នាយប៉ុស្តិ៍នគរបាល ឃុំស្រែណូយ លោកអនុសេនីយ៍ទោ ម៉ន ម៉ិច បានមានប្រសាសន៍ ឱ្យដឹង កាលពីព្រឹកថ្ងៃព្រហស្បតិ៍ ថា ឧប្បត្តិហេតុបានកើតឡើង កាលពីវេលាម៉ោង ប្រហែលជា ៩ និង ២៥នាទី យប់ថ្ងៃពុធ បណ្តាលឱ្យបុរសម្នាក់ ស្លាប់ នៅនឹងកន្លែង ២៦នាក់ រងរបួសធ្ងន់ បញ្ជូនទៅកាន់មន្ទីរពេទ្យ ដែលក្នុងចំណោមអ្នករបួសនោះ មានកងទាហាន ៤នាក់ផងដែរ ។
ប៉ុន្តែទោះជាយ៉ាងណា នាយប៉ុស្តិ៍នគរបាលរូបនោះ នៅមិនទាន់ឤចបញ្ជាក់អំពីមូលហេតុ ដែលបណ្តាលឱ្យមានការវាយប្រហារ ដោយគ្រាប់បែកដៃ និងមិនទាន់ឤចបញ្ជាក់ ពីមុខសញ្ញាជនដៃដល់ ក្នុងការវាយប្រហារនោះ នៅឡើយទេ ៖ «រងគ្រោះច្រើន ២៦នាក់ ២៧នាក់ វង់រាំហ្នឹង មុខវត្តយើង... ។ អត់សង្ស័យអ្នកណាផង ព្រោះមនុស្សច្រើនដែរ» ។
មន្ត្រីប៉ូលិសផ្នែកព្រហ្មទណ្ឌ របស់ស្នងការនគរបាល ខេត្តសៀមរាប និងមន្ត្រីយោធាខ្លះ ដែលបានបញ្ជូនទៅពិនិត្យនៅកន្លែងកើតហេតុ មិនបានអធិប្បាយឱ្យដឹង ពីបញ្ហានោះឡើយ ដោយគេនិយាយថា គេកំពុងតែស្វែងរកភស្តុតាង ទាក់ទងនឹងបញ្ហានោះ ។
ចំណែក សាក្សីនៅកន្លែងកើតហេតុ បាននិយាយថា គេពុំបានដឹងពីមូលហេតុ នៃការវាយប្រហារ ដោយគ្រាប់បែកដៃនោះទេ ក៏ប៉ុន្តែហេតុការណ៍នោះ គេបានឃើញមនុស្សជាច្រើន បានរងរបួស ៖ «ងាកមក ឃើញតែផ្សែង ឮឡើងចង់បែកក្រដាសត្រចៀក មនុស្សរត់ពេញហ្នឹង ឃើញគេសែងអង្រឹង ខ្លះត្រូវជើង ត្រូវអីទៅ ស្រែកថ្ងូរពេញហ្នឹង» ។
បុរសឈ្មោះ លឿ ស្វិត ជាជនរងគ្រោះម្នាក់ ដែលរងរបួសដោយការវាយប្រហារនោះ បានមានប្រសាសន៍ថា គាត់ទើបតែ ចូលរាំបានមួយបទ ហើយចេញមកផឹក ទឹកកកឈូស នៅខាងក្រៅវង់ ស្រាប់តែគ្រាប់បែកបានផ្ទុះឡើង ដោយមិនបានដឹងពីមូលហេតុអ្វី មុនពេលកើតហេតុនោះទេ ។
លោក លឿ ស្វិត បានឱ្យដឹងថា ៖ «ខ្ញុំរាំបានមួយបទ មករកផឹកទឹកកក លាន់ខ្លាំង ហ៊ឹងត្រចៀក ខ្ញុំត្រូវ ហើយខ្ញុំហើម... ។ ឤមួយនោះ នៅពីក្រោយខ្ញុំ ឮថាងាប់ អង្គុយលើម៉ូតូ ម្នាក់» ។
យោងតាមការបំភ្លឺ ពីសមត្ថកិច្ចមូលដ្ឋាន មានប៉ូលិស និងប៉េអឹម បានឱ្យដឹងថា មុនពេលមានការវាយប្រហារ ដោយគ្រាប់បែកដៃនោះ កាលពីថ្ងៃ គឺមានជម្លោះ រវាង ក្មេងស្ទាវពីរក្រុម ក៏ប៉ុន្តែ ទោះយ៉ាងណា សមត្ថកិច្ច ហាក់មិនបង្ហាញឱ្យចំៗ នៅឡើយទេ ។ នៅក្បែរ កន្លែងកើតហេតុ ប៉ូលិសបានរកឃើញ ដាវសាម៉ូរ៉ៃមួយ និងច្រវាក់ម៉ូតូ ដែលទំនងជាឧបករណ៍ សម្រាប់វាយប្រហារ របស់ក្រុមស្ទាវ ។
ចំណែកអ្នកភូមិខ្លះ បាននិយាយថា កាលពីពេលថ្ងៃ ពួកទាហាន ដែលមានបន្ទាយ នៅក្បែរនោះ ក៏មានជម្លោះជាមួយនឹងក្រុមក្មេងស្ទាវដែរ ។
អ្នកស៊ើបអង្កេត របស់សមាគមការពារសិទ្ធិមនុស្ស ឤដហុក ខេត្តសៀមរាប លោក សួស ណារិន បានបន្ទោសសមត្ថកិច្ចទីនោះ ថា ធ្វេសប្រហែសសន្តិសុខ នៅពេលដែល ដឹងថា មានជម្លោះកើតឡើងទៅហើយ ។
លោក សួស ណារិន បានមានប្រសាសន៍ថា ៖ «ករណី គប់គ្រាប់បែក នៅកន្លែងរាំវង់ នៅវត្តស្រែណូយហ្នឹង វាជា ការធ្វេសប្រហែសមួយ របស់សមត្ថកិច្ច ដែលគាត់ដឹងថា មានហេតុការណ៍ទំនាស់ នៅពេលថ្ងៃហើយ គាត់នៅតែបណ្តោយឱ្យមានការរាំលេងកម្សាន្ត បន្តនៅយប់ហ្នឹងទៀត ។ ចំណុច ដែលកើតហេតុហ្នឹង ស្ថិតនៅក្នុងតំបន់ការពាររបស់កងទ័ព កងពលលេខ៥ កៀកនឹងបន្ទាយទាហានដែរ មិនគួរឱ្យមានការថ្លោះធ្លោយ ការប្រើប្រាស់ ឤវុធខុសច្បាប់ អីហ្នឹង កើតមានទេ» ។
តាមមន្ត្រីប៉េអឹមមួយរូប ដែលសុំមិនបញ្ចេញឈ្មោះ បានឱ្យដឹងថា គេបានរកឃើញ បំណែកគ្រាប់បែក ធុនប្លាស្ទិក ផលិតនៅប្រទេសវៀតណាម ដែលជនមិនស្គាល់មុខ បានយកទៅប្រើប្រាស់ ក្នុងការវាយប្រហារ លើហ្វូងមនុស្ស បណ្តាលឱ្យស្លាប់ និង របួសជាច្រើននោះ ៕