គម្រោងជំនួបរបស់លោក ហោ ណាំហុង ជាមួយលោកស្រី ហ៊ិលឡារី គ្លិនតុន ក្នុងពេលខាងមុខនេះ ត្រូវបានលោក កុយ គួង មន្រ្តីអ្នកនាំពាក្យក្រសួងការបរទេស ថ្លែងថា ៖ «ឯកឧត្ដមឧបនឹងជួបប្រជុំទ្វេភាគីជាមួយរដ្ឋមន្រ្តីការបរទេសមួយចំនួន ក្នុងនោះក៏មានអ្នកស្រី ហ៊ិលឡារី គ្លិនតុន រដ្ឋមន្រ្តីការបរទេសសហរដ្ឋអាមេរិកផងដែរ»។
លោក កុយ គួង មន្រ្តីអ្នកនាំពាក្យក្រសួងការបរទេសកម្ពុជា ថ្លែងឲ្យដឹងទៀតថា ក្នុងជំនួបជាមួយលោកស្រី ហ៊ិលឡារី គ្លិនតុន លោក ហោ ណាំហុង ឧបនាយករដ្ឋមន្រ្តី រដ្ឋមន្រ្តីក្រសួងការបរទេសកម្ពុជា នឹងលើកយកប្រធានបទទំនាក់ទំនងរវាងប្រទេសកម្ពុជានិងអាមេរិកមកពិភាក្សា ហើយក្នុងនោះក៏មានប្រធានបទទាក់ទងនឹងការរិះគន់អំពីការរំលោភសិទ្ធិមនុស្សនៅប្រទេសកម្ពុជាផងដែរដែលធ្វើឡើងដោយអង្គការក្រៅរដ្ឋាភិបាលនិងគណបក្សប្រឆាំងកាលពីពេលថ្មីៗនេះ។
លោក កុយ គួង បានមានប្រសាសន៍ថា ៖ «ទី១ និយាយអំពីទំនាក់ទំនងកិច្ចសហប្រតិបត្តិការទ្វេភាគីរវាងកម្ពុជា អាមេរិក។ ទី២ គឺទាក់ទងជាមួយនឹងក្រុមប្រឆាំង៣រូបដែលបានទៅថ្លែងនៅគណៈកម្មការសិទ្ធិមនុស្ស សហរដ្ឋអាមេរិក កាលពីថ្ងៃ១០ ខែកញ្ញាកន្លងមក បញ្ជាក់អំពីបញ្ហាសិទ្ធិសេរីភាពក្នុងការបញ្ចេញមតិដែលអ្នកទាំង៣ហ្នឹងបានលើកឡើងថា កម្ពុជាមានការរឹតត្បិតនោះគឺថាវាខុសស្រឡះពីអ្វីដែលខ្លួនកំពុងនិយាយប្រាប់រដ្ឋាភិបាលបរទេស»។
កាលពីពេលថ្មីៗនេះ បញ្ហាសិទ្ធិមនុស្សនៅប្រទេសកម្ពុជាត្រូវបានលើកឡើងក្នុងសវនាការមួយរបស់គណៈកម្មាធិការសិទិ្ធមនុស្ស Tom Lantos នៃសភាសហរដ្ឋអាមេរិក ដែលជាស្ថាប័នត្រួតពិនិត្យបញ្ហាសិទ្ធិមនុស្សនៅជុំវិញពិភពលោក ដោយលោកស្រីវេជ្ជបណ្ឌិត ពុង ឈីវកេក នាយិកាអង្គការសិទិ្ធមនុស្ស លីកាដូ, លោក មឿន តុលា ប្រធានកម្មវិធីពលកម្មនៃមជ្ឈមណ្ឌលអប់រំច្បាប់សហគមន៍ និងលោកស្រី មូរ សុខហួរ សមាជិកាគណបក្សប្រឆាំងសមរង្ស៊ី។
លោក អឿ សំអុល នាយរងខុទ្ទកាល័យគណបក្សសមរង្ស៊ី ថ្លែងថា លោកស្រី មូរ សុខហួរ គ្រោងនឹងវិលត្រឡប់មកដល់ប្រទេសកម្ពុជាវិញ នៅថ្ងៃទី២៥ ខែកញ្ញា ២០០៩។
លោក អឿ សំអុល បានបញ្ជាក់ថា ៖ «វាត្រូវថ្ងៃ២៤ ប៉ុន្តែឥឡូវហ្នឹងគាត់ឡើងពី សាន់ហ្រ្វាន់ស៊ីស្កូមក ហើយគាត់ត្រូវមកដល់ភ្នំពេញ ថ្ងៃ២៥»។
លោក កុយ គួង មន្រ្តីអ្នកនាំពាក្យក្រសួងការបរទេសកម្ពុជា ថ្លែងថា លោក ហោ ណាំហុង ឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេសកម្ពុជា នឹងបកស្រាយទៅវិញ ក្រោយពីការរិះគន់របស់លោកស្រី មូរ សុខហួរ អំពីការរំលោភសិទ្ធិមនុស្សទៅលោកស្រី ហ៊ិលឡារី គ្លិនតុន រដ្ឋមន្រ្តីក្រសួងការបរទេសអាមេរិក៕