បន្ទាប់ពីវិទ្យុអាស៊ីសេរីបានចាក់ផ្សាយពីភាពអនាធិបតេយ្យនៃការដាក់ប៉ុស្តិ៍ត្រួតពិនិត្យច្រើនកន្លែងនៅតាមផ្លូវសាធារណៈក្នុងខេត្តព្រៃវែងទៅតាមការអះអាងរបស់ប្រជាពលរដ្ឋរួចមក បច្ចុប្បន្នប៉ុស្តិ៍ត្រួតពិនិត្យទាំងនេះត្រូវបានលោក ទឹម ផន ស្នងការនគរបាលខេត្តព្រៃវែង មានប្រសាសន៍ថា លែងមានច្រើនកន្លែងទៀតហើយ ពោលគឺមានពី២ទៅ៣កន្លែងនៅទូទាំងខេត្ត។
លោកស្នងការឲ្យដឹងថា កន្លងមកការដាក់ប៉ុស្តិ៍របស់សមត្ថកិច្ចនៅតាមផ្លូវ គឺដើម្បីពង្រឹងការអនុវត្តច្បាប់ចរាចរណ៍ផ្លូវគោក មិនមែនដាក់ប៉ុស្តិ៍ចាំស្ទាក់យកលុយពីរថយន្តដឹកទំនិញដូចការចោទប្រកាន់របស់ពលរដ្ឋនោះទេ។ លោកឲ្យដឹងថា ភាពអនាធិបតេយ្យកន្លងមកទំនងកើតចេញពីជនឱកាសនិយមមានចេតនាបង្កឲ្យខូចសណ្តាប់ធ្លាប់ ឬមុខមាត់ថ្នាក់ដឹកនាំខេត្ត។
ស្នងការនគរបាលខេត្តព្រៃវែង លោក ទឹម ផន ឲ្យដឹងដូច្នេះ ៖ «កន្លងមកអ៊ីចេះ គឺក្រោយពីយើងត្រួតពិនិត្យមួកសុវត្ថិភាពមក គឺថា យើងដាក់ក៏រាងក្រែលដែរ តាមស្រុកតាមអីក៏គេសុំដាក់ចល័ត ដល់ឥឡូវខ្ញុំដកអស់ហើយនៅសល់តែ២-៣គោលដៅទេ ខាងខ្លូវជាតិលេខ១ លេខ១១ និងលេខ៨ ក្រៅពីហ្នឹងដកអស់ហើយ»។
ទោះជាមានការអះអាងបែបនេះក្តី សម្រាប់ម្ចាស់រថយន្តបើកឆ្លងកាត់តាមផ្លូវលេខ១១ ក្នុងស្រុកស៊ីធរកណ្តាល នៅតែអះអាងថា ប៉ុស្តិ៍ត្រួតពិនិត្យរបស់នគរបាល ក្រៅអំពីពង្រឹងការអនុវត្តច្បាប់ចរាចរណ៍ ប៉ុស្តិ៍ត្រួតពិនិត្យទាំងនេះនៅបន្តយកលុយពីរថយន្តដឹកទំនិញនិងម៉ូតូ ដឹកមាន់ ទា ត្រីសាច់បើកឆ្លងកាត់ដដែល ៖ «សូមសំណូមពរដល់ថ្នាក់ដឹកនាំ ជាពិសេសថ្នាក់ខេត្ត សូមឲ្យគាត់ជួយមើលកុងត្រូលអនាធិបតេយ្យដែលបង្កការលំបាកដល់ប្រជាជន»។
សម្រាប់ពលរដ្ឋរស់នៅឃុំបាបោង និងឃុំព្រៃកណ្តៀង មានប្រសាសន៍ឲ្យវិទ្យុអាស៊ីសេរីដឹងថា តាមការកត់សម្គាល់របស់ពួកគាត់ក្នុងប៉ុន្មានថ្ងៃកន្លងមកនេះឃើញថា នៅតាមផ្លូវថ្នល់ពីអ្នកលឿង ឆ្ពោះទៅទីរួមខេត្តព្រៃវែង សមត្ថកិច្ចបានដកប៉ុស្តិ៍ត្រួតពិនិត្យអស់ហើយ។ ពលរដ្ឋឲ្យដឹងថា ប៉ុស្តិ៍ត្រួតពិនិត្យនៅតាមផ្លូវពីអ្នកលឿងឆ្ពោះទៅខេត្តព្រៃវែងកន្លងមក ក៏ជាប៉ុស្តិ៍ត្រួតពិនិត្យមួយក្នុងចំណោមប៉ុស្តិ៍ជាច្រើនទៀតនៅទូទាំងខេត្ត ដែលបានគាបយកលុយមិនថារថយន្តដឹកទំនិញ ឬម៉ូតូដឹកទំនិញនោះទេ គឺមិនរើសមុខឡើយ។
លោក អ៊ុង សាម៉ី អភិបាលខេត្តព្រៃវែង មានប្រសាសន៍ថា ប៉ុស្តិ៍ត្រួតពិនិត្យដែលរងការចោទប្រកាន់ពីពលរដ្ឋថា បានដាក់ពង្រាយនៅតាមផ្លូវច្រើនកន្លែងចាំទារលុយពីរថយន្តដឹកទំនិញនាខេត្តព្រៃវែង គឺមិនមានឡើយ ៖ «អត់មានទេ ខ្ញុំឆែកមើល ត្រួតពិនិត្យអស់ហើយ អត់មានទេ!»។
ទោះយ៉ាងនេះក្តី បើតាមការអះអាងរបស់ប្រជាពលរដ្ឋរស់នៅឃុំអំពិលក្រៅ ស្ថិតក្នុងស្រុកស៊ីធរកណ្តាល បានឲ្យដឹងថា កន្លងមកនៅតាមបណ្តោយផ្លូវជាតិលេខ១១ សមត្ថកិច្ចមានឯកសណ្ឋានខុសៗគ្នាច្រើនជំនាញ បានដាក់ពង្រាយប៉ុស្តិ៍ត្រួតពិនិត្យជាច្រើនកន្លែង។ ពលរដ្ឋបញ្ជាក់ថា ក្នុងចម្ងាយដីមិនដល់១០គីឡូម៉ែត្រផង មានប៉ុស្តិ៍ត្រួតពិនិត្យប្រមាណពីប្រាំទៅប្រាំបីកន្លែងរង់ចាំជំរិតទារលុយពីរថយន្តដឹកទំនិញបើកឆ្លងកាត់ មិនតែប៉ុណ្ណោះ ម្តងម្កាលសមត្ថកិច្ចទាំងនោះបានបង្កការឈ្លោះប្រកែកឈានដល់ការផ្ទុះអាវុធ បង្កការភ័យខ្លាចដល់ពលរដ្ឋរស់នៅក្នុងមូលដ្ឋានថែមទៀតផង៕