លោក ហ៊ុន សែន បានគាំទ្រការជួបប្រជុំរវាងមេបញ្ជាការយោធាថៃ និងកម្ពុជា នៅពេលខាងមុខ ដើម្បីសម្រួលភាពតានតឹងនៅតាមព្រំដែនកម្ពុជា-ថៃ។
លោកមានជំនឿថា ស្ថានការណ៍ព្រំដែនកម្ពុជា-ថៃ នឹងត្រូវបានធូរស្រាលរវាងកងទ័ពប្រទេសទាំងពីរ និងកាត់បន្ថយលទ្ធភាពនៃការផ្ទុះអាវុធដាក់គ្នាបានកម្រិតខ្ពស់ ក្រោយប្រទេសថៃ មានថ្នាក់ដឹកនាំថ្មីចេញពីគណបក្សភឿថៃ ធ្វើការដឹកនាំប្រទេសនៅក្នុងសប្ដាហ៍នេះរួចមក។
លោក ហ៊ុន សែន បន្ថែម ៖ «ឥឡូវយើងប្រជុំដល់ពេលចូលដល់បញ្ហាចំណុចបង្កើតតំបន់អនុវត្តន៍ អំពីតំបន់អត់មានកងទ័ពនេះ យើងត្រូវការឥណ្ឌូណេស៊ី។ ប៉ុន្តែក្នុងករណីគ្មានឥណ្ឌូណេស៊ី ភាគីទាំងពីរត្រូវរាយការណ៍ឲ្យឥណ្ឌូណេស៊ី ថា យើងបានព្រមព្រៀងគ្នា ព្រោះតួនាទីឥណ្ឌូណេស៊ី ជាការទទួលសិទ្ធិពីក្រុមប្រឹក្សាសន្តិសុខ និងការទទួលសិទ្ធិពីតុលាការអន្តរជាតិ។ ដូច្នេះមិនអាចបោះបង់ចោលបានទេ ប៉ុន្តែដើម្បីថា កុំឲ្យមានការលំបាក»។
ទោះយ៉ាងណា អ្នកវិភាគស្ថានការណ៍នយោបាយឯករាជ្យមិនបញ្ចេញឈ្មោះ និងសំឡេង បានអះអាងថា ប្រមុខដឹកនាំរដ្ឋាភិបាលកម្ពុជា ពុំគួរមានទំនុកចិត្តច្រើនពេកទេទៅលើថ្នាក់ដឹកនាំរដ្ឋាភិបាលថៃ ដែលទើបជាប់ឆ្នោត។ ព្រោះលោកយល់ថា សារជាតិថៃ ដែលមានមហិច្ឆតាចូលឈ្លានពានទឹកដីកម្ពុជា មិនមែនទើបតែមានក្នុងប៉ុន្មានឆ្នាំចុងក្រោយនេះទេ គឺជាយូរលង់ណាស់មកហើយ ដែលទាមទារឲ្យថ្នាក់ដឹកនាំកម្ពុជា មានការប្រុងប្រយ័ត្នជាប់ជានិច្ច។
យ៉ាងណាក៏ដោយ ប្រមុខដឹកនាំកម្ពុជាមានជំនឿថា បន្ទាប់ពីមានកិច្ចប្រជុំគណៈកម្មការព្រំដែនតំបន់រវាងមេបញ្ជាការកងទ័ពភូមិភាគទី៤ ខាងភាគីកម្ពុជា និងភូមិភាគទី២ របស់ថៃ ដែលគ្រោងពិភាក្សានៅថ្ងៃទី២៤-២៥ ខែសីហា នៅប្រទេសថៃ អាចនឹងកាត់បន្ថយស្ថានការណ៍តានតឹងតាមព្រំដែនរវាងប្រទេសទាំងពីរប្រសើរឡើង។
ដោយឡែកកិច្ចប្រជុំគណៈកម្មាធិការព្រំដែនទូទៅរវាងប្រទេសទាំងពីរ ដែលបានជាប់គាំងកន្លងមក ក៏ត្រូវបានលោកនាយករដ្ឋមន្ត្រីអះអាងថា កម្ពុជានឹងត្រូវរៀបចំកិច្ចប្រជុំឡើងក្នុងពេលដ៏ឆាប់ ដោយមិនចាំបាច់មានវត្តមានអ្នកសង្កេតការណ៍ឥណ្ឌូណេស៊ី ក៏បាន ព្រោះលោកយល់ថា គ្រាន់តែជាការប្រជុំដោះស្រាយបញ្ហាទូទៅរវាងកម្ពុជា-ថៃ ឈានដល់ការបោះបង្គោលព្រំដែនរួមជាមួយគ្នានោះ។
លោក ហ៊ុន សែន មានប្រសាសន៍បន្ថែម ៖ «សម្រួលទៅបង្កើតការទុកចិត្តគ្នាខាងណោះក៏ថយទៅ គេក៏ទុកមួយចំនួន យើងក៏ទុកមួយចំនួនណា រួចនាំគ្នាដកថយទៅ កម្លាំងចូលបន្ទាយទៅ ហើយមកជួយបង្កបង្កើនផលឲ្យប្រជាជន ឬក៏ក្រុមគ្រួសារទៅ ឬបង្កបង្កើនផលសម្រាប់អង្គភាព។ ធ្វើបែបនេះសន្តិភាពវានឹងកើតតាមទល់ដែន វានឹងសម្រេចនូវគោលបំណងដែលយើងចង់បាននូវព្រំដែនសន្តិភាព មិត្តភាព និងសហប្រតិបត្តិការ»។
ទោះយ៉ាងណា លោក ហ៊ុន សែន មានជំនឿមុតមាំថា រដ្ឋាភិបាលថៃ ក្រោមការដឹកនាំរបស់លោកស្រី យីងឡាក់ ស៊ីណាវ៉ាត្រ (Yingluck Shinawatra) ប្រទេសទាំងពីរនឹងជំរុញឲ្យមានស្ថិរភាពតាមព្រំដែនកាន់តែប្រសើរទៅថ្ងៃអនាគត។ ក្នុងនោះទំនាក់ទំនង និងកិច្ចសហប្រតិបត្តិការកម្ពុជា-ថៃ នឹងមានទំនាក់ទំនងល្អជាមួយគ្នាឡើងវិញ។
លោកបន្តថា ស្ថានការណ៍នៅតាមព្រំដែនកម្ពុជា-ថៃ បានចាប់ផ្ដើមស្ងប់ស្ងាត់ចាប់តាំងពីថ្ងៃទី៣ ខែកក្កដា ឆ្នាំ២០១១ នៅគ្រាគណបក្សភឿថៃ ដឹកនាំដោយលោកស្រី យីងឡាក់ ឈ្នះក្នុងការបោះឆ្នោតសភាកាលពីខែមុននេះ៕