អ្នកឃ្លាំមើលផ្នែកសិទ្ធិមនុស្ស និងអ្នកតំណាងរាស្ត្របានសំដែងការព្រួយបារម្ភថា ជម្លោះដីធ្លីរ៉ាំរ៉ៃ ជាច្រើនឆ្នាំមកហើយ នៅស្រុកកណ្ដាលស្ទឹង ខេត្តកណ្ដាល រវាងពលរដ្ឋជាង ២ពាន់គ្រួសារ ជាមួយនិងក្រុមហ៊ុនហេងអភិវឌ្ឍន៍ អាចនឹងឈានដល់ការប្រើហិង្សាដាក់គ្នា បើសិនជាអាជ្ញាធរនៅតែមិនផ្ដល់យុត្តិធម៌នោះ។
ការបារម្ភនេះបានសំដែងឡើងនៅថ្ងៃច័ន្ទ ទី៦ ខែកញ្ញា បន្ទាប់ពីតំណាងអ្នកភូមិម្នាក់ ទើបនឹងត្រូវគេចាប់ដាក់គុកយ៉ាងតក់ក្រហល់ កាលពីប៉ុន្មានថ្ងៃមុន ដោយគ្មានដីកាចាប់ខ្លួនឡើយ ហើយមានតំណាងអ្នកភូមិច្រើននាក់ផ្សេងទៀត កំពុងរស់ដោយការភ័យខ្លាច ក្រោយពីការតាមចាប់តទៅទៀត។
មន្ត្រីផ្នែកស៊ើបអង្កេតរបស់សមាគមការពារសិទ្ធិមនុស្សអាដហុក លោក អ៊ុច ឡេង បញ្ជាក់ថា ប្រជាជនកំពុងធ្លាក់ក្នុងសភាពទល់ច្រក ដោយដីធ្លីផ្ទះសម្បែងត្រូវគេរឹបអូសយក ប៉ុន្តែអាជ្ញាធរវិញ បានធ្វើមិនដឹងមិនឮ ពេលដែលប្រជាជនមកសុំឲ្យជួយ ៖ «អាចនឹងមានការប៉ះទង្គិចគ្នា ពីព្រោះអីប្រជាពលរដ្ឋ គាត់បាត់បង់ដីធ្លីផង បាត់បង់វត្តអារាមផង ហើយបែរជាកម្លាំងសមត្ថកិច្ចតាមចាត់ខ្លួនប្រជាពលរដ្ឋ ហើយទីបំផុតប្រហែលជាពួកគាត់មិនអាចយកផ្លូវច្បាប់មកពិចារណាបាន ប្រហែលជាគាត់ត្រូវសាមគ្គីគ្នា ដើម្បីការពារដីរបស់គាត់»។
ជម្លោះរវាងក្រុមហ៊ុនហេងអភិវឌ្ឍន៍ជាមួយអ្នកភូមិចំនួន ២.៦៧៦គ្រួសារ នៅក្នុងឃុំចំនួន៧ ដូចជាឃុំអំពៅព្រៃ ឃុំកណ្ដោក ឃុំព្រែកហូរ បឹងខ្យង ព្រែកស្លែង ព្រែកកំពិស និងឃុំជើងកើប បានផ្ទុះឡើងកាលពីឆ្នាំ២០០៥ មក។
អ្នកភូមិបានអះអាងថា ពួកគេបានរស់នៅ និងបានធ្វើស្រែចម្ការ នៅលើដីនៅតំបន់នោះ ប៉ុន្តែក្រុមហ៊ុនហេងអភិវឌ្ឍន៍ បានបញ្ជាក់ទៅវិញថា គេមានឯកសារស្ដីអំពីការកាន់កាប់ដីធ្លីនៅតំបន់នោះ ដល់ទៅ ១ម៉ឺន ៤៤ហិកតារ។
កាលនោះ ជម្លោះនោះ បាននាំឲ្យមានការប៉ះទង្គិចគ្នា ដែលនាំឲ្យមនុស្សចំនួន៣នាក់បានរងរបួស ដោយសារការបាញ់ប្រហាររបស់ភ្នាក់ងារក្រុមហ៊ុន និងមនុស្ស ១៣នាក់ត្រូវបានចាប់ខ្លួន ហើយក៏មានការប្ដឹងផ្ដល់គ្នាទៅកាន់តុលាការ។
ឯកសារដែលវិទ្យុអាស៊ីសេរីទទួលបាន បានបង្ហាញថា តុលាការខេត្តកណ្ដាល កាលពីឆ្នាំ២០០៦ និងឆ្នាំ២០០៧ កន្លងទៅ បានចេញសាលក្រមស្ថាពរ ដោយទទួលស្គាល់កម្មសិទ្ធិអ្នកស្រុក នៅក្នុងឃុំកណ្ដោក ឃុំជើងកើប ក្នុងស្រុកកណ្ដាលស្ទឹងថាជាម្ចាស់កម្មសិទ្ធិស្របច្បាប់។
