សេចក្ដីប្រកាសព័ត៌មានរបស់ក្រសួងការបរទេសកម្ពុជា ចេញផ្សាយថ្ងៃទី១២ ខែតុលា អោយដឹងថា កិច្ចប្រជុំកំពូលលើកទី៧ ស្ដីពីការអភិវឌ្ឍតំបន់ត្រីកោណរវាងកម្ពុជា វៀតណាម និងឡាវ (ស៊ី.អិល.វី = CLV) នឹងធ្វើនៅថ្ងៃទី១៩ ដល់ថ្ងៃទី២០ ខែតុលា។ ដំណើរទៅចូលរួមកិច្ចប្រជុំរបស់លោកនាយករដ្ឋមន្ត្រី ហ៊ុន សែន គឺតបតាមការអញ្ជើញរបស់នាយករដ្ឋមន្ត្រីវៀតណាម លោក ង្វៀន តាន់យុង (Nguyen Tan Dung)។
បើទោះជាយ៉ាងណា សេចក្ដីប្រកាសព័ត៌មានពុំបានបញ្ជាក់ពីរបៀបវារៈនៃកិច្ចប្រជុំនោះឡើយ។ ជាទូទៅ កិច្ចប្រជុំ ស៊ី.អិល.វី គឺផ្ដោតទៅលើទំនាក់ទំនងសហប្រតិបត្តិការ សង្គម សេដ្ឋកិច្ច ក្នុងតំបន់នៃប្រទេសទាំង៣ គឺកម្ពុជា វៀតណាម ឡាវ។
សេចក្ដីប្រកាសព័ត៌មានអោយដឹងទៀតថា រដ្ឋមន្ត្រីក្រសួងពាណិជ្ជកម្មកម្ពុជា និងសមាជិកដទៃទៀតនៃរដ្ឋាភិបាលកម្ពុជា នឹងចូលរួមជាគណៈប្រតិភូអមដំណើរនាយករដ្ឋមន្ត្រី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។