សេចក្ដីប្រកាសសិទ្ធិមនុស្សអាស៊ាននឹងត្រូវអនុម័តឲ្យប្រើប្រាស់នៅខែវិច្ឆិកា
in.mp3
ប្រធានប្ដូរវេននៃគណៈកម្មការអន្តររដ្ឋាភិបាលសិទ្ធិមនុស្សអាស៊ាន និងជាប្រធានគណៈកម្មាធិការសិទ្ធិមនុស្សកម្ពុជា បានអះអាងថា គេហទំព័រ និងកូនសៀវភៅ គឺជាសមិទ្ធផលថ្មីដែលបង្ហាញពីព័ត៌មានសំខាន់ៗរបស់ AICHR នៅមុនពេលដែលសេចក្ដីព្រាងសេចក្ដីប្រកាសសិទ្ធិមនុស្សអាស៊ានត្រូវបានអនុម័ត។
សេចក្ដីប្រកាសស្ដីពីសិទ្ធិមនុស្សអាស៊ាន នឹងត្រូវអនុម័តអោយប្រើប្រាស់ជាផ្លូវការនៅក្នុងកិច្ចប្រជុំពេញអង្គអាស៊ាន ក្នុងខែវិច្ឆិកា ខាងមុខ បើទោះជាអង្គការមិនមែនរដ្ឋាភិបាលនៅតែបន្តរិះគន់ថា សេចក្ដីប្រកាសនោះនឹងពុំអាចការពារសិទ្ធិពលរដ្ឋអោយបានពេញលេញ។
ប្រធានប្ដូរវេននៃគណៈកម្មាធិការអន្តររដ្ឋាភិបាលទទួលបន្ទុកសិទ្ធិមនុស្សអាស៊ាន និងជាប្រធានគណៈធម្មាធិការសិទ្ធិមនុស្សកម្ពុជា លោក ទេសរដ្ឋមន្ត្រី ឱម យ៉ិនទៀង បានបញ្ជាក់ជាថ្មីពីគម្រោងអនុម័តសេចក្ដីប្រកាសសិទ្ធិមនុស្សអាស៊ាន នៅក្នុងពិធីសម្ពោធបើកគេហទំព័រ និងកូនសៀវភៅស្ដីពី គណៈកម្មាធិការអន្តររដ្ឋាភិបាលទទួលបន្ទុកសិទ្ធិមនុស្សអាស៊ាន។
លោក ឱម យ៉ិនទៀង បន្តថា សេចក្ដីប្រកាសស្ដីពីសិទ្ធិមនុស្សអាស៊ាន គឺជាឯកសារស្ដីពីឆន្ទៈនយោបាយដែលមិនមែនជាអត្ថបទច្បាប់៖ «បើជាអត្ថបទច្បាប់និយាយពីបង្កើតនេះបង្កើតនោះ វិធានការស្អីៗ ពាក់ព័ន្ធបញ្ហាបទល្មើសបញ្ហាអី តែបើជាអត្ថបទនយោបាយវាជាបង្ហាញនូវសុច្ឆន្ទៈរបស់ថ្នាក់ដឹកនាំប្រទេសទាំង១០។ អ្វីដែលយើងនឹងសម្ពោធនៅខែ១១ ខាងមុខនេះ វានឹងបង្ហាញនូវអ្វីដែលប្រទេសទាំង ១០ បានឯកភាពគ្នា ហើយកុំបារម្ភថា ប៉ុណ្ណឹងវាមិនទាន់គ្រប់គ្រាន់ យើងនៅមានពេលទៅមុខទៀត។ យើងនៅមានកិច្ចការខ្លះយើងធ្វើជាអនុសញ្ញា មិនមែនជាសេចក្ដីថ្លែងការណ៍ទេ។ សេចក្ដីថ្លែងការណ៍គឺមិនមែនជាច្បាប់»។
ការបញ្ជាក់របស់លោក ឱម យ៉ិនទៀង គឺបន្ទាប់ពីក្រុមអង្គការមិនមែនរដ្ឋាភិបាលបានលើកឡើងថា សេចក្ដីប្រកាសសិទ្ធិមនុស្សអាស៊ានពុំមានលក្ខខណ្ឌគ្រប់គ្រាន់ក្នុងការចាប់បង្ខំអោយមានការគោរពសិទ្ធិមនុស្សក្នុងតំបន់។
