លោក យ៉ែម បុញ្ញឫទ្ធិ អគ្គលេខាធិការបក្សនិងជាតំណាងរាស្ត្រមណ្ឌលព្រៃវែងរបស់គណបក្សសិទ្ធិមនុស្ស មានប្រសាសន៍ប្រាប់វិទ្យុអាស៊ីសេរីថា សន្និបាតក្រុមប្រឹក្សាជាតិលើកនេះនឹងធ្វើឡើងតាមលក្ខន្តិកៈនិងបទបញ្ជាផ្ទៃក្នុងរបស់គណបក្ស គឺ២ឆ្នាំត្រូវធ្វើម្តង។
លោក យ៉ែម ប៉ុញ្ញារិទ្ធ បានបញ្ជាក់ថា ៖ «នៅក្នុងហ្នឹងកម្មវិធីដែលសំខាន់ គឺធ្វើរបាយការណ៍សកម្មភាពពីឆ្នាំកន្លងផុតមក ដើម្បីសុំឲ្យក្រុមប្រឹក្សាជាតិគាត់ពិនិត្យមើល ថាតើថ្នាក់ដឹកនាំអនុវត្តគោលការណ៍ពីមុនមកហ្នឹងមានការខុសឆ្គងឬក៏ខ្វះខាតចន្លោះត្រង់ណាខ្លះ? ហ្នឹងចំណុចសំខាន់ទី១។ ចំណុចសំខាន់ទី២ ថ្នាក់ដឹកនាំនឹងលើកជូនទៅអង្គសន្និបាតនូវទិសដៅនិងគោលនយោបាយថ្ងៃអនាគត២ឆ្នាំទៅមុខទៀត ហើយនិងធ្វើការពិភាក្សាពីថ្នាក់ក្រុមប្រឹក្សាជាតិទាំងមូល អង្គសន្និបាតហ្នឹង ថាតើគួរថែមថយទិសដៅនិងគោលនយោបាយអ្វីខ្លះក្នុងរយៈពេល២ឆ្នាំទៅមុខ?»។
លោកអគ្គលេខា យ៉ែម បុញ្ញឫទ្ធិ ក៏ប្រាប់ឲ្យដឹងថែមទៀតថា ក្នុងសន្និបាតលើកនេះនឹងមានការចូលរួមពីសមាជិកក្រុមប្រឹក្សាជាតិគណបក្សសិទ្ធិមនុស្សទាំង៣០០រូបនាទីស្នាក់ការកណ្តាលរបស់បក្ស ហើយក្នុងឱកាសនោះក៏នឹងលើកយករឿងពិសេសមួយមកពិភាក្សាផងដែរ គឺរឿងសម្ព័ន្ធភាពជាមួយគណបក្សសមរង្ស៊ី។
លោក យ៉ែម បុញ្ញឫទ្ធិ បានមានប្រសាសន៍ថា ៖ «ហើយសំខាន់នៅក្នុងសន្និបាតហ្នឹង ដូចខ្ញុំជម្រាបជូនអ៊ីចឹង សំខាន់គឺការងារទៅមុខទៀត តើយើងត្រូវធ្វើម៉េចខ្លះជុំវិញសម្ព័ន្ធភាពរវាងអ្នកប្រជាធិបតេយ្យ?»៕