និស្សិតពិការខ្មែរ រៀនថ្នាក់អនុបណ្ឌិតនៅសហរដ្ឋអាមេរិក
2011.07.20
លោក ហ៊ុយ ឃី និស្សិតពិការខ្មែរបានទទួលអាហារូបករណ៍ថ្នាក់អនុបណ្ឌិត ពីសកលវិទ្យាល័យ American University’s School of International Service សម្រាប់ថ្នាក់អនុបណ្ឌិតលើកដំបូងបង្អស់ លើពិភពលោក សម្រាប់ជនពិការ។ វិទ្យាស្ថានសម្រាប់ជនពិការ និងនយោបាយសាធារណៈ (Institute on Disability and Public Policy) បានបង្កើតថ្នាក់អនុបណ្ឌិតរយៈពេលមួយឆ្នាំ សិក្សាតាមប្រព័ន្ធអ៊ីនធឺណិត ដោយបានជ្រើសរើសនិស្សិតចំនួន ១០នាក់ សម្រាប់ឆ្នាំសិក្សា២០១១។
លោក ហ៊ុយ ឃី អាយុ២៩ឆ្នាំ ដែលទើបតែបានទទួលសញ្ញាប័ត្រអនុបណ្ឌិតផ្នែកច្បាប់អន្តរជាតិពីសហរដ្ឋអាមេរិកនោះ បានមានប្រសាសន៍តាមទូរស័ព្ទពីទីក្រុងបាងកក ប្រទេសថៃ ថាលោកសង្ឃឹមថា ការសិក្សាជំនាញផ្នែកនយោបាយជនពិការ និងកិច្ចការសាធារណៈនេះ នឹងអាចជំរុញឲ្យលោកអាចយកការអប់រំខ្លួន ដើម្បីជួយជនពិការដទៃទៀត ឲ្យទទួលបានការអប់រំសមស្រប និងការងារត្រឹមត្រូវ។ លោកបានឲ្យដឹងថា កន្លងមកជនពិការនៅកម្ពុជាត្រូវបានគេរើសអើង ៖ “ខ្ញុំឃើញចំណុចសំខាន់ពីរជាចម្បង ចំពោះជនពិការនៅស្រុកខ្មែរយើង នៅមិនទាន់បានដោះស្រាយ ទី១ បញ្ហាទាក់ទងនឹងទៅការអប់រំ ជនពិការស្រុកខ្មែរគឺអត់បានទទួលការយកចិត្តទុកដាក់ទេចំពោះផ្នែកអប់រំ គឺថានៅតាមសាលារៀននិមួយៗ រដ្ឋក្ដី មិនបានបង្កលក្ខណៈងាយស្រួលសម្រាប់ជនពិការទេ។ ឧទាហរណ៍ជនពិការដែរដើរអត់រួច យើងអត់ជាធ្វើជំរុញឲ្យជនពិការសម្រាប់ជនពិការមានការពិបាកទៅសាលារៀន”។
និស្សិត ហ៊ុន ឃី មានដើមកំណើតពីខេត្តកំពង់ឆ្នាំង។ លោកមានបញ្ហាភ្នែកតាំងពីកំណើត ដោយលោកមិនអាចមើលឆ្ងាយបានទេ ប៉ុន្តែលោកបានខិតខំប្រឹងប្រែងតស៊ូរៀងសូត្ររហូតដល់ទទួលបានបរិញ្ញាបត្រផ្នែកច្បាប់ ផ្នែកភាសាអង់គ្លេស ហើយចុងក្រោយបំផុត គឺអនុបណ្ឌិតផ្នែកច្បាប់អន្តរជាតិ។ លោកបញ្ជាក់ថា ការតស៊ូរបស់លោកបានជំរុញឲ្យលោកទទួលបានជោគជ័យក្នុងជីវិតរបស់លោក ៖ “ទៅថ្ងៃអនាគតខ្ញុំចង់ធ្វើជាសកម្មជនផ្នែកសិទ្ធិមនុស្ស ក្នុងអង្គការសិទ្ធិមនុស្ស ជាពិសេសការពារសិទ្ធិមនុស្សទូទៅ និងផ្ដោតជាសំខាន់ជនពិការ។ ដូច្នោះកម្មវិធីមានសារសំខាន់ផ្ដល់ចំណេះដឹងដល់ខ្ញុំ ហើយវាអាចជួយសម្រាប់គោលដៅរបស់ខ្ញុំទៅអនាគត"។
បច្ចុប្បន្ននេះ និស្សិត ហ៊ុន ឃី កំពុងស្នាក់នៅប្រទេសថៃរយៈពេលពីរសប្ដាហ៍ ជាការចាប់ផ្ដើមឆ្នាំសិក្សារបស់លោក។ សេចក្ដីប្រកាសព័ត៌មានរបស់វិទ្យាស្ថានសម្រាប់ជនពិការ និងនយោបាយសាធារណៈបញ្ជាក់ថា គោលបំណងនៃថ្នាក់អនុបណ្ឌិត គឺដើម្បីបង្កើនការទទួលស្គាល់ជនពិការ និងបង្កើតឲ្យពួកគេមានឱកាសទទួលការអប់រំថ្នាក់ឧត្ដមសិក្សា ដែលមិនធ្លាប់ទទួលបាន។ កម្មវិធីនេះ គឺអប់រំសិស្សតាមការសិក្សា តាមប្រព័ន្ធអ៊ីនធឺណិត ដែលអាចជំរុញឲ្យក្លាយជាអ្នកដឹកនាំ ទាក់ទងទៅនឹងនយោបាយអន្តរជាតិ សម្រាប់វិស័យសាធារណៈ វិស័យឯកជន និងអង្គការក្រៅរដ្ឋាភិបាល។ លោក ហ៊ុយ ឃី បានផ្ញើសារសំខាន់សម្រាប់ជនពិការថា ការព្យាយាមនឹងបានសម្រេច ទោះបីមនុស្សនោះមានភាពពិការក៏ដោយ ៖ “អ្វីៗ ក៏យើងអាចធ្វើបានដែរ ទោះបីយើងពិការអីក៏ដោយ។ បើសិនជាយើងមានការតាំងចិត្ត ហើយយើងមានគោលដៅច្បាស់លាស់ក្នុងជីវិត យើងអាចធ្វើតាមដូចជនមិនពិការ។”
របាយការណ៍ប្រចាំឆ្នាំរបស់ក្រុមប្រឹក្សាសកម្មភាពជនពិការឆ្នាំ២០០៩ បានឲ្យដឹងថា ពលរដ្ឋកម្ពុជាប្រមាណ២% មានពិការភាព ហើយ ១១% គឺពិការដោយសារតែគ្រាប់មីន។ ១០% ដោយសារតែសង្គ្រាម និង២០% ពិការតាំងពីកំណើត។ ជនពិការនៅតំបន់អាស៊ីមានចំនួនច្រើនជាងគេនៅក្នុងពិភពលោក៕