ជាក់ស្ដែង បុរសជាស្វាមីម្នាក់ នៅក្នុងខេត្តប៉ៃលិន បានប្រើកាំបិតកាប់ប្រពន្ធស្លាប់នៅក្នុងចម្ការដំឡូង។
ប៉ូលិសខេត្តប៉ៃលិន បានចាប់ខ្លួនបុរសជាស្វាមីម្នាក់ ក្រោមការចោទប្រកាន់ពីបទ អំពើមនុស្សឃាតដោយចេតនា។ បុរសរូបនោះមាន ឈ្មោះ ដុំ សុវណ្ណ អាយុ ៤១ឆ្នាំ ខឹងនឹងប្រពន្ធ ក៏ផឹកស្រា ហើយយកកាំបិតផ្គាក់កាប់សម្លាប់ប្រពន្ធរបស់ខ្លួននៅក្នុងចម្ការដំឡូងមួយ ស្ថិតនៅក្នុងភូមិសួនអំពៅកើត សង្កាត់ប៉ៃលិន ខេត្តប៉ៃលិន។
លោក អ៊ុក គា នាយប៉ុស្តិ៍នគរបាលសង្កាត់ប៉ៃលិន បានថ្លែងនៅថ្ងៃទី៣១ ខែឧសភា ថា ហេតុការណ៍ប្ដីយកកាំបិតកាប់សម្លាប់ប្រពន្ធនេះ បានកើតឡើងនៅរសៀលថ្ងៃទី២៨ ខែឧសភា ឆ្នាំ២០១២។ ស្ត្រីរងគ្រោះជាប្រពន្ធ ឈ្មោះ អ៊ួង មុំ អាយុ ៤៣ឆ្នាំ និងប្ដីជាជនដៃដល់នោះ មានឈ្មោះ ដុំ សុវណ្ណ អាយុ៤១ឆ្នាំ។ ប្ដីប្រពន្ធទាំងពីរនាក់ មានមុខរបរជាកម្មករ ធ្វើការងារនៅក្នុងចម្ការដំឡូងនៅក្នុងខេត្តប៉ៃលិន។
លោក អ៊ុក គា៖ «ធ្លាប់ពីមុនមក ម្ចាស់ចម្ការធ្លាប់បានរ៉ៃលុយគ្នាឲ្យប្រពន្ធហ្នឹង ១០ម៉ឺនរៀល ឲ្យគាត់ហ្នឹង នាំកូនទៅ កុំនៅជាមួយប្ដីហ្នឹង ចេះតែវ៉ៃធ្វើបាបរហូតអញ្ចឹង មិនមែនទើបតែម្ដងហ្នឹងទេ ដែលគាត់វ៉ៃធ្វើបាបប្រពន្ធ បានរ៉ៃលុយបាន ១០ម៉ឺនរៀលឲ្យប្រពន្ធទៅម្ដងហើយ ស្រាប់តែបានប៉ុន្មានថ្ងៃ ឃើញមកវិញ មកវិញ អត់ឃើញកូនមកទេ មកតែប្រពន្ធ នៅជាមួយគ្នាបានប្រហែលតែមួយអាទិត្យទេ ក៏ចាប់ផ្ដើមហូបស្រាជាមួយគ្នាបីនាក់អស់មួយលីត្រ ក៏បែកគ្នាទៅ ពីរនាក់នោះ គេបែកទៅបាត់ទៅ គាត់ឲ្យប្រពន្ធមកអាំងសាច់នៅក្នុងរោងរបស់គាត់ ពីរនាក់នោះគេអត់មក ស្រាប់ឮវ៉ៃប្រពន្ធតែម្ដង»។
នៅពេលកំពុងវាយសម្លាប់ប្រពន្ធនោះ ស្រាប់តែម្ចាស់ចម្ការដំឡូង ឈ្មោះ អ៊ុន ទូច ទៅទាន់ ឃើញ ហេតុការណ៍ដូច្នេះ ក៏រត់ទៅប្ដឹងមេភូមិ ចៅសង្កាត់ និងប៉ូលិសដើម្បីចុះទៅចាប់ខ្លួនបុរសជាប្ដី។ នៅពេលសមត្ថកិច្ចប៉ូលិសចុះទៅដល់កន្លែងកើតហេតុ បុរសឈ្មោះ ដុំ សុវណ្ណ នោះ បានលើកប្រពន្ធ ដែលខ្លួនបានវ៉ៃកាប់នឹងកាំបិតសុសផ្ទៃមុខទៅហើយនោះ ដាក់អង្គុយហើយធ្វើល្បិចជាដងទឹកងូតឲ្យ ប្រពន្ធ។ តាមពិត ស្ត្រីរងគ្រោះជាប្រពន្ធរបួសធ្ងន់ធ្ងរ រកកលចង់ដាច់ខ្យល់ស្លាប់បាត់ទៅហើយ។
សាក្សី ជាកម្មករនៅក្នុងចម្ការដំឡូង ឈ្មោះ ម្លិស ធារ៉ា បានបញ្ជាក់ថា ស្ត្រីរងគ្រោះដែលត្រូវប្ដីកាប់សម្លាប់នោះ បានបោះតង់ សង់រោងស្នាក់នៅក្នុងចម្ការដំឡូងដាច់ឆ្ងាយពីគ្នា។ កម្មករជាច្រើននាក់ទៀត ដែលកំពុងកាប់ដំឡូងនៅក្នុងចម្ការនោះ ពុំបានឮសូរសំឡេងស្ត្រីរងគ្រោះជាប្រពន្ធស្រែកឲ្យគេជួយទេ។ លោក បន្តថា ក្រោយពីដឹងហេតុការណ៍នោះភ្លាម ពួកគាត់កម្មករចម្ការដំឡូងទាំងប្រុសទាំងស្រី ក៏នាំគ្នាចូលទៅមើល។ ស្ត្រីរងគ្រោះ មានរបួសធ្ងន់ធ្ងរពេញលើផ្ទៃមុខ ឃើញដូច្នេះ សមត្ថកិច្ច និងកម្មករទាំងនោះ ក៏នាំគ្នាលើកជនរងគ្រោះដាក់លើម៉ាស៊ីនគោយន្ត បញ្ជូនទៅសង្គ្រោះ នៅមន្ទីរពេទ្យ។