ស្របគ្នានេះក្រុមអង្គការមិនមែនរដ្ឋាភិបាលមួយចំនួននៅក្នុងបណ្ដាប្រទេសជាសមាជិកអាស៊ាន ដែលបានជួបប្រជុំក្នុងរាជធានីភ្នំពេញ បានចេញសេចក្ដីថ្លែងការណ៍រួមដោយលើកឡើងថា សេចក្ដីប្រកាសសិទ្ធិមនុស្សអាស៊ានគឺទាបជាងបទដ្ឋាននៃសេចក្ដីថ្លែងការណ៍ជាសកល ស្ដីពីសិទ្ធិមនុស្សរបស់អង្គការសហប្រជាជាតិ។
ប្រធានលេខាធិការដ្ឋាននៃគណៈកម្មាធិការប្រព្រឹត្តិកម្មការពារសិទ្ធិមនុស្សកម្ពុជា លោក សួន ប៊ុនសក្តិ មានប្រសាសន៍ថា នៅពេលដែលសេចក្ដីប្រកាសពុំបានធានាសិទ្ធិអោយបានពេញលេញនោះការបង្កើតបទដ្ឋានច្បាប់ផ្សេងៗទៀត នឹងមិនអាចមានភាពរឹងមាំឡើយ៖ «សេចក្ដីថ្លែងការណ៍គួរតែចែងអំពីខ្លឹមសារសិទ្ធិមនុស្ស ជាគោលជាក្រមសីលធម៌មួយអោយខ្ពស់មែនទែនទៅ។ បើចែងសេចក្ដីថ្លែងការណ៍ ដែលមានកម្រិតខ្ពស់វានាំអោយមានជាមូលដ្ឋានល្អក្នុងការបង្កើតជាឧបករណ៍ផ្សេងៗទៀតក៏ងាយនឹងបកស្រាយ ហើយមានទម្ងន់ថា ត្រូវតែធ្វើផ្អែកតាមស្មារតីនៃសេចក្ដីថ្លែងការណ៍ហ្នឹង»។
តំណាងការិយាល័យឧត្ដមក្រុមប្រឹក្សាសិទ្ធិមនុស្សនៃអង្គការសហប្រជាជាតិប្រចាំនៅកម្ពុជា លោក ជេម ហ៊ីណាន (James Heenan) បានលើកឡើងថា ទោះជាបែបណាលោករំពឹងទុកថា សេចក្ដីប្រកាសសិទ្ធិមនុស្សអាស៊ាននឹងមានបទដ្ឋានមិនទាបជាងបទដ្ឋានសិទ្ធិមនុស្សអន្តរជាតិឡើយ៖ «សេចក្ដីព្រាង សេចក្ដីប្រកាសហ្នឹង តាមខ្ញុំយល់ គឺពុំបានផ្សព្វផ្សាយជាសាធារណៈ ហើយយើងគ្រប់គ្នាបានព្យាយាមស្វែងរក និងចង់ពិនិត្យមើលថា តើគេបានចែងពីអ្វីខ្លះ។ ប៉ុន្តែពុំអាចដឹងបាននៅមុនកិច្ចប្រជុំរបស់រដ្ឋមន្ត្រីការបរទេស។ ទោះយ៉ាងណា ដូចខ្ញុំបានលើកឡើងយើងបានឃើញថា រដ្ឋជាសមាជិក (អាស៊ាន) បានប្ដេជ្ញាថា នឹងមិនអោយសេចក្ដីប្រកាសនេះមានតម្លៃទាបជាងបទដ្ឋានសិទ្ធិមនុស្សអន្តរជាតិឡើយ»។
គណៈកម្មាធិការអន្តររដ្ឋាភិបាលទទួលបន្ទុកសិទ្ធិមនុស្សអាស៊ានបានបង្កើតឡើងនៅក្នុងខែតុលា ឆ្នាំ២០០៩។ ក្នុងរយៈពេល ៣ឆ្នាំកន្លងទៅ គណៈកម្មាធិការនេះបានបំពេញការងារសម្របសម្រួលក្នុងចំណោមប្រទេសជាសមាជិកអាស៊ានទាំង១០ ក្នុងការរកចំណុចរួម ដើម្បីបង្កើតអោយបានសេចក្ដីប្រកាសសិទ្ធិមនុស្សអាស៊ាន ដែលគេជឿជាក់ថា គឺជាជំហានក្នុងការជំរុញការគោរពសិទ្ធិមនុស្សក្នុងតំបន់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
