អធិការនគរបាលស្រុកត្រពាំងប្រាសាទ លោក កែវ ប៉ាន់ បានឲ្យដឹងកាលពីព្រឹកថ្ងៃអាទិត្យ ទី២ ខែវិច្ឆិកា ថា ភ្លៀងបានធ្លាក់ខ្លាំងជាប់ៗគ្នា ចំនួន ៤ថ្ងៃមកហើយ នៅតំបន់នោះ បណ្ដាលឲ្យស្រូវ សណ្ដែករបស់កសិករទូទាំងស្រុកត្រពាំងប្រាសាទ ទទួលរងការខូចខាតស្ទើរទាំងស្រុង។ ក៏ប៉ុន្តែទោះយ៉ាងណា លោកមិនទាន់អាចបញ្ជាក់អំពីតួលេខបានច្បាស់លាស់នៅឡើយទេ។
លោក កែវ ប៉ាន់ មានប្រសាសន៍ថា ៖ «ប៉ះពាល់ដល់ផលដំណាំ សំខាន់ពួកប្រភេទសណ្ដែកសៀង មានការខាតបង់ច្រើនដោយសារទឹកហ្នឹង។ ទូទាំងស្រុកតែម្ដង បងប្អូនធ្វើសណ្ដែក មានភ្លៀងទៅ សណ្ដែកមិនទាន់កាត់ហ្នឹង ក៏នៅទៅ អាកាត់ហើយឧបសគ្គនឹងយកចេញ ឧបសគ្គនឹងភ្លៀងប្រមូលបោកអី។ សាច់ភ្លៀងជាប់ ៤ថ្ងៃពេញ ហើយថ្ងៃណេះជិតភ្លឺ ម៉ោង ៤រាំង ហើយឥឡូវមេឃខ្មៅមកទៀតហើយ»។
ពេញមួយថ្ងៃអាទិត្យនេះ មិនអាចទំនាក់ទំនងអភិបាលស្រុកត្រពាំងប្រាសាទ លោក វ៉ាន់ កុសល ដើម្បីបំភ្លឺបញ្ហានោះបាននៅឡើយ។
ចំណែកក្រុមប្រជាពលរដ្ឋជាច្រើន នៅភូមិស្រះជ័យ និងភូមិអូរតាសោម ឃុំត្រពាំងប្រាសាទ ស្រុកត្រពាំងប្រាសាទ បានមានប្រសាសន៍ថា ស្រូវនិងសណ្ដែកសៀងរបស់ពួកគាត់ ដែលច្រូតកាត់រួចហើយ ត្រូវបានទឹកជំនន់លិចលង់ បានបង្កឲ្យរលួយនិងលិចខូចខាតទាំងអស់ ហើយរហូតមកដល់ពេលនេះ នៅតាមទីវាលទឹកនៅមានកម្ពស់ត្រឹមដើមទ្រូងនៅឡើយ ៖ «ខ្ញុំលិចអស់ហើយ ពីរហិកតារឡើងរលួយ យកកណ្ដាប់អត់ចេញផងឥឡូវហ្នឹង ទឹកនៅស្មើទ្រូងនៅឡើយ។ រលីងតែម្ដង អត់មានសល់ផង ហើយប្អូនខ្ញុំម្នាក់ទៀត។ ឥឡូវឆ្លងទៅអត់រួចផង ហើយមនុស្សនៅច្រូត ២-៣នាក់នៅហ្នឹង នៅជាប់នៅរោងហ្នឹង លិចអស់ហើយ។ លិចទាំងអស់គ្នា អ្នកសណ្ដែកសៀងអី ក៏គ្នាខូចទាំងអស់ ហើយសណ្ដែកហ្នឹងរីកអស់រលីងហើយ»។
តាមមន្រ្តីប៉ូលិសស្រុកត្រពាំងប្រាសាទ បានឲ្យដឹងថា កាលពីថ្ងៃសៅរ៍ ទឹកភ្លៀងជាច្រើនបានហូរកាត់ខ្លាំងលិចផ្លូវក្រួសក្រហមនៅតំបន់ផ្ទះខៀវបណ្ដាលឲ្យដាច់ផ្លូវ ហើយស្ទះចរាចរណ៍ជាច្រើនម៉ោង ដោយរថយន្តជាច្រើនមិនអាចធ្វើដំណើរទៅកាន់តំបន់ប្រាសាទព្រះវិហារបានទេ។
ពេញមួយថ្ងៃសៅរ៍ កងកម្លាំងវិស្វកម្មនៃកងយោធពលខេមរភូមិន្ទ បានប្រឹងប្រែងតភ្ជាប់ផ្លូវដែលគំរាមកំហែងដោយទឹកជំនន់ ហើយអាចឲ្យរថយន្តឆ្លងកាត់បានវិញ កាលពីព្រឹកថ្ងៃអាទិត្យ ៖ «ស្ទះចរាចរណ៍ប្រហែលពីរម៉ោង យប់ជ្រៅហ្នឹង។ ទឹកនៅតែហូរ តែកងវិស្វកម្មគេកាយកំណល់ហើយ លើកស្ពានដែក បានយប់មិញ គេដំណើរការវិញ ចរាចរណ៍ធម្មតា ប៉ុន្តែវាភ្លៀង តាមដងផ្លូវប៉ប៉ិកប៉ប៉ាក់»។
ក្រុមអ្នកភូមិបាននិយាយថា នេះគឺជាទឹកជំនន់ដោយសារភ្លៀងខ្លាំងជាលើកដំបូង បានបំផ្លាញស្រូវនិងសណ្ដែកសៀងរបស់ពួកគេដែលពុំធ្លាប់មានទាល់តែសោះកាលពីពេលមុនមកឡើយ៕