តំណាងរាស្ត្រគណបក្សប្រឆាំង ដែលបានតាមដានរឿងនេះអស់ជាច្រើនឆ្នាំមកហើយ ចាន់ ចេង បានរៀបរាប់ថា ក្រុមហ៊ុនគ្មានឯកសារស្របច្បាប់ឡើយ ក្នុងការកាន់កាប់ដីដល់ទៅជាងមួយម៉ឺនហិកតារនៅតំបន់នោះ ប៉ុន្តែក្រុមហ៊ុននៅតែដណ្ដើមយកដីអ្នកភូមិ បើទោះបីជាតុលាការខេត្តកណ្ដាល ធ្លាប់បានកាត់ក្តីឲ្យអ្នកភូមិ ជាអ្នកឈ្នះក្នុងរឿងនេះក៏ដោយ។ លោកបញ្ជាក់ថា បើដូចការអះអាងដូច្នេះ ទឹកដីក្នុងខេត្តកណ្ដាលស្ទើរតែទាំងអស់សុទ្ធតែជារបស់ក្រុមហ៊ុន ៖ «ប្រជាពលរដ្ឋអត់មានចង់បានដីរបស់ក្រុមហ៊ុនទេ ប៉ុន្តែក្រុមហ៊ុនទេ ដែលរំលោភយកដីប្រជាពលរដ្ឋ ហើយខ្ញុំបានដឹងរឿងណឹងតាំងពីខ្ញុំជាប់ជាតំណាងរាស្ត្រឆ្នាំ២០០៣ មក ខ្ញុំបានដឹងរឿងណឹង ប្រជាពលរដ្ឋគាត់ធ្វើនេះ ដើម្បីការពារដីរបស់គាត់ ដូចទួលតាម៉ក់ វត្តទួលតាម៉ក់អ៊ីចឹង ហើយក្រុមហ៊ុនថា ដីរបស់គាត់ បានន័យយកអស់ស្រុកកណ្ដាលស្ទឹងមួយទាំងមូល ទៅផ្លូវជាតិលេខពីរ ក្រុមហ៊ុនយកអស់ សូម្បីតែភូមិគ្មានភូមិមួយផង បើគិតទំហំដីណឹង»។
អ្នកការពារសិទ្ធិមនុស្សបានបញ្ជាក់បន្ថែមថា ក្រុមហ៊ុនមានប័ណ្ណកម្មសិទ្ធិក្នុងការគ្រប់គ្រងដី៤២ប័ណ្ណប៉ុណ្ណោះ ដែលអាចស្មើនឹងទំហំដីប្រមាណ ៤០០ហិកតារ ប៉ុន្តែភាគីក្រុមហ៊ុនបានអះអាងដដែល ខ្លួនមិនបានរំលោភយកដីអ្នកភូមិនោះទេ បើទោះបីជាមានសាលក្រមតុលាការកាត់ក្តីឲ្យអ្នកភូមិឈ្នះក្ដីក៏ដោយ។
ការឈូសឆាយក៏ចេះតែបន្ត ដែលកាលពីចុងខែសីហាកន្លងទៅ ការប៉ះទង្គិចគ្នាដោយអំពើហិង្សា បានកើតឡើងម្ដងទៀត ពេលក្រុមហ៊ុនហេងអភិវឌ្ឍន៍បានព្យាយាមកម្ទេចវត្តអារាមនៅទួលតាម៉ក់ និងបណ្ដេញព្រះសង្ឃនៅក្នុងវត្តចេញ មុននឹងមានការចាប់ខ្លួនតំណាងប្រជាជនដាក់គុកនោះ។
អ្នកស្រី សៀង ចាន់ហេង ប្រធានក្រុមហ៊ុនហេងអភិវឌ្ឍន៍បានបញ្ជាក់ដាច់ណាត់ថា អ្នកស្រីមានប័ណ្ណកម្មសិទ្ធិត្រឹមត្រូវ។ អ្នកស្រីមិនបានរំលោភយកដីអ្នកភូមិនោះទេ ប៉ុន្តែអ្នកភូមិទេដែលខិលខូចលួចយកដីអ្នកស្រី ៖ «ហើយខ្ញុំបានធ្វើវេទិកាសេរី ប្រជាជនបានចោទខ្ញុំអស់ សួរថា អូនចុះមកមើលផ្ទាល់ថា តើក្រុមហ៊ុនរំលោភយកដី ឬក៏ប្រជាជនណឹងរំលោភយករបស់ខ្ញុំវិញ។ ក្រដាសស្នាមមានទាំងអស់ ខ្ញុំចង់ឲ្យប្រជាពលរដ្ឋណាដែលថា ខ្ញុំមានតែ៤២ប្លង់ ខ្ញុំរំលោភលើគេ សុំឲ្យចេញមកតទល់ ហើយកុំចេះតែនិយាយតាមសារព័ត៌មាន»។
