តុលាការសាលាឧទ្ធរណ៍ដដែលនៅមិនទាន់បានកំណត់កាលបរិចេ្ឆទជាថ្មីភា្លមៗនៅទ្បើយទេសម្រាប់ការបើកសវនាការនៅតុលាការសាលាឧទ្ធរណ៍នោះចំពោះករណីលោក ហេង ពៅ។
លោក កៅ សូផា ជាមេធាវីរបស់លោក ហេង ពៅ បានមានប្រសាសន៍ប្រាក់ក្រុមអ្នកកាសែតនៅខាងក្រៅតុលាការសាលាឧទ្ធរណ៍ថា វាជាការប្រសើរដែលតុលាការសាលាឧទ្ធរណ៍បានសម្រេចពន្យារពេលការបើកសវនាការលើកូនក្ដីរបស់លោកទៅថៃ្ងក្រោយតាមសំណើរបស់លោកនិងកូនក្ដី។
លោក កៅ សូផា បានបញ្ជាក់ថា ៖ «ដោយសារតែលោក ហេង ពៅ គាត់អត់ទាន់បានបង់លុយឲ្យខ្ញុំ។ ហើយរឿងដែលពាក់ព័ន្ធនឹងលុយហ្នឹងគឺយើងបានដាក់ពាក្យទៅតុលាការក្រុងភ្នំពេញ រួចហើយកាលពីថ្ងៃទី៤ ខែកុម្ភៈ ២០០៩ នេះ យើងបានដាក់ពាក្យទៅសម្ដេចនាយករដ្ឋមន្រ្តីឲ្យសុំជួយអន្តរាគមន៍ថាសុំឲ្យមានការដកលុយមួយចំនួនណាសមស្របដើម្បីឲ្យលោក ហេង ពៅ គាត់បានចំណាយទៅលើបញ្ហាចំនួន ៣ ។ ទី១ ព្យាបាលសុខភាព ទី២ ឲ្យកូនបានរៀនសូត្រ ទី៣ បង់ថ្លៃមេធាវីដើម្បីការពារតាមផ្លូវតុលាការ»។
ផ្អែកតាមប្រភពពីមេធាវីនិងលោក ហេង ពៅ ផ្ទាល់ បានប្រាប់ឲ្យដឹងថា គម្រោងការដើមនៃសវនាការនៅតុលាការសាលាឧទ្ធរណ៍នៅថ្ងៃអង្គារនេះ គឺផ្តោតទៅលើបទចោទថា លោក ហេង ពៅ បានរក្សាទុកអាវុធខុសច្បាប់ដែលតុលាការក្រុងភ្នំពេញបានកាត់ទោសឲ្យរូបលោកជាប់គុក១៨ខែនិងផាកពិន័យជាប្រាក់២លានរៀល។
លោក ហេង ពៅ ជាអតីតស្នងការនគរបាលក្រុងភ្នំពេញនៅមុនការសម្រេចពន្យារពេលនៃសវនាការទៅថៃ្ងក្រោយដោយតុលាការសាលាឧទ្ធរណ៍នោះ លោកបានត្អូញតែ្អរថា កូនៗរបស់លោកបានឈប់រៀនហើយដោយសារគ្មានប្រាក់បង់ថៃ្លសាលា ហើយលោកគ្មានប្រាក់បង់ថៃ្លឈ្មួលមេធាវីនឹងគ្មានប្រាក់ព្យាបាលជំងឺស្ពឹករបស់លោក។
លោកបានបន្តថា លោកសុំមិននិយាយអ្វីទេជុំវិញការចោទថាលោករក្សាទុកអាវុធខុសច្បាប់នោះ ទុកឲ្យតុលាការជាអ្នកសម្រេច ៖ «ខ្ញុំទាមទារឲ្យតុលាការប្រតិបត្តិច្បាប់សិន បើតុលាការមិនប្រតិបត្តិច្បាប់ទេ តុលាការកាត់តាមការយល់ឃើញរបស់តុលាការចុះ ខ្ញុំក៏មិនត្រូវការឆ្លើយជាមួយនឹងតុលាការទៀតដែរ»។
ផ្អែកតាមប្រភពពីមេធាវីរបស់លោក ហេង ពៅ បានឲ្យដឹងថា លោកបានសរសេរលិខិតជាផ្លូវការសុំការអនុញ្ញាតពីលោកនាយករដ្ឋមន្រ្តី ហ៊ុន សែន ដើម្បីឲ្យកូនក្តីរបស់លោកអាចដកប្រាក់មួយចំនួនពីធនាគារសម្រាប់ការប្រើប្រាស់ជាចាំបាច់ក្នុងចំណោមសាច់ប្រាក់សរុបរបស់កូនក្ដីរបស់លោកនោះគឺចំនួនជាង៩៣ម៉ឺនដុល្លារអាមេរិកនៅក្នុងធនាគារ។
គេនៅមិនទាន់បានទទួលសេចក្តីឆ្លើយតបពីលោកនាយករដ្ឋមន្រ្តី ហ៊ុន សែន នៅទ្បើយទេជុំវិញសំណើរខាងលើនេះ។
សូមរំឮកថា លោក ហេង ពៅ ជាអតីតស្នងការនគរបាលក្រុងភ្នំពេញ ត្រូវបានតុលាការក្រុងភ្នំពេញកាត់ទោសឲ្យរូបលោកជាប់គុករយៈពេលជាង៥៨ឆ្នាំក្រោមបទចោទប្រកាន់ចំនួន៦ករណីរាប់ទាំងឃាតកម្ម អំពើចាប់ជំរិត និងការរក្សាទុកអាវុធខុសច្បាប់ និងបទចោទមួយចំនួនទៀត៕