លោក ហ៊ុន សែន នាយករដ្ឋមន្រ្តីកម្ពុជា បានមានប្រសាសន៍នៅថ្ងៃ៨ កុម្ភៈ ដោយពាក្យសម្ដីធ្ងន់ៗរិះគន់ចំពោះលោក អាភីស៊ិត វេតឆាឈីវ៉ាក់ (Abhisit Vejjajiva) នាយករដ្ឋមន្រ្តីថៃ ដែលបានធ្វើការរិះគន់ចំពោះការធ្វើដំណើរទៅបំពេញទស្សនកិច្ចការងាររបស់លោកនៅតាមព្រំដែនជាមួយភរិយាក្នុងសម្លៀកបំពាក់ទាហាន និងបានហៅកងទ័ពថៃដែលលើកទ័ពមកចូលមកវត្តកែវសិខាគិរីស្វរៈខ្មែរ ថាជាកងទ័ពឈ្លានពាន។
លោកនាយករដ្ឋមន្ត្រី ហ៊ុន សែន បានថ្លែងថា ៖ «លើកមុនបាននិយាយថា ហ៊ុន សែន និយាយដើម្បីប្រជាប្រិយភាព ឥឡូវនេះគឺស្លៀកសម្លៀកបំពាក់យោធាទៅកាន់តំបន់ព្រំដែនគឺដើម្បីផលប្រយោជន៍ខាងនយោបាយ។ ចុះ អាភីស៊ិត ខ្លួនឯងសាកស្លៀកទៅមើល! ស្លៀកទៅ! ស្លៀកខ្លួនឯងនៅក្នុងប្រទេសថៃទៅ! រួចពាក់ស័ក្តិ១ទៅ អាស័ក្តិ១ក្លែងក្លាយនោះ។ លោកឯងថាឲ្យខ្ញុំ ខ្ញុំថាឲ្យលោកឯង លោកឯងមិនបានបំពេញកាតព្វកិច្ចយោធាផង បែរជាឮថា មានស័ក្តិ១ ឥឡូវគេកំពុងតែតាមរករឿង ម៉េចក៏មិនឆ្លើយឲ្យគេ? ហើយពាក់ស័ក្តិចេញមក... ស័ក្តិ១ទៅគោរពអនុពង់ទៅ ទៅគោរពមេទ័ពដទៃទៀតទៅ។ វាទើសក្បាលអីលោកឯងបើខ្ញុំពាក់អាវទាហានមួយជីវិត! សូម្បីតែមុនពេលមកនេះទៅសម្ពោធទីបញ្ជាការកងទ័ពជើងទឹក ខ្ញុំមិនពាក់ទាហាន! ហើយសន្និបាទនៅក្រសួងការពារជាតិ ខ្ញុំមិនពាក់ទាហាន! ហើយទើបនឹងឆោតល្ងង់អាភីស៊ិត ទើបនឹងឆោតល្ងង់ថ្ងៃនេះ អានេះឡប់ៗ ឆ្កួតៗ ឲ្យតែត្រូវមាត់។ កុំថា ខ្ញុំនិយាយអត់ពូជអំបូរ អ្នកឯងអត់ពូជអំបូរៗ បញ្ហាហ្នឹងត្រូវនិយាយឲ្យអ្នកឯងឲ្យច្បាស់ អ្នកឯងគ្មានសិទ្ធិនឹងហាមឃាត់ខ្ញុំមិនឲ្យពាក់ស្អីទេ! ខ្ញុំពាក់អីស្រេចតែក្បាលចិត្តខ្ញុំ កុំឲ្យតែខុសនឹងរដ្ឋធម្មនុញ្ញ និងច្បាប់របស់កម្ពុជាបានហើយ!»។
លោកនាយករដ្ឋមន្រ្តី ហ៊ុន សែន បានមានប្រសាសន៍ទៀតថា ការចោទប្រកាន់ផ្សេងៗរបស់អ្នកដឹកនាំថៃមិនត្រឹមត្រូវ និងមានកាសែតថៃមួយចំនួនបានសរសេមិនត្រឹមត្រូវ។
លោកនាយករដ្ឋមន្ត្រី ហ៊ុន សែន បានអះអាងថា ៖ «តើខ្ញុំនិយាយការពិតឬលោកនិយាយភូត? បញ្ហាស្ថិតនៅកន្លែងហ្នឹង។ ខ្ញុំបាននិយាយការពិតហើយថា កងទ័ពថៃឈ្លានពានកាន់កាប់វត្តកែវសិខាគិរីស្វរៈ បើមិនពិតទេ ឲ្យខ្ញុំរលាយចុះ! តែបើពិត ក៏ឲ្យលោករលាយដែរ! លោកហ៊ានមកប្រដៅខ្ញុំឲ្យនិយាយការពិត តើលោកឯងបាននិយាយការពិតហើយឬនៅ?»។
ការប្រើពាក្យសម្ដីរិះគន់ធ្ងន់ៗចំពោះអ្នកដឹកនាំប្រទេសថៃនេះបានកើតមានក្រោយពេលមានកាសែតថៃជាភាសាអង់គ្លេសមួយចំនួនបានសរសេររិះគន់ចំពោះលោកនាយករដ្ឋមន្រ្តី ហ៊ុន សែន ដោយមានស្រង់សម្ដីអ្នកដឹកនាំប្រទេសថៃផងដែរ។
នៅថ្ងៃទី៨ កុម្ភៈនេះផងដែរ មានប្រភពព័ត៌មានពីតំបន់ប្រាសាទតាមាន់បានឲ្យដឹងថា ទាហានថៃដែលបានចូលកាន់កាប់ប្រាសាទតាមាន់របស់ខ្មែរក្នុងពេលដែលលោកនាយករដ្ឋមន្រ្តីខ្មែរទៅទស្សនកិច្ចក្បែរតំបន់នោះបានដកអស់វិញហើយ។ ជាមួយនេះដែរនៅរសៀលថ្ងៃទី៨ កុម្ភៈនេះ ក្រសួងការបរទេសកម្ពុជាបានរៀបចំសន្និសីទកាសែតមួយ ដោយបានបង្ហាញឯកសារអះអាងថា ប្រាសាទតាមាន់ជារបស់ខ្មែរ៕