ហូរ វ៉ាន់ នឹងចូលរួមក្នុងសវនាការទោះគ្មានជំនឿលើតុលាការក៏ដោយ

ដោយ មឿង ទុម

2009-07-02

មន្រ្តីគណបក្សប្រឆាំងបានឲ្យវិទ្យុអាស៊ីសេរីដឹងថា លោក ហូរ វ៉ាន់ អ្នកតំណាងរាស្រ្តនៃគណបក្សសមរង្ស៊ី ដែលត្រូវសភាជាតិលើកអភ័យឯកសិទ្ធិកាលពីពេលថ្មីៗកន្លងមកនេះ នឹងចូលរួមក្នុងសវនាការពីបទចោទប្រកាន់ករណីបទបរិហារកេរ្តិ៍តាមការអញ្ជើញរបស់តុលាការ ទោះបីលោកគ្មានជំនឿថា ការសម្រេចក្តីនោះអាចនឹងគ្មានយុត្តិធម៌ក៏ដោយ។

លោក យឹម សុវណ្ណ អ្នកនាំពាក្យគណបក្សសមរង្ស៊ី មានប្រសាសន៍ប្រាប់វិទ្យុអាស៊ីសេរីថា លោក ហូរ វ៉ាន់ បច្ចុប្បន្ននេះកំពុងធ្វើដំណើរទៅធ្វើទស្សនកិច្ចឯកជននៅក្រៅប្រទេស ប៉ុន្តែលោកនឹងអាចចូលរួមក្នុងសវនាការនាពេលខាងមុខនេះ។

លោក យឹម សុវណ្ណ បានឲ្យដឹងថា ៖ «ពេលមុនដែលគាត់ចេញទៅសួរសុខទុក្ខបងប្អូនគាត់និងចូលរួមដំណើរបេសកកម្មទៅកាន់ប្រទេសអ៊ីតាលីហ្នឹង គាត់បានប្រាប់ខ្ញុំថា គាត់នឹងត្រឡប់មកចូលរួមវិញ ហើយមកទល់ពេលនេះគាត់មិនទាន់មានការប្រែប្រួលជំហរអ្វីទេ»។

លោក ហូរ វ៉ាន់ ត្រូវបានតុលាការចោទប្រកាន់ពីបទបរិហារកេរ្តិ៍និងបទចុះផ្សាយព័ត៌មានបរិហារកេរ្តិ៍បន្ត ព្រោះលោកធ្លាប់បានរិះគន់អំពីនាយទាហាន២២រូបដែលទទួលសញ្ញាបត្រពីប្រទេសវៀតណាមថាគ្មានគុណភាព ក៏ត្រូវរងការប្តឹងចោទពីបទបរិហារកេរ្តិ៍ពីក្រុមយោធានោះ។

លោក ហូរ វ៉ាន់ ត្រូវបានសភាជាតិលើកអភ័យឯកសិទ្ធិកាលពីថ្ងៃទី២២ ខែមិថុនា ឆ្នាំ២០០៩នេះ។

ចំណែកតុលាការក្រុងភ្នំពេញវិញក៏បានចេញដីកាកាលពីចុងខែមិថុនាកោះហៅរូបលោកឲ្យទៅចូលរួមសវនាការដែលតុលាការគ្រោងនឹងបើកនៅថ្ងៃទី១៧ ខែកក្កដានេះ។

លោក យឹម សុវណ្ណ មានប្រសាសន៍អំពីជំនឿរបស់លោកលើសវនាការនោះថា ៖ «ខ្ញុំយល់ឃើញថាលទ្ធផលមិនល្អទេ។ ខ្ញុំមិនមែនមើលស្រាលទៅលើការកាត់សេចក្ដីរបស់តុលាការទេ ប៉ុន្តែបទពិសោធន៍នយោបាយជាង១៥ឆ្នាំនេះ គឺក្រឡេកមើលការវិត្តន៍ទៅហ្នឹង គឺថា តុលាការមិនមានឯករាជភាពក្នុងការកាត់សេចក្ដីឲ្យមានយុត្តិធម៌ទេ គឺធ្វើឡើងតាមតែការបញ្ជារបស់អ្នកមានអំណាចមួយចំនួនតែប៉ុណ្ណឹងឯង»។

ប៉ុន្តែមជ្ឈដ្ឋានសាធារណៈ ព្រមទាំងអង្គការជាតិនិងអន្តរជាតិ ជាបន្តបន្ទាប់បានចាត់ទុកថា ការដកអភ័យឯកសិទ្ធិសភាពីអ្នកតំណាងរាស្រ្តរូបនេះជាអំពើអយុត្តិធម៌៕

បោះពុម្ព អ៊ីម៉េល

មតិ

អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។