ការថ្លែងរបស់លោកនាយករដ្ឋមន្រ្តីដូច្នេះ គឺនៅក្នុងពិធីប្រគល់សញ្ញាបត្រដល់និស្សិតសាកលវិទ្យាល័យឯកទេសនៃកម្ពុជា នាព្រឹកថ្ងៃទី១២ មករា។
លោក ហ៊ុន សែន បានអះអាងផងដែរថា កម្ពុជាមិនត្រូវការជំនួយពីប្រទេសថៃនោះទេ ពីព្រោះកន្លងមកប្រទេសថៃមិនដែលបានផ្តល់ជំនួយដល់កម្ពុជានោះឡើយ។
លោកនាយករដ្ឋមន្ត្រីក៏បានមានប្រតិកម្មយ៉ាងខ្លាំងផងដែរចំពោះរដ្ឋមន្រ្តីការបរទេសថៃ គឺលោក កាស៊ីត ភីរម្យ (Kasit Piromya) កាលពីពេលថ្មីៗនេះ ដែលលោកអះអាងថា វត្តកែវសិខាគិរីស្វរៈនៅខែត្រព្រះវិហារ ថាឋិតនៅលើទឹកដីថៃនោះ។
លោកនាយករដ្ឋមន្ត្រីបានបញ្ជាក់ថា ៖ «ម្សិលម៉្ងៃឯកឧត្ដមបាននិយាយថា វត្តកែវសិខាគិរីស្វរៈសាងសង់ក្នុងទឹកដីថៃ នេះជាអំពើឈ្លានពាន សុំប្រាប់អ្នកឯងវិញ! នេះជាការប្រមាថដែលមិនអាចអត់ឱនឲ្យបាន ហើយកុំចូលមកទៀតណា៎! ផលវិបាកអ្នកឯងទទួល រឿងរបស់អ្នកឯង ហើយចងចាំឲ្យបាន កាលណាផ្ទៃក្នុងតានតឹងនៅបាងកក អ្នកឯងផ្ទេរបញ្ហាទាំងអស់មកទល់ដែន អ្នកឯងត្រូវចាំ!»។
លោកនាយករដ្ឋមន្រ្តីខ្មែរក៏បានព្រមានចំពោះរដ្ឋាភិបាលថៃថា លោកមិនព្រួយបារម្ភពីបញ្ហាដែលថៃចង់បិទច្រកព្រំដែនកម្ពុជា-ថៃនោះទេ ហើយកម្ពុជានឹងបិទទំនិញថៃមិនឲ្យចូលកម្ពុជា បើសិនជាថៃបិទច្រកព្រំដែននោះ។
លោក សុក សំអឿន ប្រធានក្រុមអ្នកច្បាប់កម្ពុជា និងលោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា បានសាទរចំពោះការលើកឡើងរបស់លោកនាយករដ្ឋមន្រ្តី ប៉ុន្តែពួកគេបានបញ្ជាក់ថា បញ្ហាសំខាន់នាយករដ្ឋមន្រ្តីប្រទេសទាំងពីរគឺកម្ពុជា-ថៃ គួរតែរកដំណោះស្រាយល្អនឹងគ្នាវិញប្រសើរជាងដើម្បីគិតពីផលប្រយោជន៍ប្រទេសទាំងពីរ។
លោក អ៊ូ វីរៈ បានឲ្យដឹងថា លោកនាយករដ្ឋមន្រ្តី ហ៊ុន សែន គួរតែគិតអំពីបញ្ហាព្រំដែនប៉ែកខាងកើតគឺកម្ពុជា-វៀតណាម ដូចនឹងប៉ែកខាងលិចដែរ។
លោក អ៊ូ វីរៈ បានបញ្ជាក់ដូច្នេះ ៖ «ធ្វើឲ្យបញ្ហាព្រំដែនរវាងកម្ពុជានិងវៀតណាមត្រូវបានរឹតត្បិតដោយរដ្ឋាភិបាល ប៉ុន្តែជម្លោះរវាងប្រទេសថៃវិញ យើងឃើញការយកចិត្តទុកដាក់របស់រដ្ឋាភិបាល មិនត្រឹមតែយកចិត្តទុកដាក់ធម្មតាទេ ជំរុញឲ្យមានចលនាខឹងថៃ ចូលរួមនូវការដូរពាក្យដោយមន្ត្រីខ្មែរយើងពីពាក្យថៃមកសៀមជាដើម ការប្រើប្រាស់នូវប្រព័ន្ធទូរទស្សន៍ ប្រព័ន្ធវិទ្យុនានា ក្នុងការវាយប្រហារទៅលើប្រទេសថៃជាដើម។ អាហ្នឹងយើងឃើញថា មានចរន្តជាខ្លាំងក្នុងការពង្រឹងនូវជម្លោះមួយ ឬបន្តជម្លោះរវាងប្រទេសថៃ ប៉ុន្តែយើងឃើញថា ខាងកើតវិញមិនដែលមាននូវបញ្ហានៃការគាំទ្ររបស់រដ្ឋាភិបាលខ្មែរយើងទេ!»។
បញ្ហាជម្លោះព្រំដែនកម្ពុជា-ថៃបានអូសបន្លាយជាងមួយឆ្នាំមកហើយ គិតពីខែកក្កដា ឆ្នាំ២០០៨មក គឺនៅស្របពេលដែលហ្វូងបាតុករអាវក្រហមបានធ្វើបាតុកម្មប្រឆាំងនឹងរដ្ឋាភិបាលថៃ៕