ទឹកភ្លៀងជន់លិចពីប្រទេសថៃ បានស្រកចុះទៅជាបណ្ដើរហើយ ប៉ុន្តែ នៅពេលទឹកស្រក ភាពកង្វក់នឹងកើតមានច្រើន ដូច្នេះហើយការថែទាំអនាម័យ និងការរស់នៅស្អាត ជាកត្តាសំខាន់ដើម្បីចៀសវាងការកើតមានជំងឺផ្សេងៗ។
មន្ត្រីសុខាភិបាលបានអំពាវនាវសុំឲ្យប្រជាពលរដ្ឋដែលរងគ្រោះដោយសារជំនន់ទឹកភ្លៀងពីប្រទេសថៃ មានការប្រុងប្រយ័ត្ន និងចេះថែរក្សាអនាម័យ ដើម្បីចៀសវាងការកើតមានជំងឺផ្សេងៗ ជាពិសេសទៅលើក្មេង។
ការដាស់តឿននេះ បានធ្វើឡើងស្របពេលដែលទឹកជន់លិចពីប្រទេសថៃ បានស្រកចុះ និងមានប្រជាពលរដ្ឋមួយចំនួនកើតមានជំងឺរមាស និងជំងឺរាគ ដែលបណ្ដាលមកពីការប្រើប្រាស់ទឹកមិនស្អាត។
ប្រធានមន្ទីរសុខាភិបាលខេត្តបន្ទាយមានជ័យ លោក កែវ សុភ័ត្រា បានមានប្រសាសន៍នៅថ្ងៃសៅរ៍ ទី២៩ ខែកញ្ញា ថា គិតពីថ្ងៃទី១៥ ខែកញ្ញា រហូតមកដល់ពេលនេះ ជំនន់ទឹកភ្លៀងដែលជន់ពីប្រទេសថៃ លិចស្រុក ក្រុង ក្នុងខេត្តបន្ទាយមានជ័យ បានស្រកចុះបន្តិច ប៉ុន្តែ គេមានការព្រួយបារម្ភលើបញ្ហាសុខភាពរបស់ប្រជាពលរដ្ឋ៖ «ជាទូទៅ នៅពេលទឹកសម្រក យើងមានការព្រួយបារម្ភច្រើន ព្រោះយើងដឹងហើយថា ក្រោយពីទឹកសម្រកទៅ វាសត្វធាតុ ទីធ្លា វាបែកភក់ អ៊ីចឹងទៅ វាអាចបង្ករោគច្រើន។ អ៊ីចឹងហើយ បានមន្ទីរសុខាភិបាលធ្វើការផ្សព្វផ្សាយ ធ្វើការអប់រំក្រុមស្ម័គ្រចិត្តភូមិ ក៏ដូចជាអាជ្ញាធរមូលដ្ឋាន ឲ្យសម្អាតអនាម័យ ដើម្បីកម្ទេចវាចោល»។
លោកបន្តថា អំឡុងពេលទឹកលិច មានប្រជាពលរដ្ឋមួយចំនួនកើតមានជំងឺរមាស ជំងឺរាគ និងការរលាកផ្លូវដង្ហើម ប៉ុន្តែពុំអ្នកណាម្នាក់ស្លាប់ដោយសារជំងឺនោះទេ។ ទោះជាយ៉ាងនេះក្តី ជំនន់ទឹកភ្លៀង បានសម្លាប់មនុស្សចំនួន ៧នាក់ ដោយសារការលង់ទឹក និងឆក់ខ្សែភ្លើង។ ក្នុងនោះ មានពីរនាក់ នៅក្រុងប៉ោយប៉ែត ពីរនាក់ នៅស្រុកអូរជ្រៅ ពីរនាក់នៅក្រុងសិរីសោភ័ណ និងម្នាក់នៅស្រុកភ្នំស្រុក។
រយៈពេលកន្លងមកនេះ មន្ទីរសុខាភិបាលបានរៀបចំក្រុមគ្រូពេទ្យជួយសង្គ្រោះសហការជាមួយអង្គការដៃគូ ចុះទៅតាមទីទួលសុវត្ថិភាព និងវត្តអារាម ដែលមានប្រជាពលរដ្ឋស្នាក់នៅ ហើយបានអប់រំប្រជាពលរដ្ឋពីការថែទាំសុខភាព និងផ្ដល់ថ្នាំសង្កូវព្យាបាល៖ «ថ្នាំសង្កូវ យើងមិនមានបញ្ហាអីទេ ដោយសារក្រសួងសុខាភិបាល បានឧបត្ថម្ភជាធីបកញ្ចប់ សម្រាប់គ្រោះទឹកជំនន់ មានន័យថា យើងមានថ្នាំគ្រប់គ្រាន់។ ក្រសួងក៏បានចែកអាវពោង ក៏ដូចជាមេក្រូ សម្រាប់បំពងអប់រំប្រជាពលរដ្ឋ ឲ្យចេះថែរក្សាអនាម័យ ការពារខ្លួនគាត់ ក្នុងនោះ យើងបានចែកខ្លូរ៉ាមីន ឲ្យគាត់ដាក់ក្នុងទឹកឲ្យគាត់ដាក់ក្នុងពាង សម្លាប់មេរោគ ផ្ដល់សាប៊ូរមាស យើងបានចែកខិត្តប័ណ្ណតូចសម្រាប់ឲ្យគាត់ និងមុងសុវត្ថិភាពដែលក្រសួងបានផ្ដល់ឲ្យ»។
ទឹកភ្លៀងពីប្រទេសថៃ បានជន់លិចដំណាំស្រូវជាង ៤ម៉ឺនហិកតារ និងប៉ះពាល់ដំឡូងមីជាង ២ម៉ឺនហិកតារ។ ប្រជាពលរដ្ឋជាង ៣ពាន់គ្រួសារ បានរំដោះទៅកាន់ទីទួលសុវត្ថិភាព។ ទឹកជំនន់នេះ លិចផ្លូវថ្នល់ជាង ៤ម៉ឺនម៉ែត្រ ខូចខាត ៣ពាន់ម៉ែត្រ សាលារៀន ១១៨ខ្នង និងលំនៅឋានប្រជាពលរដ្ឋជាង ៦ពាន់ខ្នង។
ក្រសួងធនធានទឹក និងឧតុនិយម កាលពីថ្ងៃទី២៨ ខែកញ្ញា បានចេញសេចក្ដីជូនដំណឹងថ្មីមួយទៀតថា សម្ពាធទាប និងប្រព័ន្ធសម្ពាធទាប បានគ្របដណ្ដប់លើប្រទេសកម្ពុជា នាពេលកន្លងមកនោះ បានបង្កើនឥទ្ធិពលកាន់តែខ្លាំង ចាប់ពីថ្ងៃទី២៨ ខែកញ្ញា ដល់ថ្ងៃទី៤ ខែតុលា។ អាកាសធាតុនេះ អាចបង្កឲ្យមានភ្លៀងធ្លាក់រាយប៉ាយពីមធ្យមទៅច្រើន ស្ទើរទូទាំងប្រទេសកម្ពុជា។ ក្រសួងបានអំពាវនាវសុំឲ្យអាជ្ញាធរដែនដី និងប្រជាពលរដ្ឋដែលរស់នៅតាមរាជធានី និងបណ្ដាខេត្ត មានការប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗដែលអាចកើតមាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។