ក្រុមប្រឹក្សាសន្តិសុខអង្គការសហប្រជាជាតិ មានគម្រោងកោះប្រជុំនៅថ្ងៃទី១៤ ខែកុម្ភៈ ដោយមានប្រទេសជាសមាជិកក្រុមប្រឹក្សាសន្តិសុខចំនួន ១៥ ចូលរួម ដោយរួមទាំងប្រទេសមានជម្លោះ គឺកម្ពុជា និងថៃ ហើយមានប្រទេសឥណ្ឌូណេស៊ី ដែលជាប្រធានអាស៊ានចូលរួមផងដែរ។
ប្រទេសកម្ពុជា បានដាក់ពាក្យបណ្ដឹងទៅក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃទី៦ ខែកុម្ភៈ កន្លងទៅ ក្រោយពីមានការវាយប្រយុទ្ធគ្នារវាងកងទ័ពប្រទេសទាំងពីរនៅតំបន់ប្រាសាទព្រះវិហារ ដោយមានការផ្លោងកាំភ្លើងធំដាក់គ្នាទៀតផង។
លោក ហ៊ុន សែន នាយករដ្ឋមន្ត្រីកម្ពុជា បានមានប្រសាសន៍ថា ការវាយប្រយុទ្ធគ្នាចំនួន ៤ថ្ងៃ ចាប់ពីថ្ងៃទី៤ ដល់ទី៧ ខែកុម្ភៈ នៅតំបន់ក្បែរប្រាសាទព្រះវិហារ មិនមែនជាការប៉ះទង្គិចអាវុធរវាងប្រទេសទាំងពីរ កម្ពុជា-ថៃនោះទេ ប៉ុន្តែគឺជាសង្គ្រាម។
ការប៉ះទង្គិចចំនួន ៤ថ្ងៃនោះ បណ្ដាលឲ្យមានមនុស្សស្លាប់ និងរបួសទាំងកម្ពុជា និងថៃ។
ប្រភពព័ត៌មានពីមន្ត្រីជាន់ខ្ពស់កម្ពុជា និងថៃ បានឲ្យដឹងថា ខាងកម្ពុជា មានស្លាប់ទាហាន និងជនស៊ីវិលចំនួន ៨នាក់ របួសទាំងទាហាន និងជនស៊ីវិលជាង ៤០នាក់។ ចំណែកខាងថៃ មានស្លាប់ទាំងទាហាន និងជនស៊ីវិលចំនួន ២នាក់ របួសទាហាន និងជនស៊ីវិល ៣៤នាក់៕