មន្ត្រីគណៈកម្មាធិការសិទ្ធិមនុស្សរបស់រដ្ឋាភិបាលកម្ពុជា មានប្រសាសន៍ថា របាយការណ៍របស់អង្គការលីកាដូ (Licadho) មិនបានឆ្លុះបញ្ចាំងពីការពិតអំពីបញ្ហាសិទ្ធិមនុស្សនៅកម្ពុជានោះទេ។
អនុប្រធានគណៈកម្មាធិការសិទ្ធិមនុស្សរបស់រដ្ឋាភិបាលកម្ពុជា លោក ម៉ក់ សម្បត្តិ នៅថ្ងៃច័ន្ទ ទី៦ កញ្ញា បានហៅរបាយការណ៍របស់អង្គការលីកាដូ ដែលបានផ្សាយកាលពីសប្ដាហ៍មុន អំពីការធ្វើបាបអ្នកការពារសិទ្ធិមនុស្សនៅកម្ពុជាថា ជារបាយការណ៍របស់អង្គការតែមួយ ដែលមិនអាចបង្ហាញពីភាពធ្លាក់ចុះនៃសិទ្ធិមនុស្សនៅកម្ពុជាបាននោះឡើយ។
ការបដិសេធរបស់គណៈកម្មាធិការសិទ្ធិមនុស្សរបស់រដ្ឋាភិបាលកម្ពុជា ធ្វើឡើងក្រោយពេលដែលអង្គការលីកាដូ បានរកឃើញថា យ៉ាងហោចណាស់ក៏មានអ្នកការពារសិទ្ធិមនុស្សនៅកម្ពុជាចំនួន ៦៦នាក់ ត្រូវបានអាជ្ញាធរ និងតុលាការកម្ពុជា រំលោភបំពានយ៉ាងធ្ងន់ធ្ងរ ដោយបានចាប់ខ្លួនពួកគាត់ដាក់ពន្ធនាគារ ដោយសារតែពួកគាត់ធ្វើការតស៊ូមតិជួយប្រជាពលរដ្ឋដែលត្រូវបានគេរំលោភសិទ្ធិ។
លោក ម៉ក់ សម្បត្តិ បន្តទៀតថា ការរិះគន់របស់អង្គការក្រៅរដ្ឋាភិបាលកន្លងមក វាគ្មានអ្វីប្លែកនោះទេ ហើយលោកក៏បានចោទប្រកាន់អង្គការ លីកាដូ ថា មិនបានសហការជាមួយនឹងគណៈកម្មាធិការសិទ្ធិមនុស្សរបស់រដ្ឋាភិបាលកម្ពុជា ដើម្បីពិនិត្យមើលរបាយការណ៍ មុនពេលចេញផ្សាយរបាយការណ៍របស់ខ្លួន។
លោក ម៉ក់ សម្បត្តិ បន្ថែមទៀតថា រដ្ឋាភិបាលនៅមិនបានធ្វើការគាបសង្កត់ ទៅលើអ្នកការពារសិទ្ធិមនុស្សនៅកម្ពុជាទេ ហើយការចាប់ខ្លួនអ្នកទាំងនោះ គឺដោយសារពួកគេបានប្រព្រឹត្តបទល្មើស។
អង្គការ លីកាដូ កាលពីថ្ងៃទី១ ខែកញ្ញា បានផ្សាយរបាយការណ៍រយៈពេល ២ឆ្នាំរបស់ខ្លួន ដែលមានចំណងជើងថា ការវាយប្រហារ និងការគំរាមកំហែងចំពោះអ្នកការពារសិទ្ធិមនុស្សនៅកម្ពុជា ដោយបានចាប់ផ្ដើមកត់ត្រាតាំងពីខែមករា ឆ្នាំ២០០៨ ដល់ខែធ្នូ ឆ្នាំ២០០៩ បានរកឃើញថា ក្នុងរយៈពេល ២ឆ្នាំចុងក្រោយនេះ អ្នកការពារសិទ្ធិមនុស្សនៅកម្ពុជា បានប្រឈមមុខនឹងបរិយាកាសគ្រោះថ្នាក់កាន់តែច្រើនឡើង ដូចជាការទទួលរងអំពើហិង្សាផ្នែករាងកាយ ការចាប់ខ្លួនដោយខុសច្បាប់ ការប្រឌិតរឿង ដើម្បីធ្វើការចោទប្រកាន់លើបទល្មើសព្រហ្មទណ្ឌ ការរារាំងមិនឲ្យមានការប្រមូលផ្ដុំ និងការដើរហើរ និងការបណ្ដេញពលរដ្ឋចេញពីលំនៅឋានដោយបង្ខំជាដើម។
