ទោះយ៉ាងណាក្ដី យូ.អេស.អេ.អាយ.ឌី នៅតែផ្ដោតការយកចិត្តទុកដាក់ ទៅលើផ្នែកថែទាំសុខភាព ក្នុងគោលបំណងកាត់បន្ថយអត្រាស្លាប់របស់មាតា និងទារក នៅក្នុងកម្ពុជា ឱ្យថយចុះក្នុងកម្រិតទាប ដោយសមស្របទៅនឹងយុទ្ធសាស្ត្រកាត់បន្ថយភាពក្រីក្រផងដែរ។
រដ្ឋាភិបាលសហរដ្ឋអាមេរិក បានផ្ដល់ជំនួយប្រមាណ ៣៦ ម៉ឺនដុល្លារ តាមរយៈទីភ្នាក់ងារសហរដ្ឋអាមេរិក ដើម្បីអភិវឌ្ឍន៍អន្តរជាតិ (USAID) ដោយសាងសង់មណ្ឌលសុខភាពមួយ នៅបឹងទន្លេសាប ក្នុងសង្កាត់ចុងឃ្នាស ក្រុងសៀមរាប ដើម្បីព្យាបាលវះកាត់ និងសម្រាលកូន ដល់ប្រជាពលរដ្ឋក្រីក្រជាង ៦ ពាន់នាក់ ដែលកំពុងរស់នៅលើភូមិបណ្ដែតទឹក។
អាគារមណ្ឌលសុខភាពថ្មី ដែលមានកម្ពស់ ២ ជាន់ និងបំពាក់ទៅដោយបរិក្ខារពេទ្យ ប្រព័ន្ធច្រោះទឹកស្អាត ប្រព័ន្ធអគ្គិសនី និងថាមពលពន្លឺព្រះអាទិត្យផងនោះ បានបើកសម្ពោធដាក់ឱ្យប្រើប្រាស់ កាលពីព្រឹកថ្ងៃចន្ទទី ៣ ខែធ្នូ។
លោក ហ៊្វ្លីន ហ៊្វូលើ (Flyn Fuller) ជាប្រធានបេសកកម្ម ទីភ្នាក់ងារសហរដ្ឋអាមេរិក ដើម្បីអភិវឌ្ឍន៍អន្តរជាតិ (USAID) ប្រចាំកម្ពុជា។ លោកថ្លែងនៅក្នុងការបើកសម្ពោធឱ្យប្រើប្រាស់មណ្ឌលសុខភាពនោះថា យើងកំពុងធ្វើឱ្យកម្ពុជា ធ្វើដំណើរឆ្ពោះទៅរកសុខភាពល្អ ហើយអាគារមណ្ឌលសុខភាពដ៏ល្អមួយនេះ នឹងជួយទប់ស្កាត់អត្រាស្លាប់របស់មាតា និងកុមារកម្ពុជាផងដែរ។
លោក ហ៊្វ្លីន ហ៊្វូលើ៖ «យើងដឹងថា ប្រជាពលរដ្ឋ ដែលមានសុខភាពល្អ គឺជាប្រជាពលរដ្ឋម្នាក់ ដែលសកម្ម និងរស់រវើក។ មានន័យថា ភាពក្រីក្របានកាត់បន្ថយ ហើយការអប់រំកាន់តែប្រសើរឡើង។បន្ថែមលើនេះ ការមានជីវិតប្រសើរឡើង គឺជារឿងសាមញ្ញ ដែលមនុស្សម្នាក់ៗ តែងចង់បាន»។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលកម្ពុជា មានប្រសាសន៍ថា ពេលបច្ចុប្បន្ន តាមគោលដៅអភិវឌ្ឍន៍សហស្សវត្សរបស់រដ្ឋាភិបាល គឺបានកាត់បន្ថយអត្រាមរណៈរបស់មាតា និងទារកជាច្រើន។ ក៏ប៉ុន្តែទោះយ៉ាងណាក៏ដោយ ក្រសួងសុខាភិបាលនឹងជំរុញឱ្យការបម្រើសេវាសុខភាពសាធារណៈ បានកាន់តែប្រសើរថែមទៀត ដើម្បីឱ្យអត្រាស្លាប់របស់មាតា និងកុមារ បានថយចុះនៅកម្រិតទាបបំផុត។ លោកវេជ្ជបណ្ឌិត ម៉ម ប៊ុនហេង បញ្ជាក់ថា ចិត្តរបស់លោក មិនចង់ឱ្យមាតា និងកុមារណាម្នាក់ស្លាប់ នៅពេលមានផ្ទៃពោះនោះឡើយ ហើយមណ្ឌលសុខភាពថ្មីមួយ ដែលកើតឡើងនៅតំបន់ចុងឃ្នាស គឺមានសារសំខាន់ជាខ្លាំង សម្រាប់ព្យាបាលជំងឺជូនប្រជាពលរដ្ឋនៅទីជនបទនេះ។
វេជ្ជបណ្ឌិត ម៉ម ប៊ុនហេង៖ «នេះគឺជាសមិទ្ធផលរបស់បងប្អូនទាំងអស់គ្នា។ ពេទ្យនេះ ក៏ជាពេទ្យរបស់បងប្អូនដែរ។ សូមឱ្យបងប្អូនប្រើប្រាស់ពេទ្យរបស់យើង។ ខ្ញុំសូមឱ្យពេទ្យរបស់យើងមេត្តាយកចិត្តទុកដាក់ ចំពោះបងប្អូនប្រជាពលរដ្ឋ គិតជួយដល់បងប្អូន ដែលខ្វះខាត។ លើកលែងការបង់ថ្លៃ ការផ្ដល់មូលនិធិសមធម៌។ ធ្វើយ៉ាងម៉េច កុំឱ្យមានបញ្ហាដល់បងប្អូនយើង ដែលថាខ្វះខាត ហើយមិនហ៊ានមកពេទ្យ»។
អង្គការសម្ព័ន្ធសុខភាពកុមារ និងសុខភាពបន្តពូជ រ៉ាចា (RACHA) ដែលជាដៃគូអនុវត្តន៍គម្រោងសាងសង់មណ្ឌលសុខភាពចុងឃ្នាសនោះ បានឱ្យដឹងថា បន្ទាប់ពីមណ្ឌលសុខភាពបានសាងសង់រួចរាល់មក គឺគេបានទទួលប្រជាពលរដ្ឋប្រមាណ ៦០០ ករណី ដែលមកទទួលសេវាពិនិត្យជំងឺ និងព្យាបាល ក្នុង ១ ខែៗ។ ជាមួយគ្នានោះ មណ្ឌលសុខភាពបានផ្ដល់សេវាការពារ និងព្យាបាលជំងឺ ដោយឥតគិតថ្លៃ សម្រាប់ការវះកាត់ សម្រាលកូន ការដាក់កងពន្យារកំណើត ប្រហែលពី ១០០ ទៅ ២០០ ករណីក្នុង ១ ខែៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។