មន្ត្រីខ្មែរដែលជាអ្នករៀបចំការរត់ប្រណាំងកីឡាម៉ារ៉ាតុងនេះ បានឲ្យដឹងថា ក្នុងចំណោមកីឡាករបរទេសជាង ១.៨០០នាក់ដែលមកចូលរួមលើកនេះ គឺភាគច្រើនមកពីប្រទេសជប៉ុនដែលរៀបចំដោយអង្គការបេះដូងមាសរបស់ជប៉ុន មកពីប្រទេសអង់គ្លេស សហរដ្ឋអាមេរិក និងប្រទេសជាច្រើនទៀតក្នុងតំបន់អាស៊ី។
លោក ថោង ខុន រដ្ឋមន្ត្រីក្រសួងទេសចរណ៍នៃប្រទេសកម្ពុជា និងជាប្រធានគណៈកម្មការកីឡាអូឡាំពិកជាតិកម្ពុជា បានមានប្រសាសន៍ថា កីឡាករបរទេសដែលមកចូលរួមការរត់ប្រណាំងម៉ារ៉ាតុងនេះ គឺគេចូលរួមគាំទ្រចំពោះការអភិវឌ្ឍប្រទេសកម្ពុជានិងប្រជាពលរដ្ឋខ្មែរ ហើយចលនានេះសំខាន់មិនត្រឹមតែពង្រឹងមិត្តភាពជាមួយពិភពលោកទាំងមូលនោះទេ គឺជាមិត្តភាពរវាងប្រទេសជប៉ុននិងប្រទេសនៃតំបន់ទន្លេមេគង្គផងដែរ។
លោក ថោង ខុន បានបញ្ជាក់ថា ៖ «គឺជាព្រឹត្តិការណ៍កីឡាទេសចរណ៍មួយ ដែលរួមចំណែកយ៉ាងសំខាន់ទៅដល់ការឃោសនានិងអភិវឌ្ឍវិស័យទេសចរណ៍កម្ពុជាយើង ដែលយើងកំពុងតែធ្វើយុទ្ធនាការឃោសនាកម្ពុជា "ព្រះរាជាណាចក្រអច្ឆរិយ" ជាមួយនឹងពាក្យស្លោក "ទីក្រុងស្អាត រមណីយដ្ឋានស្អាតនិងសេវាកម្មល្អ"»។
លោក ស៊ូ ភិរិន្ទ អភិបាលខេត្តសៀមរាប បានថ្លែងទៅកាន់ក្រុមកីឡាករចម្រុះជាតិសាសន៍ ដោយចាត់ទុកកីឡាមានសារប្រយោជន៍ និងជាលំហាត់ប្រាណដែលជនជាតិខ្មែរនិយមចូលចិត្តគ្រប់ទីកន្លែងនិងគ្រប់សម័យកាល ដោយនៅតាមជញ្ជាំងប្រាសាទបូរាណមានចារទុកជាភស្តុតាងស្រាប់។
លោក ស៊ូ ភិរិន្ទ បានថ្លែងថា ៖ «ខ្ញុំយល់ថា ព្រឹត្តិការណ៍រត់ប្រណាំងអន្តរជាតិ ពាក់កណ្តាលម៉ារ៉ាតុងនេះ នឹងក្លាយទៅជាបេះដូងព្រលឹងមួយថ្មីថែមទៀតសម្រាប់ដាស់សតិអារម្មណ៍ពលរដ្ឋទូទាំងពិភពលោក ពលរដ្ឋខ្មែរ»។
កីឡាករជនជាតិខ្មែរម្នាក់ដែលដណ្តើមបានចំណាត់ថ្នាក់លេខ២ បន្ទាប់ពីជនជាតិម៉ាឡេស៊ី គឺលោក ម៉ុក ប៊ុនធឿន បានសម្ដែងការរីករាយក្នុងការរត់ប្រណាំងម៉ារ៉ាតុងអន្តរជាតិនេះ ៖ «កីឡាពិតជាអស្ចារ្យ! ខ្ញុំចូលរួមរាល់តែឆ្នាំ សប្បាយចិត្តណាស់! ខ្ញុំមានកម្លាំងហាត់តទៅទៀត»។
មន្ត្រីក្រសួងទេសចរណ៍នៃប្រទេសកម្ពុជាបានមានប្រសាសន៍ថា ការខិតខំប្រឹងប្រែងរបស់រដ្ឋាភិបាលខ្មែរតាមរយៈការប្រកួតកីឡានិងមធ្យោបាយឃោសនាទាក់ទាញទេសចរបរទេសឲ្យចូលមកទស្សនាកម្ពុជា បើទោះបីជាប្រទេសជាច្រើនក្នុងពិភពលោកកំពុងធ្លាក់ចុះចំនួនទេសចរបណ្តាលពីផលប៉ះពាល់នៃវិបត្តិហិរញ្ញវត្ថុពិភពលោកក៏ដោយ ក៏កម្ពុជាបានទទួលរងផលប៉ះពាល់តិចតួចប៉ុណ្ណោះ។
លោក ថោង ខុន បានរំពឹងថា ក្នុងឆ្នាំ២០០៩នេះ ទេសចរបរទេសចូលមកកម្ពុជានឹងមានចំនួនប្រមាណ ២លាន២០ម៉ឺននាក់ ដែលចំនួននេះនឹងមានការកើនឡើងប្រហែលពី ២% ទៅ ៣% បើប្រៀបធៀបនឹងឆ្នាំ២០០៨កន្លងមក៕