អាជ្ញាធរស្រុកសណ្ដាន់ ខែត្រកំពង់ធំ បានគំរាមចាប់ខ្លួនសកម្មជនសិទ្ធិមនុស្ស ប្រសិនបើមន្ត្រីសិទ្ធិមនុស្សនៅតែបន្តបើកវគ្គបណ្ដុះបណ្ដាលខ្លីស្ដីពីសិទ្ធិមនុស្ស និងការការពារព្រៃឈើនៅក្នុងឃុំមានឫទ្ធិ នៅព្រឹកថ្ងៃទី៧ ខែកញ្ញានេះ។
មន្ត្រីសម្របសម្រួលគម្រោងវេទិកាសាធារណៈ និងបណ្ដុះបណ្ដាលនៃមជ្ឈមណ្ឌលសិទ្ធិមនុស្សកម្ពុជា (CCHR) លោក ឈឹម សាវុធ បានរៀបរាប់ថា នៅវេលាម៉ោង ៨ព្រឹក ថ្ងៃទី៧ ខែកញ្ញា អភិបាលរងស្រុកសណ្ដាន់ ឈ្មោះ ទីវ ហុក និងអធិការស្រុកនេះ មានកម្លាំងនគរបាល និងកងរាជអាវុធហត្ថប្រមាណ ២០នាក់ បានទៅគំរាមកំហែង ថែមទាំងថតរូបអ្នកចូលរួម និងថតស្លាកលេខឡានទាំងអស់ មិនអនុញ្ញាតឲ្យមជ្ឈមណ្ឌលសិទ្ធិមនុស្ស និងអង្គការការពារធនធានធម្មជាតិបើកវគ្គបណ្ដុះបណ្ដាលទេ។
លោក ឈឹម សាវុធ បានបញ្ជាក់ថា គោលបំណងសំខាន់ដែលមជ្ឈមណ្ឌលសិទ្ធិមនុស្សកម្ពុជា និងអង្គការការពារធនធានធម្មជាតិទៅបើកវគ្គបណ្ដុះបណ្ដាលនេះ ដោយសារតែមានសំណើពីប្រជាពលរដ្ឋ ហើយលោកក៏បានផ្ញើលិខិតជូនដំណឹងទៅសាលាខែត្រ និងទៅអាជ្ញាធរមូលដ្ឋាននៅទីនោះរួចរាល់ហើយដែរ។
អភិបាលស្រុកសណ្ដាន់ លោក ស៊ឹម វណ្ណា មានប្រសាសន៍ថា សមត្ថកិច្ចរបស់លោកបានរារាំងនោះ ធ្វើទៅតាមបញ្ជារបស់អភិបាលខែត្រ ពីព្រោះថា អង្គការទាំងពីរនេះពុំមានស្នាក់ការប្រចាំការនៅខែត្រនេះទេ។
មន្ត្រីស៊ើបអង្កេតជាន់ខ្ពស់នៃអង្គការសិទ្ធិមនុស្សលីកាដូ លោក អំ សំអាត បានពន្យល់ថា គ្មានច្បាប់ណាមួយហាមឃាត់មិនឲ្យអង្គការមិនមែនរដ្ឋាភិបាលធ្វើសកម្មភាពនៅតាមខែត្រនោះទេ ពីព្រោះថា អង្គការទាំងនេះមានច្បាប់អនុញ្ញាតពីក្រសួងមហាផ្ទៃ សម្រាប់អនុវត្តការងាររបស់ខ្លួននៅទូទាំងប្រទេសរួចហើយនោះ ហើយអង្គការទាំងនេះគ្រាន់តែជូនដំណឹងទៅខាងខែត្រ ឬអាជ្ញាធរមូលដ្ឋានរួចហើយនោះ គេអាចធ្វើការងាររបស់ខ្លួនបាន។
អភិបាលរងខែត្រកំពង់ធំ លោក អ៊ុត សំអន មានប្រសាសន៍ថា ការរារាំងវគ្គបណ្ដុះបណ្ដាលនេះ ដោយសារតែអាជ្ញាធរស្រុក និងមន្ត្រីសិទ្ធិមនុស្សខ្វះការទំនាក់ទំនងគ្នា។
អាជ្ញាធរស្រុកសណ្ដាន់ រារាំង និងគំរាមកំហែងអង្គការទាំងពីរនេះជាលើកទីពីរហើយ បន្ទាប់ពីអង្គការទាំងពីរបានបើកវគ្គបណ្ដុះបណ្ដាលដូចគ្នានៅក្នុងបរិវេណវត្តគីរីបុព្វតារាម ដែលព្រះចៅអធិការវត្តបានអនុញ្ញាត តែអាជ្ញាធរហាមឃាត់។
ខែត្រកំពង់ធំ ជាខែត្រមួយមានផ្ទៃដីធំទី២ នៃប្រទេសកម្ពុជា។ ខែត្រនេះភាពចម្រូងចម្រាសអំពីការកាប់ឈើអនាធិបតេយ្យរបស់ឈ្មួញ និងបញ្ហាផ្ដល់ដីសម្បទានសេដ្ឋកិច្ចរបស់រដ្ឋាភិបាលប៉ះពាល់លើផ្ទៃដីព្រៃស្រោង ឬព្រៃឡង់ ធ្វើឲ្យប៉ះពាល់ដល់ការរស់នៅប្រជាពលរដ្ឋនៅទីនោះ ពិសេសជនជាតិភាគតិចកួយ។
ក្រុមមន្ត្រីសិទ្ធិមនុស្ស បានលើកឡើងថា ការរារាំងរបស់សមត្ថកិច្ចនេះជាអំពើរំលោភសិទ្ធិមនុស្ស និងបិទសិទ្ធិសេរីភាពខាងបញ្ចេញមតិ សិទ្ធិទទួលព័ត៌មានរបស់ប្រជាពលរដ្ឋ។
អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិមនុស្ស ប្រចាំនៅកម្ពុជា លោក សុរិយា ស៊ូប៊ែឌី (Surya Subedi) បន្ទាប់ពីលោកបានបញ្ចប់បេសកកម្មរបស់លោកនៅកម្ពុជា លើកទី៥ កាលពីខែមិថុនា កន្លងទៅ បានលើកឡើងថា មនុស្សជាច្រើនមានការភ័យខ្លាចមិនហ៊ានបញ្ចេញមតិ ហើយកំពុងតែរឹតត្បិតសេរីភាពរបស់ខ្លួនឯង។ ស្ថានការណ៍សិទ្ធិមនុស្សមានភាពល្អប្រសើរក្នុងវិស័យមួយចំនួន ប៉ុន្តែនៅមានបញ្ហាមួយចំនួនទៀតដែលមិនទាន់បានប្រសើរនៅឡើយ ដូចជាសិទ្ធិដីធ្លី ការបណ្ដេញចេញ និងសេរីភាពបញ្ចេញមតិ៕