចសម្ភាសន៍រវាងកាសែតភ្នំពេញ ប៉ុស្តិ៍ (Phnom Penh Post) ជាភាសាខ្មែរជាមួយអគ្គនាយកនៃក្រុមហ៊ុនឆីវរ៉ុន (Chevron) លោក ស្ទីវ ក្លីគ (Steve Glick) បានមានប្រសាសន៍ថា ក្រុមហ៊ុនឆីវរ៉ុន ជាសមាជិករបស់គម្រោងផ្ដួចផ្ដើមធ្វើឲ្យមានតម្លាភាពក្នុងឧស្សាហកម្មរុករកប្រេង ហៅកាត់ថា អ៊ី.អាយ.ធី.អាយ. (EITI)។
លោកបន្តថា ៖ «យើងនឹងអនុវត្តតាមច្បាប់ដែលបានចែងក្នុងប្រទេសជាម្ចាស់ផ្ទះ។ យើងនឹងអនុវត្តតាមអ្វីដែល អ៊ី.អាយ.ធី.អាយ. កំពុងតែព្យាយាមអនុវត្តនៅកម្ពុជា»។
ប្រភពពីមន្ត្រីរដ្ឋាភិបាលកម្ពុជា បានឲ្យដឹងថា សេចក្ដីព្រាងច្បាប់នោះមានចំនួន ៣ គឺសេចក្ដីព្រាងច្បាប់ស្ដីពីការគ្រប់គ្រងប្រេងឥន្ធនៈ សេចក្ដីព្រាងច្បាប់ស្ដីពីការយកពន្ធលើអាជីវកម្ម លើប្រេងឥន្ធនៈ និងសេចក្ដីព្រាងច្បាប់ស្ដីពីការយកពន្ធលើប្រាក់ចំណេញលើប្រេងឥន្ធនៈ។
សេចក្ដីព្រាងច្បាប់ទាំងនេះ បានចូលរួមចងក្រងដោយមន្ត្រីជាច្រើនមកពីអាជ្ញាធរជាតិប្រេងកាតកម្ពុជា ក្រសួងសេដ្ឋកិច្ច និងហិរញ្ញវត្ថុ ក្រសួងឧស្សាហកម្ម រ៉ែ និងថាមពល និងក្រសួងបរិស្ថានជាដើម។
ក្រៅពីនេះ មានមន្ត្រីមកពីធនាគារពិភពលោក (World Bank) និងមន្ត្រីមកពីកម្មវិធីអភិវឌ្ឍន៍អង្គការសហប្រជាជាតិ (UNDP) និងអង្គការចាយកា (JICA) របស់ជប៉ុន ជាដើម ចូលរួមផ្ដល់យោបល់លើសេចក្ដីព្រាងច្បាប់សំខាន់នេះ។
តាមសេចក្ដីប្រកាសព័ត៌មានរបស់អាជ្ញាធរជាតិប្រេងកាតកម្ពុជា បានឲ្យដឹងថា ក្រុមហ៊ុនឆីវរ៉ុន របស់សហរដ្ឋអាមេរិក បានខួងរកឃើញអណ្ដូងប្រេងចំនួន ៤កន្លែងនៅបាតសមុទ្រកម្ពុជា នៅខេត្តព្រះសីហនុ នៅប្លុកអេ (Block A)។
ក្រោយមកទៀតអនុប្រធានអាជ្ញាធរប្រេងកាតកម្ពុជា លោក ហូ វិចិត្រ កាលពីថ្ងៃទី១៥ ខែមិថុនា ឆ្នាំ២០១១ កន្លងទៅនេះបានចុះហត្ថលេខាជាមួយប្រធានក្រុមហ៊ុន ខេមបូឌាន ភីត្រូខេមីខល លីមីធីត (Cambodian Petrochemical Company Limited) លោក ហាន់ ឃាង ដើម្បីសិក្សាអំពីលទ្ធភាពសាងសង់រោងចក្រចម្រាញ់ប្រេងនៅកម្ពុជា៕