លោក ហ៊ូ ជិនតាវ មកទស្សនកិច្ចនៅកម្ពុជានេះ តាមការអញ្ជើញពីព្រះមហាក្សត្រ សម្ដេចព្រះបរមនាថ ព្រះបាទ នរោត្ដម សីហមុនី សម្រាប់រយៈពេល ៤ថ្ងៃ គឺពីថ្ងៃទី៣០ ខែមីនា ដល់ថ្ងៃទី ២ ខែមេសា ឆ្នាំ២០១២ ដើម្បីរឹតចំណងមិត្តភាពរវាងប្រទេសទាំងពីរ (កម្ពុជា-ចិន)។
គេឃើញមានវត្តមានរបស់មន្ត្រីរដ្ឋាភិបាលមួយចំនួនមកទទួលស្វាគមន៍ការមកដល់របស់លោក ហ៊ូ ជិនតាវ។ ក្នុងនោះមានដូចជា រដ្ឋមន្ត្រីព្រះបរមរាជវាំង លោក គង់ សំអុល រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ និងមន្ត្រីស្ថានទូតចិន នៅកម្ពុជា។
ដំណើរទស្សនកិច្ចរបស់លោក ហ៊ូ ជិនតាវ នៅពេលនេះ គឺស្របពេលដែលកម្ពុជា ធ្វើជាប្រធានអាស៊ាន ឆ្នាំ២០១២ ដែលបានបើកកិច្ចប្រជុំអាស៊ាន នៅថ្ងៃទី៣០ ខែមីនា ដល់ថ្ងៃទី៤ ខែមេសា ឆ្នាំ២០១២។
នៅមុនទស្សនកិច្ចនេះ ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសកម្ពុជា លោក ហោ ណាំហុង បានប្រកាសរួចហើយ នៅថ្ងៃទី២៦ ខែមីនា ឆ្នាំ២០១២ ថា កម្ពុជានឹងមិនលើកយកបញ្ហាសមុទ្រចិនខាងត្បូងមកពិភាក្សានិងដោះស្រាយទេ ពីព្រោះ កម្ពុជាមិនចង់ធ្វើអន្តរជាតិភាវូបនីយកម្មលើបញ្ហានេះ។ ជារួម ការប្រកាសជំហរបែបនេះ គឺស្របតាមការចង់បានរបស់ប្រទេសចិនកន្លងមក។
តាមការបញ្ជាក់ពីអ្នកនាំពាក្យក្រសួងការបរទេសកម្ពុជា លោក កុយ គួង នៅថ្ងៃ៣០ ខែមីនា នេះ បានឲ្យដឹងថា ទំហំវិនិយោគរបស់ប្រទេសចិន នៅកម្ពុជា នៅឆ្នាំ២០១១ កន្លងទៅនេះ មានចំនួនជាង ១ពាន់លានដុល្លារអាមេរិក៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។