មន្ត្រីមូលដ្ឋានសង្កាត់ឡាបានសៀក ក្រុងបានលុង ខេត្តរតនគិរី នៅថ្ងៃពុធ ទី១៨ ខែមេសា ឆ្នាំ២០១២ ឲ្យដឹងថា មានប្រជាពលរដ្ឋជិត ២ម៉ឺននាក់ នៅក្នុងសង្កាត់នេះ មិនទាន់បានទទួលមុងការពារមូសភ្នាក់ងារចម្លងជំងឺគ្រុនចាញ់នៅឡើយ។
ចៅសង្កាត់ឡាបានសៀក លោក ញៀន តៃស៊ី មានប្រសាសន៍បញ្ជាក់ថា មន្ត្រីមន្ទីរសុខាភិបាលបានផ្សព្វផ្សាយពីគំរោងចែកមុងជ្រលក់ថ្នាំការពារមូសឲ្យគ្រប់ប្រជាពលរដ្ឋ មិនថាចាស់ ក្មេង គ្រប់រូប និងគ្រប់ក្រុមគ្រួសារ ត្រូវបានទទួលមុងម្នាក់មួយ ជាពិសេសក្នុងមួយគ្រួសារនឹងត្រូវបានមុង អង្រឹង មួយបន្ថែមទៀត ក៏ប៉ុន្តែរហូតមកទល់នឹងថ្ងៃពុធ ទី១៨ ខែមេសា ឆ្នាំ២០១២ នេះ លោកមិនទាន់បានទទួលមុង ដើម្បីចែកប្រជាពលរដ្ឋក្នុងសង្កាត់បាននរណាម្នាក់នៅឡើយ។
លោកបន្តថា មន្ត្រីមន្ទីរសុខាភិបាលបានបញ្ជាក់ប្រាប់ពីករណីនេះថា ប្រជាពលរដ្ឋសង្កាត់ឡាបានសៀក នឹងទទួលបានមុងនៅពេលក្រោយ៖ «ខ្ញុំបានទៅជួបខាងសុខាភិបាលហើយ សុខាភិបាលគេថា ឥឡូវគំរោងដែលគេចែកមួយសាមុនហ្នឹងអស់ហើយ ចាំលើកក្រោយទៀត។ ឲ្យគ្រប់ឃុំ ប៉ុន្តែគេថាក្រុមហ៊ុនអ្នកទទួលធ្វើអត់ទាន់ អ៊ីចឹងបើកមួយចំនួនណាមកគេចែកទៅក្រៅៗសិន ក្នុងសង្កាត់យើងក្នុងក្រុងគេថា ចាំក្រោយ»។
កាលពីដើមខែមេសា ឆ្នាំ២០១២ ប្រធានមជ្ឈមណ្ឌលជាតិប្រយុទ្ធប្រឆាំងនឹងជំងឺគ្រុនចាញ់ លោកវេជ្ជបណ្ឌិត ច ម៉េងចួ បានអំពាវមន្ត្រីសុខាភិបាល នៅខេត្ត ក្រុង ប្រញាប់ចាត់ចែងចែកមុងសុវត្ថិភាពជូនប្រជាពលដ្ឋឲ្យបានរួចរាល់មុនពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំ២០១២ និងអំពាវនាវចំពោះប្រជាពលរដ្ឋដែលមិនទាន់បានទទួលមុងការពារជំងឺគ្រុនចាញ់ឲ្យមកទទួលមុងពីមន្ត្រីភូមិឃុំរបស់ខ្លូន លើកលែងតែប្រជាពលរដ្ឋរស់នៅចល័តអាចមកទទួលមុងសុវត្ថិភាពនេះបានគ្រប់ពេលវេលាពីមន្ត្រីមូលដ្ឋាន។
ឆ្លើយបញ្ជាក់ពីករណីនេះ ប្រធានមន្ទីរសុខាភិបាលខេត្តរតនគិរី គឺលោក ស៊ីម សនឡៃ។ លោកបានទទួលស្គាល់ថា នៅសង្កាត់ឡាបានសៀក មន្ទីរសុខាភិបាលពិតជាមិនទាន់បានផ្តល់មុងសុវត្ថិភាពដល់មន្ត្រីមូលដ្ឋានចែកជូនប្រជាពលរដ្ឋប្រាកដមែន ដោយសារតែចំនួនប្រជាពលរដ្ឋកើនច្រើនលើសពីមុងដែលមជ្ឈមណ្ឌលជាតិផ្តល់សំរាប់ចែកជូនប្រជាពលរដ្ឋ។
