ក្រុមនេះនិយាយថា ធនធានធម្មជាតិ និងបរិស្ថានរបស់ខ្មែរកាន់តែរងការបំផ្លិចបំផ្លាញពីមួយថ្ងៃទៅមួយថ្ងៃ ដែលអាចនាំឲ្យជីវភាពប្រចាំថ្ងៃរបស់ពលរដ្ឋកាន់តែរងទុក្ខវេទនា។
លោក ចច បូឌិន (George Boden) មន្ត្រីអង្គការឃ្លាំមើលពិភពលោក (Global Witness) មាន ប្រសាសន៍ថា រហូតមកទល់ពេលនេះសហគមន៍អន្តរជាតិនៅមិនទាន់ឃើញរដ្ឋាភិបាលកម្ពុជា ធ្វើកិច្ចការរបស់ខ្លួនឲ្យបានត្រឹមត្រូវក្នុងការបង្ហាញដល់ពលរដ្ឋខ្មែរទូទៅ អំពីប្រាក់ចំណូលក្នុងវិស័យធនធានរ៉ែ និងហេតុផលនៃផ្ដល់សម្បទានរ៉ែដល់ក្រុមអ្នកវិនិយោគទាំងឡាយ។
លោក ចច បូឌិន៖ «ចាប់តាំងពីយើងបានឃ្លាំមើលបរិស្ថានរបស់ប្រទេសកម្ពុជា យើងនៅមិនទាន់ឃើញថា រដ្ឋាភិបាលបង្ហាញអំពីកិច្ចខិតខំប្រឹងប្រែងការពារបរិស្ថានរបស់ខ្លួន ហើយថា តើក្រុមហ៊ុនជីកយករ៉ែដែលកំពុងមានវត្តមាននៅកម្ពុជា ទាំងនោះបានទទួល សម្បទានរ៉ែតាមរបៀបណា បញ្ហានេះយើងមិនដែលដឹង។ ម្យ៉ាងទៀតតើក្រុមហ៊ុន និងរដ្ឋាភិបាលមានដែលសុំយោបល់ ឬពិភាក្សាជាពលរដ្ឋម្ចាស់ឆ្នោតអំពីបញ្ហាសម្បទានដែលនាំឲ្យប៉ះទង្គិចដល់ជីវភាពប្រចាំថ្ងៃរបស់ពួកគេដែរ ឬយ៉ាងណា?»។
របាយការណ៍ប្រចាំឆ្នាំរបស់ក្រសួងឧស្សាហកម្ម រ៉ែ និងថាមពល បានចេញផ្សាយកាលពីថ្ងៃសុក្រ ទី៩ ខែមីនា បង្ហាញថា នៅក្នុងឆ្នាំ២០១១ កម្ពុជាបានផ្ដល់សម្បទានរុករ៉ែឲ្យក្រុមហ៊ុនបរទេសចំនួន២៤។ ក្រុមហ៊ុនខ្លះកំពុងជីកយករ៉ែមាសក្នុងខេត្តក្រចេះ និងខេត្តរតនគិរី ហើយមួយចំនួនកំពុងរុករករ៉ែលោហធាតុ និងរ៉ែបុកស៊ីត ក្នុងខេត្តស្ទឹងត្រែង មណ្ឌលគិរី កោះកុង និងក្រុមហ៊ុនខ្លះទៀតកំពុងរាវរករ៉ែធ្យូងថ្ម ក្នុងខេត្តកំពង់ធំ។
