លោក អំ សំអាត មន្រ្តីអង្កេតរបស់អង្គការសិទ្ធិមនុស្សមួយ ហៅកាត់ថា លីកាដូ បានមានប្រសាសន៍ថា នៅក្នុងឆ្នាំកន្លងទៅ ការរំលោភសិទ្ធិមនុស្សលើវិស័យសំខាន់ៗមួយចំនួនមានការកើនឡើង ដូចជាវិវាទដីធ្លីនិងបណ្តេញចេញ ការបង្ករបួសស្នាម និទណ្ឌភាព ឬភាសាសាមញ្ញនិយាយថា ការប្រព្រឹត្តកំហុសឬរំលោភច្បាប់ផ្សេងៗដោយមិនមានកំហុស ការជួញដូរ កុមារនិងស្រ្តីមានការកើនឡើង។
លោក អំ សំអាត បានបញ្ជាក់ថា ៖ «បើនិយាយពីរឿងជាទូទៅ ការរំលោភសិទ្ធិមនុស្សហ្នឹងឃើញថា វាអត់ទាន់មានការថយចុះទេ។ បើយើងនិយាយពីការរំលោភសេពសន្ថវៈក៏កំពុងតែមានការកើនឡើង»។
លោក អំ សំអាត បានមានប្រសាសន៍ឲ្យដឹងទៀតថា មូលហេតុដែលបណ្តាលឲ្យមានការរំលោភសិទ្ធិមនុស្សកើនឡើង ដោយសារការដោះស្រាយតាមផ្លូវច្បាប់លើរឿងមួយចំនួនមិនមានប្រសិទ្ធភាព អ្នកមានលុយមួយចំនួនបានប្រើទឹកលុយបិទបាំងកំហុស មន្រ្តីមានសមត្ថកិច្ចមួយចំនួនមិនបំពេញការងារឲ្យអស់ពីសមត្ថភាពតាមផ្លូវច្បាប់ និងគិតតែពីប្រយោជន៍ផ្ទាល់ខ្លួន ជាដើម។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា បានមានប្រសាសន៍នៅថ្ងៃទី១ មករា ឆ្នាំ២០១០នេះ ថា មានការពិបាកក្នុងការវាយតម្លៃថា មានការរំលោភសិទ្ធិមនុស្សឲ្យបានជាក់លាក់ ប៉ុន្តែបើពិនិត្យតាមពាក្យបណ្តឹងនៅតុលាការ គេឃើញថា ចំនួនពាក្យប្តឹងមានការកើនឡើង ការប្រើអំណាចរដ្ឋដោយគណបក្សនយោបាយកាន់អំណាចមានការបំពានលើគណបក្សជំទាស់ជាចំហរ ជាដើម។
លោក អ៊ូ វីរៈ បានមានប្រសាសន៍ថា ៖ «បើសិនជាយើងមើលទៅដល់ការប្ដឹងដល់ប្រព័ន្ធតុលាការ យើងយល់ថា មានការកើនឡើងក្នុងឆ្នាំ២០០៩នេះ ដោយសារការប្ដឹងផ្ដល់ទៅប្រព័ន្ធតុលាការចំពោះសកម្មជនសិទ្ធិមនុស្សនិងគណបក្សប្រឆាំងគឺកើនឡើង ដូច្នេះក្នុងសិទ្ធិនយោបាយសិទ្ធិពលរដ្ឋនេះ»។
លោក អ៊ូ វីរៈ បានទទួលស្គាល់ថា គណបក្សកាន់អំណាចបានខិតខំពង្រឹងការគោរពសិទ្ធិមនុស្សទូទៅបានមួយចំនួនដែរ តែនៅតែមិនទាន់គ្រប់គ្រាន់ឆ្លើយតបនឹងបំណងប្រាថ្នារបស់ប្រជាពលរដ្ឋទូទៅនៅឡើយទេ ៖ «តាមពិត ខ្ញុំឃើញចំណុចវិជ្ជមានមួយចំនួនដែរ»។
លោក ផៃ ស៊ីផាន រដ្ឋលេខាធិការនិងជាអ្នកនាំពាក្យទីស្តីការគណៈរដ្ឋមន្រ្តី បានមានប្រសាសន៍ការលើកឡើងរបស់អង្គការសិទ្ធិមនុស្សមួយចំនួននោះអាចស្វាគមន៍ទទួលបាន តែមួយចំនួនមិនអាចទទួលបានទេ។
លោក ផៃ ស៊ីផាន បានថ្លែងថា ៖ «គេអាចនិយាយហ្នឹងគឺគ្រាន់តែនិន្នាការនៃរបាយការណ៍ ហើយខ្វះមូលដ្ឋានពិតនៃលទ្ធិប្រជាធិបតេយ្យនិងការគោរពសិទ្ធិមនុស្ស។ ដូចខ្ញុំបានជម្រាបថា រាជរដ្ឋាភិបាលកម្ពុជាកំពុងតែពង្រឹងបន្ថែមទៀត ទាំងគោលការណ៍នយោបាយក៏ដូចជាស្ថាប័នក្នុងកិច្ចការពារសិទ្ធិប្រជាពលរដ្ឋ»។
នៅក្នុងឆ្នាំ២០០៩កន្លងទៅនេះ រដ្ឋាភិបាលបានធ្វើរបាយការណ៍ជូនក្រុមប្រឹក្សាសិទ្ធិមនុស្សរបស់អង្គការសហប្រជាជាតិទាក់ទងជាមួយស្ថានភាពសិទ្ធិមនុស្សរបស់ប្រទេសកម្ពុជា នៅទីស្នាក់ការធំ ក្នុងទីក្រុងហ្សឺណែវ ប្រទេសស្វីស ដោយប្រទេសចូលរួមស្តាប់មានការចាប់អារម្មណ៍លើកយកបញ្ហាការជម្លៀសប្រជាពលរដ្ឋចេញពីដីលំនៅឋានមកចោទសួរតំណាងរដ្ឋាភិបាលកម្ពុជាដែលបានចូលរួមប្រជុំយ៉ាងក្តៅគគុកផងដែរ៕