លោក ស៊ីម ម៉ី ក្នុងចំណោមអ្នកភូមិជាច្រើនគ្រួសារទៀត បានថ្លែងនាព្រឹកថ្ងៃសៅរ៍ ទី២១ ខែវិច្ឆិកា ថា នៅយប់ថ្ងៃសុក្រវេលាម៉ោង១១ មានជនមិនស្គាល់មុខ៣នាក់បានចូលទៅដុតផ្ទះអ្នកភូមិនៅចំណុចខាងលើ ឆេះអស់ចំនួន៣ខ្នង និងបានបាញ់ជាច្រើនគ្រាប់ ហើយស្រែកគំរាមឲ្យអ្នកភូមិដែលមានផ្ទះនៅទីនោះរើចេញ បើមិនព្រមរើទេគេនឹងសម្លាប់ទាំងពូជ។
លោក ស៊ីម ម៉ី បានបញ្ជាក់ថា ៖ «គ្នាវា៣នាក់ ដុតផ្ទះប្រជាជនអស់៣ខ្នង ហើយនិងបាញ់២០គ្រាប់គំរាមប្រជាជន បើថាអត់ចេញពីដីគេទេ យប់ហ្នឹងគេនឹងដុតផ្ទះហើយគេសម្លាប់ទាំងពូជទៀត។ កាំភ្លើង១ដើម អាកា»។
ក្រុមអ្នកភូមិថ្លែងថា មិនមានអ្នកណាម្នាក់ទទួលរងគ្រោះថ្នាក់ពីការដុតបំផ្លាញផ្ទះពីសំណាក់ជនមិនស្គាល់មុខទាំង៣នាក់ខាងលើនេះទេ ដោយសារម្ចាស់ផ្ទះបានទៅដេកកាច់ពោតនៅចម្ការ ៖ «មនុស្សនៅតើ! ប៉ុន្តែគ្រាន់តែថា ដល់ពេលខែកាច់ពោតគ្នាចុះទៅចម្ការ»។
លោក ហែន សុផល អភិបាលស្រុកសំឡូត បានថ្លែងថា លោកបានបញ្ជាឲ្យកម្លាំងប៉ូលិសចុះស្រាវជ្រាវជុំវិញករណីនេះហើយ ប៉ុន្តែនៅមិនទាន់ហ៊ានធ្វើការសន្និដ្ឋានថា ករណីនេះបង្កមកពីបញ្ហាអ្វីទេ។
លោក ហែន សុផល បានមានប្រសាសន៍ថា ៖ «មិនទាន់ច្បាស់ទេ ខ្ញុំមិនទាន់អាចនិយាយបានទេ ទាល់តែឲ្យសមត្ថកិច្ចចុះស្រាវជ្រាវជាក់ស្តែងសិន»។
លោក លី ប៊ួយ អធិការនគរបាលស្រុកសំឡូត បានថ្លែងថា កម្លាំងប៉ូលិសបានចុះធ្វើកំណត់ហេតុរួចរាល់ហើយ ប៉ុន្តែនៅមិនទាន់កំណត់មុខសញ្ញាទេ។
លោក លី ប៊ួយ បានថ្លែងថា ៖ «ផ្ទះហ្នឹងវាអត់មានមនុស្សនៅ ៤(ម៉ែត្រ)គុណនឹង៥ហ្នឹង៣ខ្នង វាដុតហើយថាបាញ់២០គ្រាប់ វាយប់ហើយមើលអត់ឃើញទេ។ ឥឡូវនេះកំពុងឲ្យស្រាវជ្រាវមុខសញ្ញាហ្នឹង ជាទាហាន ឬមួយជាប្រជាពលរដ្ឋ ឬមួយខាងណា?»។
លោក ផឹង ហ៊ន មេឃុំអូរសំរិល ស្រុកសំឡូត បានថ្លែងថា ករណីខាងលើនេះកើតឡើងដោយសារទំនាស់ដីធ្លីជាមួយក្រុមគ្រួសារយោធា។
លោក ផឹង ហ៊ន បានឲ្យដឹងថា ៖ «ដីហ្នឹងមិនមែនពាក់ព័ន្ធជាមួយកងទ័ពទេ វាពាក់ព័ន្ធជាកម្មសិទ្ធិបុគ្គលម្នាក់ពីរនាក់ដែលគ្នាជាយោធិនកាត់រំសាយ ឬក៏បុគ្គលគ្រួសារគាត់ហ្នឹង មិនមែនទ្រង់ទ្រាយធំអង្គភាពទេ!»។
មន្ត្រីសិទ្ធិមនុស្សនៃសមាគមអាដហុក លោក យិន ម៉េងលី បានចាត់ទុកថា ករណីបាញ់និងដុតបំផ្លាញផ្ទះប្រជាពលរដ្ឋនេះទំនងកើតឡើងដោយសារទំនាស់ដីធ្លី។
គួរបញ្ជាក់ថា ទំនាស់ដីធ្លីនៅចំណុចខាងលើនេះកើតមានតាំងពីឆ្នាំ២០០៦ ជាមួយមន្ត្រីយោធា ហើយក្រោយមកនៅឆ្នាំ២០០៧ អ្នកភូមិម្នាក់បានទទួលរងរបួសជាទម្ង ដោយសារការបាញ់ប្រហារពីសំណាក់កូនទាហានរបស់លោក ប៉ែន សាវឿន ដែលគេដឹងថាជាមន្ត្រីយោធានៃយោធភូមិភាគ៥។ ចំណែកឯអាជ្ញាធរស្រុកសំឡូតនិងខេត្តធ្លាប់បានបង្កើតគណៈកម្មការចុះដោះស្រាយទំនាស់ខាងលើនេះដែរ តែមិនមានលទ្ធផល៕