លោកបន្តថា មន្ត្រីសុខាភិបាលកំពុងធ្វើសំណើទៅមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ដើម្បីផ្តល់មុងបន្ថែមចែកជូនប្រជាពលរដ្ឋសង្កាត់ឡាបានសៀក មិនទាន់បានទទួលមុង៖ «ឡាបានសៀក ទទួលក្រោយគេ ព្រោះឥឡូវយើងមើលទៅលើចំណុចសំខាន់ៗសិន។ យើងគិតទៅលើតំបន់ឆ្ងាយៗ តំបន់ដែលប្រឈមនឹងគ្រុនចាញ់ខ្ពស់សិន»។
មន្ទីរសុខាភិបាលខេត្តរតនគិរី បានទទួលមុងជ្រលក់ថ្នាំការពារមូសពីមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ជាង ១៣ម៉ឺនមុង សំរាប់ចែកជូនប្រជាពលរដ្ឋរស់នៅអចិន្ត្រៃយ៍តាមភូមិឃុំ និងប្រជាពលរដ្ឋរស់នៅចល័តតាមកសិដ្ឋាន ការដ្ឋាន ជាពិសេសក្រុមកម្មករចំការកៅស៊ូដែលមិនទាន់បានទទួលមុងកាលពីយុទ្ធនាការចែកមុងជំហានទីមួយ ឆ្នាំ២០១១។ ក៏ប៉ុន្តែប្រធានមន្ទីរសុខាភិបាល លោក ស៊ីម សនឡៃ បានបញ្ជាក់ថា ស្ថិតិចំនួនប្រជាពលរដ្ឋនៅខេត្តរតនគិរី បានកើនពីជាង ១៣ម៉ឺននាក់ឡើងដល់ជាង ១៨ម៉ឺននាក់លើសពីការគ្រោងទុក។
យ៉ាងនេះក្តី ប្រធានមជ្ឈមណ្ឌលជាតិប្រយុទ្ធប្រឆាំងនឹងជំងឺគ្រុនចាញ់ លោក ច ម៉េងចួ បានឲ្យដឹងដែរថា បន្ទាប់ពីយុទ្ធនាការចែកមុងជំហានទីពីរនេះទៅនៅខែមិថុនា ខាងមុខនេះ មជ្ឈមណ្ឌលជាតិមានគំរោងទិញមុងជាង ១លានពីរសែនមុងបន្ថែមទៀត សំរាប់ចែកជាប្រចាំជូនប្រជាពលរដ្ឋដែលមិនទាន់បានទទួលមុង ប្រជាពលរដ្ឋអ្នកបានទទួលមុងការពារសុវត្ថភាពលើសពីបីឆ្នាំ ប្រជាពលរដ្ឋតាំងទីលំនៅថ្មី និងប្រជាពលរដ្ឋរស់នៅចល័តជាដើម៖ «យើងមើលទៅផែនការពីមុនហ្នឹងប្រជាជនមួយចំនួនទេ ប៉ុន្តែឥឡូវហ្នឹងថា មានថែមទៀត ដល់អ៊ីចឹងប្រហែលមួយចំនួនមិនទាន់បានទេ។ បើមិនបានទេ កុំបារម្ភពាក់កណ្តាលឆ្នាំបានទៀតហើយ»។
ក្រសួងសុខាភិបាលបានបើកយុទ្ធនាការជំហានទីពីរចែកមុងចំនួនជាង ២,៧លានមុងនៅក្នុងឆ្នាំ២០១១ ដល់ប្រជាពលរដ្ឋនៅតាមខេត្តក្រុងដែលបានរាតត្បាត ដោយសារជំងឺគ្រុនចាញ់ដើម្បីអនុវត្តគោលនយោបាយរាជរដ្ឋាភិបាល គឺធ្វើយ៉ាងណារូមគ្នាលប់បំបាត់ជំងឺគ្រុនចាញ់នៅទូទាំងប្រទេសឲ្យបាននាឆ្នាំ២០២៥៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។