លោក ស៊ុយ សែម រដ្ឋមន្ត្រីក្រសួងឧស្សាហកម្ម រ៉ែ និងថាមពល បានថ្លែងនៅក្នុងសន្និសីទប្រចាំឆ្នាំស្ដីពីធនធានរ៉ែ កាលពីថ្ងៃសុក្រ ទី៩ ខែមីនា ហើយដែលត្រូវបានទីភ្នាក់ងារព័ត៌មាន ស៊ីនហួរ ចុះផ្សាយថា លោកបានទូន្មានដល់ក្រុមមន្ត្រីក្រោមឱវាទរបស់លោកធ្វើកិច្ចការរបស់ខ្លួនឲ្យបានជិតស្និទ្ធជាមួយក្រុមហ៊ុនរុករករ៉ែទាំងនោះ ហើយធានាឲ្យបានច្បាស់ថា សកម្មភាពរបស់ពួកគេត្រូវធ្វើឡើងស្របទៅតាមច្បាប់។
លោក ស៊ុយ សែម ថ្លែងថា ការអភិវឌ្ឍខាងផ្នែកធនធានរ៉ែ គឺជាអាទិភាពខ្ពស់របស់រដ្ឋាភិបាល ហើយថា ដើម្បីទាក់ទាញក្រុមវិនិយោគទុនឲ្យបានច្រើន វាសំខាន់ណាស់ដែលកម្ពុជា ត្រូវពង្រឹងភាពជាដៃគូជាមួយក្រុមវិនិយោគទុន និងត្រូវពង្រឹងការអនុវត្តច្បាប់ ឬកិច្ចព្រមព្រៀងនានា។
ផ្ទុយទៅវិញប្រធានអង្គការការពារធនធានធម្មជាតិ លោក ឈុត វុទ្ធី បានរិះគន់ថា កិច្ចខំប្រឹងប្រែងរបស់រដ្ឋាភិបាលក្នុងការការពារបរិស្ថានរបស់ខ្លួន គឺបានធ្លាក់ដល់ចំណុចសូន្យ ហើយថា ក្រុមហ៊ុនបរទេសទាំងនោះកំពុងតែលក់វត្ថុធាតុដើមរបស់ខ្មែរតែម្ដង។
លោក ឈុត វុទ្ធី បន្តថា សូម្បីរហូតមកទល់ពេលនេះរដ្ឋាភិបាលនៅមិនទាន់បានដាក់ឲ្យក្រុមហ៊ុនវិនិយោគនានា ដេញថ្លៃជាសាធារណៈនូវសម្បទានរ៉ែទាំងនោះនៅឡើយទេ ហើយដែលបញ្ហានេះកាន់តែធ្វើឲ្យកម្ពុជា ខាតបង់ទ្រព្យធនរបស់ខ្លួនយ៉ាងធំធេង។
លោកបន្តថា ការដាក់ឲ្យដេញថ្លៃសម្បទានរ៉ែនេះមានសារសំខាន់ណាស់សំរាប់រដ្ឋាភិបាលក្នុងការរកតម្លៃខ្ពស់លើសម្បទាននីមួយៗ និងជាការបង្ហាញតម្លាភាពសង្គម ដើម្បីជៀសវាងនូវអំពើពុករលួយរបស់ក្រុមមន្ត្រីរដ្ឋាភិបាលជាមួយនឹងក្រុមឈ្មួញ។
របាយការណ៍របស់អង្គការឃ្លាំមើលផលប៉ះពាល់បរិស្ថានសង្គមពីឧស្សាហកម្ម រ៉ែ បង្ហាញថា រដ្ឋាភិបាលកម្ពុជា កាលពីខែធ្នូ ឆ្នាំ២០១១ បានផ្ដល់អាជ្ញាប័ណ្ណដល់ក្រុមហ៊ុនខ្មែរ និងក្រុមហ៊ុនបរទេសចំនួន ១២៨ ឲ្យមានសិទ្ធិរាវរករ៉ែ។ ក្រុមហ៊ុនបរទេសទាំងនោះមានចិន វៀតណាម ថៃ កូរ៉េ ជប៉ុន សិង្ហបុរី អូស្រ្តាលី សហរដ្ឋអាមេរិក និងក្រុមហ៊ុនបារាំង ជាដើម៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។