ចៅក្រមជម្រះក្ដីលោក ឌុច គឹមស៊ន បានប្រកាសថា តុលាការនឹងប្រកាសសាលក្រមនៃសំណុំរឿងនេះនៅថ្ងៃទី៣០ ខែឧសភា ឆ្នាំ២០១១ នៅវេលាម៉ោង ៨កន្លះព្រឹក។
នេះជាសវនាការលើកទី៤ហើយ ដែលតុលាការបានដំណើរការពេញលេញដោយគ្មានការលើកពេលដូចពេលមុន។
ដើមបណ្ដឹងនៃសំណុំរឿងនេះ គឺរដ្ឋមន្ត្រីក្រសួងអធិការកិច្ច ទំនាក់ទំនងសភា និងព្រឹទ្ធសភា គឺលោកស្រី សោម គឹមសួ ដែលបានប្ដឹងក្រោមបទអំពើពុករលួយ និងទាមទារឲ្យតុលាការផាកពិន័យចំនួន ២០លានរៀល ស្មើនឹង ៥.០០០ដុល្លារអាមេរិក។
មេធាវីការពារក្ដីឲ្យក្រសួងអធិការកិច្ច ទំនាក់ទំនងសភា និងព្រឹទ្ធសភា លោក ឡុង នរិន្ទ នៅក្រោយពីសវនាការជាង ៣ម៉ោង បានមានប្រសាសន៍នៅក្រៅតុលាការថា លោករក្សាជំហរប្ដឹងជាដដែល ៖ «សវនាការដំណើរការទៅតាមនីតិវិធីច្បាប់ ហើយការសម្រេចយ៉ាងម៉េច ស្ថិតនៅលើតុលាការជាអ្នកសម្រេច»។
មេធាវីការពារក្ដីឲ្យលោក សេង យៀន គឺលោក ខៀវ សុផល បានមានប្រសាសន៍ថា គ្មានភស្តុតាងជាក់ស្ដែងដើម្បីចោទប្រកាន់ដាក់បន្ទុកលើកូនក្ដីឡើយ ៖ «ឯភស្តុតាងទាំងអស់ហ្នឹង គឺគ្រាន់តែជាភស្តុតាងមួយដូចជាក្រដាសសប៉ុណ្ណឹង។ ដូច្នេះសូមបដិសេធចោល ហើយសុំឲ្យតុលាការសម្រេចឲ្យរួចពីបទចោទ»។
មេធាវីការពារក្ដីឲ្យលោកស្រី ឌី ប្រឹម គឺលោក ជីវ ខេង នៅក្នុងសវនាការនោះ បានសុំឲ្យតុលាការលើកលែងការចោទប្រកាន់មកលើកូនក្ដី ពីព្រោះឯកសារដាក់បន្ទុកកន្លងមកជាឯកសារថតចម្លងមិនអាចយកជាការបាន។
មេធាវីការពារក្ដីឲ្យកសិកររងគ្រោះឈ្មោះ ហួត សារុំ គឺលោក កៅ ទី បានមានប្រសាសន៍ថា ៖ «ចង់ឲ្យតុលាការសម្រេចផ្ដន្ទាទោសលើជនជាប់ចោទឲ្យបានធ្ងន់ធ្ងរ»។
អគ្គនាយករងនៃអគ្គនាយកដ្ឋានក្រសួងអធិការកិច្ច ទំនាក់ទំនងសភា និងព្រឹទ្ធសភា លោក សេង យៀន ត្រូវបានលោកនាយករដ្ឋមន្ត្រី ហ៊ុន សែន បានដកចេញពីតំណែង នៅថ្ងៃទី៣០ ខែកក្កដា ឆ្នាំ២០០៩ ក្រោយពីរដ្ឋាភិបាលបានរកឃើញថា លោកបានទទួលសំណូកទឹកប្រាក់ ២០ម៉ឺនដុល្លារអាមេរិកពីឈ្មួញដីធ្លី ឈ្មោះលោកស្រី ឌី ប្រឹម ដើម្បីធ្វើរបាយការណ៍ភូតកុហករដ្ឋាភិបាលនៅចន្លោះឆ្នាំ២០០៨ និងឆ្នាំ២០០៩ កន្លងទៅ។
ការរត់ការនោះមិនបានសម្រេចទេក្នុងការរឹបយកដីស្រែជាង ៥ហិកតារពីកសិករឈ្មោះ ហួត សារុំ ដើម្បីទុកលក់ក្នុងតម្លៃជាង ៧លានដុល្លារអាមេរិក។
ប្រធានគណៈកម្មាធិការកម្ពុជាឯករាជ្យប្រឆាំងអំពើពុករលួយ លោកស្រី ម៉ម ស៊ីថា ដែលបានចូលរួមតាមដានសវនាការ បានមានប្រសាសន៍ថា ៖ «វាមិនមែនតែរដ្ឋាភិបាលដែលទទួលរងគ្រោះដោយអំពើពុករលួយទេ សូម្បីតែប្រជាពលរដ្ឋដូច ហួត សារុំ ហ្នឹងឯង ក៏គាត់ទទួលរងគ្រោះដោយអំពើពុករលួយដែរ»។
តុលាការក្រុងភ្នំពេញ បានចោទប្រកាន់លោក សេង យៀន តាមមាត្រាទី៣៨ នៃច្បាប់ព្រហ្មទណ្ឌសម័យអន្តរកាលអ៊ុនតាក់ (UNTACT) ក្រោមបទស៊ីសំណូក។ លោកស្រី ឌី ប្រឹម ជាប្អូនជីដូនមួយរបស់លោកនាយករដ្ឋមន្ត្រី ហ៊ុន សែន បានរងការចោទប្រកាន់តាមមាត្រាទី៥៨ ក្រោមបទសូកប៉ាន់៕