ដំណើរទស្សនកិច្ចនេះ គឺដើម្បីពង្រឹងចំណងទាក់ទងឲ្យបានរឹងមាំថែមទៀត រវាងប្រទេសកម្ពុជា ជាប្រធានអាស៊ាន នៅឆ្នាំ២០១២ ជាមួយសហរដ្ឋអាមេរិក តាមការអញ្ជើញរបស់រដ្ឋមន្ត្រីក្រសួងការបរទេសសហរដ្ឋអាមេរិក លោកស្រី ហ៊ីលឡារី គ្លិនតុន (Hillary Clinton)។
រដ្ឋមន្ត្រីក្រសួងការបរទេសកម្ពុជា លោក ហោ ណាំហុង បានមានប្រសាសន៍ប្រាប់អ្នកកាសែតនៅឯអាកាសយានដ្ឋានអន្តរជាតិភ្នំពេញ នៅល្ងាចថ្ងៃទី១០ ខែមិថុនា ឆ្នាំ២០១២ ថា ទស្សនកិច្ចរបស់លោកគឺនៅក្នុងទីក្រុងវ៉ាស៊ីនតោន នឹងជួបជាមួយរដ្ឋមន្ត្រីក្រសួងការបរទេសសហរដ្ឋអាមេរិក លោកស្រី ហ៊ីលឡារី គ្លិនតុន និងជួបជាមួយមន្ត្រីជាន់ខ្ពស់សហរដ្ឋអាមេរិកមួយចំនួនទៀត។
លោក ហោ ណាំហុង៖ «ទី២ទៀត រវាងសហរដ្ឋអាមេរិក និងព្រះរាជាណាចក្រកម្ពុជា ក៏មានវេទិកាសហប្រតិបត្តិការច្រើនដែរ។ ក្រៅពីសហប្រតិបត្តិការទ្វេភាគី មានសហប្រតិបត្តិការក្របខ័ណ្ឌសហរដ្ឋអាមេរិក ទន្លេមេគង្គ ប្រទេសតាមដងទន្លេមេគង្គ។ ទី៣ទៀត ក្នុងក្របខ័ណ្ឌអាស៊ាន សហរដ្ឋអាមេរិកក៏មានទំនាក់ទំនងកម្ពុជា ក្នុងការប្រជុំកំពូលអាស៊ីបូព៌ា ការប្រជុំវេទិកាអាស៊ាន-អាមេរិកមានច្រើន ...ការពិត ហើយក្នុងឱកាសនោះ យើងពិភាក្សាបញ្ហាតំបន់មួយចំនួនដែរ»។
លោកបានបញ្ជាក់ថា នៅក្នុងជំនួបទ្វេភាគីនោះ លោកនឹងលើកយកបញ្ហាសំខាន់ៗមួយចំនួន ដូចជាការស្នើសុំឲ្យសហរដ្ឋអាមេរិកលុបចោលបំណុលដែលកម្ពុជា បានជំពាក់សហរដ្ឋអាមេរិកជិត ៤០០លានដុល្លារអាមេរិក នៅទសវត្សឆ្នាំ១៩៧០ ដល់ឆ្នាំ១៩៧៥ គ្រប់គ្រងដោយសេនាប្រមុខ លន់ នល់។
បន្ថែមលើនេះទៀត លោកនឹងលើកយកបញ្ហានៃការសុំឲ្យប្រទេសកូរ៉េខាងជើងវិលមករកតុចរចា ៦ភាគី ដើម្បីបោះបង់ចោលកម្មវិធីផលិតអាវុធនុយក្លេអ៊ែរ និងបោះបង់ចោលការសាកល្បងកាំជ្រួចឆ្លងទ្វីប។ លោក ហោ ណាំហុង ទើបបានវិលត្រឡប់មកពីប្រទេសកូរ៉េខាងជើងថ្មីៗនេះ។
អ្នកវិភាគឯករាជ្យ លោកបណ្ឌិត សុខ ទូច បានមានប្រសាសន៍ថា បញ្ហាប្រទេសកូរ៉េខាងជើង និងបញ្ហាបំណុល គឺជាបញ្ហាស្មុគស្មាញ៖ «មានភាពលំបាក ពីព្រោះកូរ៉េ មិនមែនជាសមាជិកនៃអាស៊ានទេ ហើយកូរ៉េខាងជើងត្រូវការដោះដូរនយោបាយ អាវុធនុយក្លេអ៊ែរ ហ្នឹង ទៅនឹងស្បៀង និងថាមពល ហើយនិងភាពសន្តិភាពការពារឲ្យកូរ៉េ ដូច្នេះខ្ញុំជឿថា សំណួរចំណុចមួយនេះមានភាពលំបាក។ តួនាទីរបស់អាមេរិកដែលលុបចោលនូវបំណុលរបស់កម្ពុជាហ្នឹង ខ្ញុំជឿជាក់ថា គេមិនលុបទេ គេសុខចិត្តបង្វែរបំណុលហ្នឹងទៅជាបញ្ហាផ្សេង ទៅជាជំនួយមនុស្សធម៌ ឬជាបញ្ហាសិទ្ធិមនុស្សបញ្ហាអី»។
ដំណើរទស្សនកិច្ចរបស់លោក ហោ ណាំហុង ទៅទីក្រុងវ៉ាស៊ីនតោន សហរដ្ឋអាមេរិកនៅពេលនេះ គឺមុនពេលដែលរដ្ឋមន្ត្រីក្រសួងការបរទេសសហរដ្ឋអាមេរិក លោកស្រី ហ៊ីលឡារី គ្លិនតុន គ្រោងមកចូលរួមក្នុងកិច្ចប្រជុំរដ្ឋមន្ត្រីការបរទេសអាស៊ានលើកទី៤៥ និងកិច្ចប្រជុំមួយចំនួនទៀតនៅទីក្រុងភ្នំពេញ ប្រទេសកម្ពុជា នៅថ្ងៃទី៦ ដល់ថ្ងៃទី១៣ ខែកក្កដា ឆ្នាំ២០១២។
ដោយឡែកប្រធានាធិបតីសហរដ្ឋអាមេរិក លោក បារ៉ាក់ អូបាមា (Barack Obama) គ្រោងមកចូលរួមកិច្ចប្រជុំកំពូលអាស៊ាន នៅខែវិច្ឆិកា ឆ្នាំ២០១២ នៅទីក្រុងភ្នំពេញ ប្រទេសកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។