យុទ្ធនាការនេះ មានការចូលរួមពីលោកគ្រូ អ្នកគ្រូ សិស្សានុសិស្ស ដៃគូអភិវឌ្ឍន៍ និងស្ថាប័នពាក់ព័ន្ធ ដែលមានប្រមាណ ៦០០នាក់។
ក្រសួងសុខាភិបាល បានបង្កើនថវិកា ៣០% លើសពីឆ្នាំចាស់ ដើម្បីទប់ទល់ទៅនឹងការរីករាលដាលជំងឺគ្រុនឈាម។ ការបង្កើនថវិកានេះជាការឆ្លើយតបទៅនឹងក្ដីព្រួយបារម្ភ ចំពោះការព្យាកររបស់អ្នកជំនាញថា នៅឆ្នាំ២០១២ នេះ ជាឆ្នាំស្ថិតក្នុងភាពប្រកាសអាសន្នមួយសម្រាប់ជំងឺគ្រុនឈាម។
នាយកមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ បាណកសាស្ត្រ នៃក្រសួងសុខាភិបាល លោកវេជ្ជបណ្ឌិត ច ម៉េងចួ មានប្រសាសន៍ថា ហេតុផលសំខាន់នាំឲ្យមានការរាតត្បាតជំងឺគ្រុនឈាមនៅឆ្នាំ២០១២នេះ ដូចជា កម្ពស់ទឹកភ្លៀងមានការកើនឡើង ដង់ស៊ីតេមូសខ្លាជាភ្នាក់ងារចម្លងជំងឺគ្រុនឈាមក៏មានការកើនឡើង និងហេតុផលផ្សេងទៀត។
លោកថា ករណីបានតម្រូវឲ្យក្រសួងត្រូវការថវិកាចំនួន២លាន២សែនដុល្លារសម្រាប់ការងារប្រឆាំងជំងឺគ្រុនឈាម៖ «ដោយសារហានិភ័យដែលខ្ញុំបញ្ជាក់បួនចំណុចហើយ យើងត្រូវត្រៀមមុនប្រសើរជាងចាំដល់ពេលមានឆ្លងច្រើនហើយគឺពិបាកទប់ណាស់។ សំខាន់ទី១ ការចូលរួមរបស់គ្រួសារនីមួយៗ ពីព្រោះជំងឺគ្រុនឈាមវាកើតដោយសារមូសខ្លាខាំ។ បំបាត់ជម្រកមូសខ្លា បំបាត់ដង្កូវទឹកគឺបំបាត់នៅតាមផ្ទះ។ អ៊ីចឹងខ្ញុំជូនដំណឹងមុន យើងចាប់ផ្ដើមផ្សាយពីហានិភ័យនោះ រកឃើញភ្លាមគឺផ្សាយជូនសារព័ត៌មានទាំងអស់»។
លោកវេជ្ជបណ្ឌិត ច ម៉េងចួ បញ្ជាក់ថា ក្នុងថវិកាសរុបនោះ មាន ៥០% ជាថវិកាជាតិ ៣៥% ជាគម្រោងថវិកាទ្រទ្រង់វិស័យសុខាភិបាលដែលមានដៃគូចំនួន៦ ក្នុងនោះមានធនាគារពិភពលោក និង ១៥% ផ្សេងទៀតជាថវិការបស់ធនាគារអភិវឌ្ឍន៍អាស៊ី។
ការថ្លែងនេះ នៅក្នុងយុទ្ធនាការផ្សព្វផ្សាយប្រយុទ្ធជំងឺគ្រុនឈាម នៅថ្ងៃទី១៩ មេសា ឆ្នាំ២០១២ នៅសាលាបឋមសិក្សាភ្នំពេញថ្មី ក្នុងខណ្ឌសែនសុខ រាជធានីភ្នំពេញ។ ក្រោមប្រធានបទ បង្ការជំងឺគ្រុនឈាម ជាកាតព្វកិច្ចរបស់យើងគ្រប់ៗរូប។
