លោក អ៊ូច ឡេង អះអាងថា អ្នកភូមិមិនបានបង្ខាំងអ្នកស្រី ឈាង គឹមស៊ុន ដែលជាតំណាងក្រុមហ៊ុនកំពង់ស្ពឺ ស៊ូហ្គា នោះទេ អ្នកភូមិគ្រាន់តែបិទផ្លូវចូលទៅក្នុងចម្ការអំពៅ ដើម្បីចង់ឲ្យអ្នកស្រីចេញមកដោះស្រាយវិបត្តិដីធ្លីដែលអ្នកស្រីបានសន្យាថា នឹងដោះស្រាយជូនអ្នកភូមិប៉ុណ្ណោះ។
លោក អ៊ូច ឡេង មានប្រសាសន៍ដូច្នេះ ៖ «យើងអាចធ្វើសាក្សីបាន អ្នកភូមិមិនបានបង្ខាំងអ្នកស្រី (ឈាង គឹមស៊ុន)ទេ អ្នកភូមិគ្រាន់តែចង់ដោះស្រាយ។ ថ្ងៃនោះអ្នកស្រីបានចេញទៅហូបបាយ និងមានកម្លាំងប៉េអឹមការពារអ្នកស្រី»។
តំណាងអ្នកភូមិចំនួនបីរូបនៅស្រុកថ្ពង ខេត្តកំពង់ស្ពឺ ឈ្មោះ យូ ថូ អាយុ ៦០ឆ្នាំ នៅភូមិអូរអង្គំ ឈ្មោះ ផល វណ្ណៈ នៅភូមិគោក និងឈ្មោះ អឿង ជីវ៉ា នៅភូមិអូរពន្លក ត្រូវបានក្រសួងមហាផ្ទៃនៃការិយាល័យព្រហ្មទណ្ឌកម្រិតធ្ងន់ កោះហៅឲ្យចូលបំភ្លឺជុំវិញបណ្តឹងរបស់អ្នកស្រី ឈាង គឹមស៊ុន។
អ្នកស្រី ឈាង គឹមស៊ុន បានប្តឹងតំណាងអ្នកភូមិទាំងបីរូប ក្រោយពីអ្នកភូមិនៅឃុំអមលាំង ធ្វើបាតុកម្មបិទផ្លូវលេខ៥២ មិនឲ្យអ្នកស្រីចេញចូលទៅក្នុងចម្ការអំពៅ កាលពីថ្ងៃទី២៣ ខែសីហាកន្លងទៅ ដើម្បីបង្ខំអ្នកស្រីឲ្យដោះស្រាយបញ្ហាវិវាទដីធ្លី។
មន្ត្រីសិទ្ធិមនុស្សបានឲ្យដឹងថា អ្នកស្រី ឈាង គឹមស៊ុន កំពុងប្រើយុទ្ធសាស្ត្រថ្មីមួយទៀត ដើម្បីបំបាក់អ្នកភូមិ ក្រោយពីអ្នកស្រីយកតុលាការមកប្រើប្រាស់ មិនបានសម្រេចជាមួយអ្នកភូមិ។
វិទ្យុអាស៊ីសេរីពុំទាន់អាចទាក់ទងអ្នកស្រី ឈាង គឹមស៊ុន ជាតំណាងក្រុមហ៊ុនកំពង់ស្ពឺ ស៊ូហ្គា ដើម្បីសុំពន្យល់ចំពោះករណីខាងលើនេះបាននៅឡើយនៅថ្ងៃទី៨ ខែកញ្ញា ឆ្នាំ២០១០៕