លោក ហ៊ុន សែន បានថ្លែងបែបនេះនៅចំពោះមុខអ្នកសារព័ត៌មានជាតិនិងអន្តជាតិជាច្រើន បន្ទាប់ពីលោកវិលត្រឡប់មកពីប្រទេសជប៉ុន ចូលរួមកិច្ចប្រជុំកំពូលមេគង្គ-ជប៉ុនលើកទីមួយ នៅរសៀលថ្ងៃអាទិត្យ ទី៨ ខែវិច្ឆិកា ឆ្នាំ២០០៩ ឯព្រលានយន្តហោះអន្តជាតិភ្នំពេញ។
លោកនាយករដ្ឋមន្រ្តីបានថ្លែងបញ្ជាក់ថា កម្ពុជាឈានជំហានក្រោយថៃបន្ទាប់ពីថៃទម្លាក់ចោលទំនាក់ទំនងការទូតជាមួយកម្ពុជានោះ ហើយថា កម្ពុជាធ្វើបែបនេះជាការបង្ខំចិត្ត។
លោកនាយករដ្ឋមន្ត្រី ហ៊ុន សែន បានបញ្ជាក់ថា ៖ «តែអ្វីដែលជាការគំរាមរបស់គាត់ហ្នឹងគឺបានដាក់ជាសញ្ញាឲ្យដឹងមុនហើយ ថាគាត់នឹងឈានទៅដល់ការបិទទល់ដែន។ អ៊ីចឹងខ្ញុំគ្រាន់តែប្រាប់ថា បើបិទទល់ដែនលោកម្ចាស់ការបិទចុះ ប៉ុន្តែទ្វារកាលណាតែបិទហើយ អ្នកឯងក៏ចូលមិនរួច ខ្ញុំក៏ចេញមិនបាន ប៉ុន្តែអ្នកដែលខាតបង់គឺប្រជាជនទាំងសងខាង តែកម្ពុជាខាតបង់តិចជាង ប្រៀបធៀបជាមួយនឹង២ពាន់លាន(ដុល្លារ)ដែលជាទីផ្សាររបស់អ្នកឯង ឯកម្ពុជាមានតែ៩០លានដុល្លារទេក្នុងការនាំចេញ តែកម្ពុជាមិនចង់ឲ្យមានរឿងហ្នឹងកើតឡើងទេ។ សូមឲ្យភាគីថៃពិចារណាឡើងវិញ!»។
ទាក់ទិននឹងបញ្ហាព្រំដែននៅតំបន់ព្រះវិហារវិញ នៅថ្ងៃទី៥ វិច្ឆិកាដដែល លោក ហ៊ុន សែន បានបញ្ជាឲ្យដកកងពលតូចទ័ពឆ័ត្រយោងលេខ៩១១ ដែលកំពុងឈរជើងនៅតំបន់សមរភូមិជួរមុខនៅប្រាសាទព្រះវិហារ ឲ្យវិលត្រឡប់ចូលបន្ទាយដូចដើមវិញ។
លោកនាយករដ្ឋមន្ត្រីបានបញ្ជាក់ឲ្យដឹងក្នុងខណៈដែលស្ថានភាពកម្ពុជាថៃកំពុងស្ថិតក្នុងស្ថានភាពតានតឹងនិងមានការធ្លាក់ចុះខាងការទូត បែបនេះថា ៖ «បញ្ហានេះមិនថា ប្រជាជនកម្ពុជាឬប្រជាជនថៃទេ ខ្ញុំគួរតែជម្រាបឲ្យបានដឹងថា នេះមិនមែនជាជម្លោះរវាងប្រជាជាតិកម្ពុជានិងប្រជាជាតិថៃ ហើយក៏មិនមែនជាជម្លោះរវាងប្រជាជនកម្ពុជាទាំងមូលនិងប្រជាជនថៃទាំងមូល ហើយក៏មិនមែនជាជម្លោះបញ្ហាព្រំដែនដែលមានការតានតឹងរវាងកងទ័ពនិងកងទ័ពទេ។ រយៈពេល៥ខែចុងក្រោយ គឺចាប់តាំងពីខែមិថុនា ក្រោយទស្សនកិច្ច អាភីស៊ិត មកដល់ពេលនេះ ភាពតានតឹងមានតែរវាងទីក្រុងបាងកកនិងទីក្រុងភ្នំពេញ ហើយដែលបង្កឡើងដោយទីក្រុងបាងកកតែប៉ុណ្ណោះ។ ចំពោះសភាពការណ៍នៅព្រំដែនវិញអាចនិយាយបានថា ល្អប្រសើរ ដែលកងទ័ពមានការយល់ចិត្តយល់ថ្លើមគ្នា ហើយសហប្រតិបត្តិការគ្នាទៀតផង»។
ជាមួយគ្នានេះដែរ លោកនាយករដ្ឋមន្រ្តី ហ៊ុន សែន បានមានប្រសាសន៍ឲ្យអ្នកកាសែតជាតិនិងអន្តជាតិដឹងផងដែរថា នៅថ្ងៃទី១២ វិច្ឆិកាខាងមុខនេះ លោក ថាក់ស៊ីន ឈីនណាវ៉ាត្រ (Thaksin Shinawatra) ជាទីប្រឹក្សាសេដ្ឋកិច្ចរបស់រដ្ឋាភិបាលនិងជាទីប្រឹក្សារបស់លោកដែលទើបនឹងតែងតាំងថ្មីៗនេះ នឹងមកដល់កម្ពុជាដើម្បីធ្វើបទបង្ហាញជូនដល់ពាណិជ្ជករប្រមាណ៣០០នាក់ស្តីពីកិច្ចការពាណិជ្ជកម្ម។
មកទល់ពេលនេះនៅមិនឃើញមានប្រតិកម្មយ៉ាងណានៅឡើយពីសមភាគីថៃចំពោះការថ្លែងរបស់លោកនាយករដ្ឋមន្រ្តីខ្មែរបែបនេះនៅឡើយទេ។
ចំណងការទូតរវាងកម្ពុជា-ថៃបានធ្លាក់ចុះយ៉ាងគំហុក បន្ទាប់ពីមានការតែងតាំងលោក ថាក់ស៊ីន ជាទីប្រឹក្សាលោក ហ៊ុន សែន រហូតបង្កឲ្យមានការដកប្រមុខការទូតរៀងៗខ្លួនកាលពីថ្ងៃទី៥ វិច្ឆិកាកន្លងមកនេះ៕