លោក ម្លិស ធារ៉ា៖ «មិនទាន់ស្លាប់ទេ ជួយលើកទាំងម្ចាស់ចម្ការ ទាំងប៉ូលិស យកទៅដាក់លើគោយន្ត យកចេញពីចម្ការទៅដាក់ឡានពេទ្យ គេមកទទួលត្រឹមថ្នល់ ចូលចម្ការ ចូលអត់កើត វាជាប់ភុង មេឃភ្លៀង រៀងកាយគាត់របួសរយះពេញមុខនិងក្បាល»។
សមត្ថកិច្ចប៉ូលិសឲ្យដឹងថា ស្ត្រីជាជនរងគ្រោះដោយសារប្ដីកាប់សម្លាប់នេះ បានដាច់ខ្យល់ស្លាប់នៅ តាមផ្លូវ នៅពេលដឹកបញ្ជូនចេញពីចម្ការដំឡូង។ ឃើញដូច្នេះ សមត្ថកិច្ចប៉ូលិសក៏សំរេចចិត្តបញ្ជូនសព ទៅដាក់តម្កល់នៅក្នុងវត្តកោងកាង។
ប្រធានសម្របសម្រួលសមាគម អាដហុក ប្រចាំខេត្តប៉ៃលិន លោកស្រី បា្រក់ សុភិមា បានឲ្យដឹងថា ស្ត្រីជាជនរងគ្រោះធ្លាប់មានប្ដីមុន ហើយមានកូនប្រាំមួយនាក់ តែក្រោយមកបានលែងលះជាមួយប្ដី ដើម ទៅរួមរស់ជាមួយប្ដីក្រោយ ដែលជាបុរសពោះម៉ាយ មានកូនពីរនាក់។ ប៉ុន្តែការរួមរស់នៅជាមួយប្ដីក្រោយ ស្ត្រីរងគ្រោះនៅពុំទាន់មានកូនជាមួយគ្នាទេ។ លោកស្រី បន្តថា តាមការបំភ្លឺពីសាក្សី បុរសជាប្ដីចុង ដែលជាឃាតករសម្លាប់ប្រពន្ធខ្លួនឯងនេះ ធ្លាប់បានវាយធ្វើបាបប្រពន្ធស្ទើររាល់ថ្ងៃ។
ការប្រើអំពើហិង្សា រហូតដល់កាប់សម្លាប់ប្រពន្ធនេះ គឺបន្ទាប់ពីស្ត្រីជាប្រពន្ធបាននាំកូនពីរនាក់ ដែលជាកូនរបស់ប្ដីមុនរត់ចោលប្ដីចុង យកទៅទុកឲ្យសាច់ញាតិមើលថែទាំនៅក្នុងស្រុកមោងឬស្សី ខេត្តបាត់ដំបង។ ប៉ុន្តែស្ត្រីជាប្រពន្ធនោះ រត់ចោលប្ដីចុងនោះបានតែប៉ុន្មានថ្ងៃ ក៏ត្រឡប់ទៅវិញ ហើយត្រូវ បុរសជាប្ដីវាយសម្លាប់នៅក្នុងចម្ការដំឡូងតែម្ដង។
លោកស្រី បា្រក់ សុភិមា៖ «តាមដែលខ្ញុំឃើញរូបភាពសាកសពជនរងគ្រោះហ្នឹង គឺសាហាវមែនទែន ឃើញស្នាមវ៉ៃផង ហើយនិងកាប់ផង ដោយសារភ្នែកហ្នឹង គឺឡើងជាំពោទាំងសងខាង ហើយត្របកភ្នែកលៀនចេញ ដាច់រយះមុខ មើលលែងចង់ស្គាល់មុខមនុស្សហើយ ជំនាន់ ពល ពត ទៅសម្លាប់មនុស្ស ហើយដល់ពេលយើងឥឡូវហើយ នៅតែមានការកាប់សម្លាប់ប្ដីប្រពន្ធអញ្ចឹងទៀត ព្រៃផ្សៃខ្លាំងណាស់ ច្បាប់ត្រូវតែដាក់ទោសអ្នកដែលប្រព្រឹត្តិ»។
សមត្ថកិច្ចប៉ូលិសឲ្យដឹងថា ស្ត្រីរងគ្រោះ ឈ្មោះ អ៊ួង មុំ ពុំមានសាច់ញាតិចេញមុខជួយធ្វើការប្ដឹងផ្ដល់ទេ។ ចំណែក ឈ្មោះ ដុំ សុវណ្ណ ជាប្ដីដែលបានកាប់សម្លាប់ប្រពន្ធខ្លួនឯងនោះ បច្ចុប្បន្នត្រូវសមត្ថកិច្ចប៉ូលិស បន្តឃុំខ្លួននៅស្នងការដ្ឋាននគរបាលខេត្តប៉ៃលិន រងចាំតំណាងអយ្យការធ្វើពាក្យបណ្ដឹង ចោទប្រកាន់ជាផ្លូវការ ដើម្បីបញ្ជូនទៅឃុំខ្លួននៅក្នុងពន្ធនាគារខេត្តប៉ៃលិន តាមនីតិវិធីច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។