ប្រធាននាយកដ្ឋានផលិតកម្មនិងបសុព្យាបាលនៃក្រសួងកសិកម្ម លោក កៅ សុផល មានប្រសាសន៍ថា ថ្វីត្បិតតែប្រទេសកម្ពុជាពុំទាន់មានសញ្ញាណាមួយដែលបង្ហាញពីវត្តមាននៃជំងឺគ្រុនផ្តាសាយបក្សីក៏ដោយចុះតែក្រសួងកសិកម្មបានរៀបចំយ៉ាងប្រុងប្រយ័ត្នក្នុងការបង្ការនិងការពារចំពោះជំងឺដ៏កាចសាហាវនេះ។ លោកបន្តថា តាមការស្រាវជ្រាវគេរកឃើញថា ជំងឺគ្រុនផ្តាសាយបក្សីតែងកើតមាននៅរដូវរងា។
លោក កៅ សុផល បានឲ្យដឹងថា ៖ «ផ្ដាសាយបក្សីតែងតែកើតមាននៅក្នុងរដូវត្រជាក់ ពីព្រោះជំងឺផ្ដាសាយ ដូចយើងផ្ដាសាយមនុស្សអ៊ីចឹងដែរ បង្កឡើងដោយវីរុស។ អ៊ីចឹងយើងបានធ្វើសេចក្ដីណែនាំដើម្បីផ្សព្វផ្សាយជូនដល់មន្រ្តីរបស់យើង ពិសេសឲ្យជំរុញនូវភ្នាក់ងារក្នុងភូមិហ្នឹង គឺថាលោកចុះអង្កេតស្រាវជ្រាវមើលបញ្ហាកន្លែងដែលមានបក្សី»។
លោក កៅ សុផល ក៏បានអំពាវនាវផងដែរឲ្យអាជ្ញាធរមានសមត្ថកិច្ចតាមច្រកព្រំដែនបង្កើនការយកចិត្តទុកដាក់ខ្ពស់ចំពោះការនាំចូលនូវស៊ុតនិងសត្វស្លាបគ្រប់ប្រភេទពីប្រទេសដែលមានព្រំដែនជាប់នឹងប្រទេសកម្ពុជា ជាពិសេសគឺប្រទេសថៃ។
ក៏ប៉ុន្តែទាំងប៉ូលិសនិងគយច្រកព្រំដែនប៉ោយប៉ែតប្រាប់វិទ្យុអាស៊ីសេរីនៅរសៀលថ្ងៃ១៨ វិច្ឆិកា ថា ច្រើនខែកន្លងមកនេះលោកពុំឃើញមានការនាំចូលស៊ុតនិងសត្វស្លាបតាមច្រកនេះទេ ៖ «តាមច្រកប៉ោយប៉ែតដូចអត់ឃើញមានពងមាន់អី មានតែផ្លែឈើ ហើយមានត្រីអី មាន់ ទា មិនដែលចូលតាមខាងខ្ញុំទេ»។
ប្រភពព័ត៌មានបរទេសបានឲ្យដឹងថា នៅឯប្រទេសថៃនិងប្រទេសម៉ាឡេស៊ី ករណីជំងឺគ្រុនផ្តាសាយបក្សីកំពុងកើតមានឡើងក្នុងប៉ុន្មានខែនេះ។
អនុប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល វេជ្ជបណ្ឌិត លី សុវណ្ណ មានប្រសាសន៍ថា ក្រសួងសុខាភិបាលបានត្រៀមលក្ខណៈជាស្រេចក្នុងការប្រយុទ្ធប្រឆាំងនឹងជំងឺនេះ។
លោកវេជ្ជបណ្ឌិត លី សុវណ្ណ បានមានប្រសាសន៍ថា ៖ «បើសិនជាមានករណីផ្ដាសាយច្រើន... សូមអញ្ជើញទៅមន្ទីរពេទ្យ ហើយរាយការណ៍ជាបន្ទាន់ បើករណីកើតជាបណ្ដុំ ខុសធម្មតាច្រើន ហើយទូរស័ព្ទមកទំនាក់ទំនងរាយការណ៍ទៅមន្រ្តីសុខាភិបាលនៅគ្រប់ស្រុកប្រតិបត្តិ ខេត្តក្រុងទាំងអស់ ឬមួយទំនាក់ទំនងផ្ទាល់មកលេខទូរស័ព្ទ ខ្សែទី១ ០១២ ៤៨៨ ៩៨១ និងមួយទៀត ០១២ ៨៨៦ ៨៦៨»។
គួរបញ្ជាក់ផងដែរថា ប្រទេសកម្ពុជាក្នុងឆ្នាំ២០០៨នេះមិនទាន់មានការប្រកាសអាសន្នពីជំងឺគ្រុនផ្តាសាយបក្សីរាតត្បាតនៅឡើយទេ។ តែចន្លោះពីឆ្នាំ២០០៥ ដល់ឆ្នាំ២០០៧ ជំងឺនេះធ្លាប់បានសម្លាប់មនុស្សចំនួន៧នាក់។ ហើយសត្វមាន់និងទាជាច្រើនពាន់ក្បាលត្រូវបានសម្លាប់នៅខេត្តកំពត ព្រៃវែង កំពង់ស្ពឺ កំពង់ចាមជាដើម ហើយបើតាមរបាយការណ៍កាសែតក្នុងស្រុករបស់ថៃការផ្ទុះនូវជំងឺគ្រុនផ្តាសាយបក្សីចាប់តាំងពីឆ្នាំ២០០៤ និងករណីថ្មីៗនេះផងដែរ បានបណ្តាលឲ្យពលរដ្ឋថៃចំនួន១៧នាក់ស្លាប់៕