របាយការណ៍បន្ថែមទៀតថា តុលាការកំពុងប្រើមធ្យោបាយដោះលែងឲ្យនៅក្រៅឃុំជាបណ្ដោះអាសន្ន ដើម្បីព្រមានកុំឲ្យអ្នកការពារសិទ្ធិមនុស្ស ហ៊ានបន្តការងាររបស់ពួកគេក្នុងការជួយការពារសិទ្ធិប្រជាពលរដ្ឋ។ អ្នកការពារសិទ្ធិមនុស្សដែលត្រូវបានដោះលែងឲ្យនៅក្រៅឃុំ ត្រូវបានបង្គាប់បញ្ជាឲ្យបញ្ឈប់សកម្មភាពរបស់ពួកគេ ក្នុងការចូលរួមជួយប្រជាពលរដ្ឋក្នុងជម្លោះដីធ្លី ការតវ៉ា ឬក៏បំបាក់ស្មារតីសកម្មភាពដោយប្រយោលពីការបន្តកិច្ចការសិទ្ធិមនុស្សរបស់ពួកគេ ដោយគំរាមពន្យារពេលការចោទប្រកាន់របស់ពួកគេ។
ប្រធានអង្គការលីកាដូ លោកស្រី ពុង ឈីវកេក នៅថ្ងៃច័ន្ទ ទី៦ កញ្ញា បានសម្ដែងការសោកស្ដាយចំពោះគណៈកម្មាធិការសិទ្ធិមនុស្សរបស់រដ្ឋាភិបាលកម្ពុជា ដែលមិនព្រមទទួលយករបាយការណ៍របស់អង្គការលីកាដូ។ លោកស្រីបន្តទៀតថា រដ្ឋាភិបាលគួរតែសហការជាមួយអង្គការលីកាដូ ដើម្បីបញ្ចប់ការធ្វើបាបទៅលើអ្នកការពារសិទ្ធិមនុស្សនៅកម្ពុជា។
របាយការណ៍របស់អង្គការលីកាដូបានចេញផ្សាយ ២ថ្ងៃ បន្ទាប់ពីតុលាការខេត្តតាកែវ កាលពីថ្ងៃទី៣០ សីហា បានសម្រេចកាត់ទោសបុគ្គលិករដ្ឋបាលអង្គការលីកាដូ លោក លាង សុខជឿន ឲ្យជាប់គុកចំនួន ២ឆ្នាំ និងពិន័យប្រាក់ចំនួន ២លានរៀល ពីបទផ្សាយព័ត៌មានមិនពិត ដោយចោទថា លោកបានបាចខិត្តប័ណ្ណប្រឆាំងរដ្ឋាភិបាល។
ការកាត់ទោស លោក លាង សុខជឿន បានធ្វើឲ្យមានប្រតិកម្មយ៉ាងខ្លាំងពីសំណាក់អង្គការសិទ្ធិមនុស្សជាតិ និងអន្តរជាតិ ដោយអង្គការទាំងនោះចោទប្រកាន់ថា ការកាត់ទោសនេះជាការបង្ហាញពីការខ្វះខាតភាពឯករាជ និងភាពមិនលម្អៀងរបស់តុលាការ ដែលជារឿយៗត្រូវបានប្រើជាមធ្យោបាយប្រឆាំងនឹងអ្នកមានអំណាចតិចតួច ជាជាងការការពារសិទ្ធិរបស់អ្នកទាំងនោះ។ អង្គការសិទ្ធិមនុស្សបានលើកឡើងថា ការចោទប្រកាន់ពីបទផ្សាយព័ត៌មានមិនពិត ឬបរិហារកេរ្តិ៍ គឺជាមធ្យោបាយដែលប្រើដោយរដ្ឋាភិបាលកម្ពុជា ដើម្បីបង្កើតបរិយាកាសភ័យខ្លាច៕