នៅ១៤សប្ដាហ៍ដើមឆ្នាំ២០១២ ជំងឺគ្រុនឈាមបានសម្លាប់កុមារចំនួន ៨នាក់ និងមានកុមារ ១.៣៩៣នាក់កើតជំងឺនេះ។ បើប្រៀបធៀបរយៈពេលដូចគ្នាឆ្នាំ២០១១ ជំងឺគ្រុនឈាមបានសម្លាប់កុមារចំនួន ៤នាក់ និងមានកុមារកើតជំងឺនេះចំនួន ៣៣៩នាក់។ មានន័យថា ជំងឺគ្រុនឈាមបានកើនជាង៣០០% ឬមានន័យថា កើនឡើងបីដង បើប្រៀបធៀបនឹងឆ្នាំ២០១១។
ពាក់ព័ន្ធបញ្ហានេះ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល ថ្លែងថា គឺប្រើប្រាស់ទៅលើការផ្សព្វផ្សាយព័ត៌មាន ការបង្កើនថ្នាំអាបេត (Abet) ចែកជូនពលរដ្ឋ និងពង្រឹងប្រព័ន្ធសុខាភិបាលនៅតាមមូលដ្ឋានដើម្បីបន្តព្យាបាលជូនពលរដ្ឋ៖ «ការសំខាន់បំផុតគឺការឲ្យសារព័ត៌មានទៅប្រជាពលរដ្ឋ ឲ្យចូលរួមឲ្យបានមុន គាត់បានដឹមុនគាត់ដឹងត្រៀមលក្ខណៈជាស្រេច ឲ្យយល់ពីបញ្ហាថាវានឹងផ្ទុះជំងឺគ្រុនឈាម នៅរដូវវស្សានេះហើយ។ សំខាន់បំផុតគ្រុនឈាមគឺការដែលគ្រួសារនីមួយៗ យល់ដឹងឲ្យបានច្បាស់អំពីការការពារជំងឺគ្រុនឈាម ហើយប្រតិបត្តិទៅតាមការណែនាំរបស់ក្រសួងសុខាភិបាល»។
ប្រជាពលរដ្ឋដែលបានឃើញយុទ្ធនាការរបស់ក្រសួងសុខាភិបាលប្រយុទ្ធជំងឺគ្រុនឈាម នៅក្នុងសង្កាត់ភ្នំពេញថ្មីនោះ បានសម្ដែងក្ដីបារម្ភចំពោះការរាតត្បាតនៃមេរោគនេះ ពីព្រោះសមាជិកក្នុងគ្រួសារពួកគេសុទ្ធតែបានឆ្លងកាត់ជំងឺនេះ៖ «ជំងឺគ្រុនឈាមនេះសាហាវ ដែលកើតលើប្អូនផ្ទាល់ ពេលដែលគាត់មានជំងឺគ្រុនឈាមហ្នឹង គាត់ក្ដៅខ្លួនហើយ ងុយគេង ចេះតែអ៊ីចឹងទៅមានការសង្ស័យយកគាត់ទៅមន្ទីរពេទ្យទាន់។ គិតថា ជំងឺហ្នឹងវាសាហាវវាសម្លាប់ក្មេង។ មិនថាតែក្មេងទេ ប្អូនខ្ញុំអាយុចង់ម្ភៃនៅមានគ្រុនឈាម។ ធ្ងន់ដែរបើទុកដល់តែមួយថ្ងៃល្ងាចទៀតដឹងតែថា ពេទ្យថាឈាមឡើងខាប់ហើយ។ ខ្ញុំអារឿងគ្រុនឈាមនេះ បើចំពោះកូនខ្ញុំ ខ្ញុំប្រយ័ត្នតាំងពីព្រៃខាងៗផ្ទះខ្ញុំកាប់ចោល ទឹកដក់ ខ្ញុំលុប។ ខ្ញុំមិនដែលឲ្យកូនខ្ញុំដេកក្រៅមុងផង»។
នៅលើសាកលលោកពុំទាន់រកឃើញនូវថ្នាំបង្ការ ឬវ៉ាក់សាំង និងថ្នាំសម្លាប់មេរោគគ្រុនឈាមនេះនៅឡើយទេ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។