នៅក្នុងសន្និសីទកាសែត នៅឯវិមានសន្តិភាពនៅថ្ងៃទី ២២ ខែកក្កដា ឆ្នាំ ២០១១ លោកនាយករដ្ឋមន្ត្រី ហ៊ុន សែន នៅថ្ងៃទី ២២ ខែកក្កដា ឆ្នាំ ២០១១ បានលាតត្រដាងឲ្យដឹងអំពីឯកសារសំងាត់មួយ ដែលលោកបានទទួលពីរដ្ឋមន្ត្រីក្រសួងការបរទេសឥណ្ឌូណេស៊ី លោក ម៉ាទី ណាតាឡេហ្គាវ៉ា (Marty Natalegawa) អំពីការដោះស្រាយជម្លោះព្រំដែនកម្ពុជា និងថៃ។
លោក ហ៊ុន សែន បានអះអាងថា លោកនឹងរាយការណ៍ជូនតុលាការយុត្តិធម៌អន្តរជាតិក្រុងឡាអេ នៅពេលឆាប់ៗ នេះ ដោយសារតែភាគីថៃ នៅតែជំទាស់រាល់ពាក្យ និងខ្លឹមសារសំខាន់ៗ ក្នុងការអនុវត្តតាមដីកាបង្គាប់កន្លងមក។
នៅចំពោះមុខអ្នកកាសែត លោក ហ៊ុន សែន បានលើកបង្ហាញលិខិតសំងាត់មួយ ដែលមានបោះត្រាអក្សរធំៗ ជាភាសាអង់គ្លេសថា ខន់ហ្វីដិនហ្សល (Confidential) ឬរក្សាការសំងាត់។ លិខិតនេះ គឺជាសេចក្ដីព្រាងនៃសេចក្ដីថ្លែងការណ៍របស់ប្រធានអាស៊ាន អំពីការដោះស្រាយជម្លោះព្រំដែនកម្ពុជា និងថៃ។
លោកនាយករដ្ឋមន្ត្រី ហ៊ុន សែន មានប្រសាសន៍ថា លោកចាំបាច់ត្រូវតែលាតត្រដាងនូវឯកសារសំងាត់នេះ ដើម្បីឲ្យអន្តរជាតិដឹងឮអំពីឥរិយាបថ ឬភាពក្រឡេចក្រឡុចរបស់ភាគីថៃ មិនចង់ដោះស្រាយ នៅគ្រាដែលភាគីកម្ពុជាគាំទ្រទាំងស្រុង ៖ «ខ្ញុំស្នើជូនឯកឧត្ដម ហោ ណាំហុង បើសិនជាសេចក្ដីថ្លែងការណ៍នេះ ចេញមិនរួច សុំបញ្ជូនសេចក្ដីថ្លែងការណ៍នេះ ទៅតុលាការឡាអេទៀត ដើម្បីឲ្យតុលាការយុត្តិធម៌អន្តរជាតិក្រុងឡាអេ បានយល់ បានដឹងអំពីឥរិយាបថរបស់ថៃ ចំពោះសាលដីកាសម្រេចនេះយ៉ាងម៉េច»។
លោកបានទទួលលិខិតសំងាត់នេះ នៅថ្ងៃទី ២១ ខែកក្កដា ឆ្នាំ ២០១១ ពីប្រធានអាស៊ាន គឺរដ្ឋមន្ត្រីក្រសួងការបរទេសឥណ្ឌូណេស៊ី លោក ម៉ាទី ណាតាឡេហ្គាវ៉ា។
អ្នកវិភាគនយោបាយ លោក បណ្ឌិត សុខ ទូច មានប្រសាសន៍ថា លោកគាំទ្រចំពោះការប្ដឹងរឿងនេះទៅតុលាការយុត្តិធម៌អន្តរជាតិក្រុងឡាអេ ៖ «ព្រោះសេចក្ដីសម្រេចចង់បានធ្វើរបាយការណ៍ទៅកាន់ឡាអេហ្នឹង។ អ៊ីចឹងទាំងភាគីអាស៊ាន ទាំងភាគីកម្ពុជា ទាំងភាគីថៃ។ អ៊ីចឹងសំដីរបស់រាជរដ្ឋាភិបាល ខ្ញុំជឿថា ជាការត្រឹមត្រូវ»។
តាមការអះអាងរបស់លោក ហ៊ុន សែន បានឲ្យដឹងថា ចំណុចសំខាន់ៗ មួយចំនួន ដែលភាគីថៃ ជំទាស់នោះ មានដូចតទៅ ថៃបានជំទាស់ពាក្យថា (អនុវត្តន៍តាមយ៉ាងពេញលេញ)។ ថៃជំទាស់ពាក្យ (ក្នុងនាមអាស៊ាន)។ ថៃជំទាស់ពាក្យថា (ស្ដីពីជំហានដែលត្រូវដើរទៅមុខ បន្ទាប់ទៀត)។
លោក ហ៊ុន សែន ៖ «យើងគាំទ្រហើយ តែថៃមិនគាំទ្រ។ បើអ៊ីចឹងបញ្ជូនទៅឡាអេទៀត»។
ដីកាបង្គាប់របស់តុលាការយុត្តិធម៌អន្តរជាតិក្រុងឡាអេ ប្រទេសហុល្លង់ ចុះថ្ងៃទី ១៨ ខែកក្កដា មានចំនួន ៣ ចំណុចធំៗ ដែលក្នុងនោះ មានចំណុចមួយ គឺតុលាការបានសម្រេចឲ្យភាគីនីមួយៗ ត្រូវផ្ដល់ព័ត៌មានជូនតុលាការទាក់ទងនឹងការប្រតិបត្តិរបស់ខ្លួន តាមវិធានការបណ្ដោះអាសន្នរបស់តុលាការ៕