ក្រោយពេលដែលតំណាងរបស់អ្នកស្រុក ត្រូវគេចាប់ដាក់គុកនៅពន្ធនាគារខេត្តកណ្ដាល ដោយមិនមានដីកាចាប់ខ្លួន តំណាងអ្នកស្រុកជាច្រើននាក់ បាននាំគ្នាចូលមកតវ៉ាទាមទារឲ្យមានការដោះលែង ដោយមិនទាន់ឈប់នៅឡើយទេ។
អ្នកស្រី ជី សយ អាយុ២៣ឆ្នាំ ភរិយារបស់តំណាងអ្នកភូមិ ដែលត្រូវគេចាប់ខ្លួន បានសំដែងថា ដីធ្លីជារបស់អ្នកភូមិ ដែលតុលាការបានកាត់ក្តីឲ្យអ្នកភូមិកាន់កាប់ ប៉ុន្តែក្រុមហ៊ុននៅតែមិនទទួលស្គាល់ ហើយចេះតែបន្តចាប់អ្នកភូមិ ៖ «ពីព្រោះអីដីណឹង អនុវត្តសាលក្រមឲ្យប្រជាជនអស់ហើយ ហេតុម៉េចក៏គេនៅតែចាប់យើងទៀត»។
តំណាងអ្នកភូមិម្នាក់ទៀត មិនបញ្ចេញឈ្មោះ ដែលបានមកតវ៉ានៅមុខតុលាការខេត្តកណ្ដាល បានបន្ថែមថា អ្នកភូមិជាច្រើននាក់ ដែលព្យាយាមឡើងមកតវ៉ានៅតុលាការ ត្រូវគេហាមឃាត់ ៖ «គាត់និយាយថា គាត់ស្របច្បាប់ចុះ ហេតុអ្វីបានជាចេះតែកាក់ប្រជាជន ហាមមិនឲ្យឡើងមករកច្បាប់អ៊ីចឹង»។
រឿងរ៉ាវរបស់អ្នកភូមិ ស្រុកកណ្ដាលស្ទឹង ជាមួយនឹងក្រុមហ៊ុនហេងអភិវឌ្ឍន៍ មកទល់ពេលនេះមិនត្រូវបានមន្ត្រីអាជ្ញាធរខេត្ត និងអាជ្ញាធរស្រុក ធ្វើការបំភ្លឺឡើយ បើទោះបីជាមានការព្យាយាមសាកសួរអស់រយៈពេលជាច្រើនដងរួចមកហើយក៏ដោយ។
ព្រះរាជអាជ្ញារងខេត្តកណ្ដាល លោក វង្ស ប៊ុនវិសុទ្ធ ដែលក្រុមសិទ្ធិមនុស្សអាដហុក បានឃើញឯកសារនៅឯពន្ធនាគារ ស្ដីពីការបញ្ជារបស់លោក ឲ្យមានការចាប់តំណាងអ្នកភូមិដាក់គុក បានប្រកែកមិនធ្វើអត្ថាធិប្បាយជាមួយវិទ្យុអាស៊ីសេរីទេ ដោយបញ្ជាក់ដូច្នេះ ៖ «ខ្ញុំសូមទោស រឿងហ្នឹងខ្ញុំអត់ដឹងផង ខ្ញុំមិនមែនអ្នកកាន់ផង»។
គេនៅមិនទាន់ដឹងនៅឡើយទេ ថាតើតំណាងអ្នកភូមិ ដែលទើបនឹងត្រូវគេចាប់ដាក់គុកនាប៉ុន្មានថ្ងៃមុននេះ នឹងត្រូវឃុំឃាំងរយៈពេលប៉ុន្មានថ្ងៃតទៅមុខទៀតទេ។
មន្ត្រីសិទ្ធិមនុស្សអាដហុកដដែល បានចោទថា អាជ្ញាធរគ្រប់ជាន់ថ្នាក់នៅតំបន់នោះ ហាក់ដូចជាមិនអើពើចំពោះរឿងរ៉ាវដីធ្លីនៅក្នុងស្រុកកណ្ដាលស្ទឹងនេះទេ ប៉ុន្តែផ្ទុយទៅវិញ គេឃើញតែកម្លាំងសមត្ថកិច្ចបានជួយខាងភាគីក្រុមហ៊ុន ដោយចុះទៅឈូសកម្ទេចវត្តអារាម និងចូលចាប់អ្នកភូមិដាក់គុក ដោយគ្មានច្បាប់ទម្លាប់ ដែលប្រការនេះ ហាក់ដូចជាកំពុងរុញច្រានអ្នកភូមិ ឲ្យធ្លាក់ក្នុងសភាពទាល់ច្រកមែនទែនហើយ៕