មន្ត្រីស្និទ្ធនឹងលោកនាយករដ្ឋមន្ត្រី ហ៊ុន សែន បានបញ្ជាក់ជាថ្មីម្ដងទៀតថា លោក ហ៊ុន សែន បានជាសះស្បើយពីជំងឺរបស់លោកហើយនៅពេលថ្មីនេះ។ ប៉ុន្តែមន្ត្រីរបស់រដ្ឋាភិបាល និងគណបក្សប្រជាជនកម្ពុជាមិនបានបញ្ជាក់ពីប្រភេទនៃជំងឺរបស់លោក ហ៊ុន សែន និងពេលណាទើបលោក ហ៊ុន សែន អាចចូលធ្វើការដឹកនាំរដ្ឋាភិបាលវិញបានទេ។
រដ្ឋលេខាធិការទីស្ដីការគណៈរដ្ឋមន្ត្រី លោក ប្រាក់ សុខុន នៅថ្ងៃអង្គារ ទី១៣ កក្កដា បានបំភ្លឺចម្ងល់របស់គណបក្សប្រឆាំងអំពីស្ថានភាពជំងឺរបស់លោក ហ៊ុន សែន ថា លោក ហ៊ុន សែនបានជាសះស្បើយពីជំងឺរបស់លោកហើយ។ លោក ប្រាក់ សុខុន មិនបានបញ្ជាក់អំពីប្រភេទនៃជំងឺរបស់លោក ហ៊ុន សែន ទេ។
តំណាងរាស្ត្រគណបក្សប្រជាជនកម្ពុជា លោក ជាម យៀប បានមានប្រសាសន៍កាលពីថ្ងៃសៅរ៍ ទី១០ កក្កដាថា លោក ហ៊ុន សែន មានជំងឺភ្នែក ប៉ុន្តែលោកមិនមានព័ត៌មានលំអិតនៅឡើយទេ។
លោក ប្រាក់ សុខុន បានបន្ថែមថា លោក ហ៊ុន សែន ធ្លាប់មានបញ្ហាភ្នែក ប៉ុន្តែឥឡូវនេះ លោក ហ៊ុន សែន គ្មានបញ្ហាភ្នែកទេ ហើយពេលនេះ លោកនាយករដ្ឋមន្ត្រីកំពុងនៅក្នុងប្រទេសកម្ពុជា។
លោក ជាម យៀប មានប្រសាសន៍នៅថ្ងៃអង្គារ ទី១៣ កក្កដាថា លោកទទួលព័ត៌មានថា លោក ហ៊ុន សែន បានទៅត្រួតពិនិត្យជំងឺរបស់គាត់នៅប្រទេសសិង្ហបុរី។ លោកក៏គ្មានព័ត៌មានលំអិតនៅឡើយដែរ។
អ្នកនាំពាក្យគណបក្សប្រឆាំង លោក យឹម សុវណ្ណ នៅថ្ងៃអង្គារ បានទាមទារឲ្យរដ្ឋាភិបាលផ្ដល់ព័ត៌មានអំពីសុខភាពរបស់លោក ហ៊ុន សែន ពីព្រោះប្រជាពលរដ្ឋចង់ដឹងពីស្ថានភាពរបស់លោក។ លោកថា ក្នុងប្រទេសប្រជាធិបតេយ្យ រដ្ឋាភិបាលត្រូវផ្ដល់ព័ត៌មានពីសុខភាពមេដឹកនាំ។ ហើយប្រសិនមេដឹកនាំមានបញ្ហាសុខភាព ត្រូវមានអ្នកជំនួសដើម្បីឲ្យដំណើរការរបស់រដ្ឋាភិបាលនៅតែបន្ត។
អ្នកនាំពាក្យគណៈរដ្ឋមន្ត្រី លោក ផៃ ស៊ីផាន មានប្រសាសន៍នៅថ្ងៃអង្គារថា គណៈរដ្ឋមន្ត្រី នៅមិនទាន់មានរបៀបវារៈដើម្បីប្រជុំនៅសប្ដាហ៍នេះនៅឡើយទេ។
ក្រសួងសុខាភិបាលកាលពីខែមិថុនា បានជូនព័ត៌មានជាសាធារណៈថា លោក ហ៊ុន សែន បានឆ្លងគ្រុនផ្ដាសាយថ្មី A(H1N1) ក្នុងកិច្ចប្រជុំគណៈរដ្ឋមន្ត្រី។ ក្រសួងសុខាភិបាលនៅពេលនោះ បានបញ្ជាក់ថា លោក ហ៊ុន សែន បានជាធូរស្បើយហើយ៕