ក្នុងការទប់ស្កាត់ជំងឺឆ្លងផ្ដាសាយបក្សី H5N1 លោក លី សូវ៉ាន់ អនុប្រធានការពារជំងឺឆ្លង នៃក្រសួងសុខាភិបាល កាលពីល្ងាចថ្ងៃពុធ ទី៦ ខែមេសា បានអំពាវនាវឲ្យពលរដ្ឋខ្មែរទាំងអស់បង្កើនការប្រុងប្រយ័ត្នក្នុងសកម្មភាពទាំងឡាយណាដែលប៉ះពាល់ដល់សត្វស្លាបមាន មាន់ ទា ជាដើម។ លោកថា ជាពិសេសនៅក្នុងឱកាសបុណ្យចូលឆ្នាំខ្មែរខាងមុខនេះ ដោយហេតុថា មានសត្វបក្សីដឹកចុះដឹកឡើងពីកន្លែងមួយទៅកន្លែងមួយ ដើម្បីយកទៅលក់ និងធ្វើម្ហូបអាហារ។
លោក លី សូវ៉ាន់ មានប្រសាសន៍បន្ថែមថា ៖ «ជំងឺផ្ដាសាយបក្សីតែងកើតក្នុងរវាងខែ១២ រហូតដល់ខែមេសា ពីព្រោះរយៈពេលហ្នឹងយើងមានបុណ្យទានច្រើន...។ បើបងប្អូនមានមាន់ឈឺ ឬងាប់ សូមរាយការណ៍ជាបន្ទាន់ ឬកុំយកមាន់ ទា ងាប់យកមកធ្វើជាអាហារ ត្រូវកប់ចោល។ បើមានរោគសញ្ញាគ្រុនក្ដៅលើសពី ៣៨អង្សា មានក្អក ឈឺក ឬមានសញ្ញាហត់ គួរគិតថា តើមានប៉ះពាល់បក្សីឬអត់? បើសិនជាមានសូមទៅមណ្ឌលសុខភាព ឬមន្ទីរពេទ្យដែលជិតបំផុត ដើម្បីព្យាបាល...។ ព័ត៌មានបន្ថែមសូមទាក់ទងមកលេខ ១១៥»។
កាលពីថ្ងៃទី៣១ ខែមីនា ថ្មីៗនេះ ជំងឺផ្ដាសាយបក្សីបានសម្លាប់កុមារីម្នាក់ទៀតអាយុ ១១ឆ្នាំ ដែលមានទីលំនៅ នៅភូមិក្បាលអូរ ស្រុកស្ទឹងត្រង់ ខេត្តកំពង់ចាម។
កុមារីដែលបានស្លាប់នោះ ធ្លាក់ខ្លួនឈឺនៅថ្ងៃទី២២ ខែមីនា។ ដំបូងនាងត្រូវបានគ្រូពេទ្យក្នុងភូមិពិនិត្យព្យាបាល និងនៅថ្ងៃទី២៩ ខែមីនា ត្រូវបានបញ្ជូនទៅមន្ទីរពេទ្យបង្អែក ប៉ុន្តែពុំបានធូរស្រាល។ នៅថ្ងៃទី៣១ មីនា ក៏បានត្រូវបញ្ជូនទៅកាន់មន្ទីរពេទ្យអង្គរ ខេត្តសៀមរាប ទីដែលនាងបានស្លាប់ក្នុងរយៈពេល ៤ម៉ោងក្រោយមក។
លោក លី សូវ៉ាន់ អនុប្រធានការពារជំងឺឆ្លងមានប្រសាសន៍ថា កុមារីដែលស្លាប់នោះពិតជាបានប៉ះពាល់បក្សីនៅមុនពេលមានជំងឺនោះមែន ហើយអ្នកជំងឺបានបង្ហាញពីការរលាកសួតធ្ងន់ធ្ងរ ទើបគ្រូពេទ្យឯកជនពុំអាចព្យាបាលបាន ហើយបានបញ្ជូនមកមន្ទីរពេទ្យអង្គរនេះ។
លោក លី សូវ៉ាន់ បានបន្ថែមទៀតថា ដោយសារតែរោគសញ្ញានៃជំងឺផ្ដាសាយបក្សីហ្នឹងមានលក្ខណៈប្រហាក់ប្រហែលទៅនឹងជំងឺរលាកសួត ឬក៏ជំងឺផ្លូវដង្ហើមដទៃទៀតដែរ ដូច្នេះលោកសុំឲ្យគ្រូពេទ្យទាំងអស់សាកសួរអ្នកជំងឺអំពីប្រវត្តិប៉ះពាល់នឹងសត្វបក្សី។
កុមារីដែលបានស្លាប់ចុងក្រោយនេះ នាងគឺជាអ្នកជំងឺទី១៤ហើយ ដែលបានឆ្លងជំងឺគ្រុនផ្ដាសាយបក្សី H5N1 នៅក្នុងប្រទេសកម្ពុជា ហើយនាងក៏ជាមនុស្សទី១០ ដែលបានស្លាប់ដោយសារជំងឺគ្រុនផ្ដាសាយបក្សីនេះ៕