ប្រភពពីប្រជាពលរដ្ឋនិងមន្ត្រីអាជ្ញាធរបានឲ្យដឹងកាលពីថ្ងៃព្រហស្បតិ៍នេះថា មន្ត្រីមេព្រៃពីររូបដែលម្នាក់ឈ្មោះ ឌិត សុវណ្ណ ជាប្រធានសង្កាត់រដ្ឋបាលព្រៃឈើប្រចាំស្រុកអង្គរជ័យ និងម្នាក់ទៀតឈ្មោះ កៀម ទិព្វ ជាមន្ត្រីផ្នែករុក្ខាប្រមាញ់ខេត្តកំពត បានកាប់រំលំដើមម៉ៃសាក់នៅចម្ការម៉ៃសាក់ស្ថិតក្នុងភូមិភូមិដំណាក់ចំបក់ ឃុំសំរោងលើ ស្រុកបន្ទាយមាស ខេត្តកំពត ក្រោមលេសថាដើម្បីយកទៅប្រើប្រាស់ក្នុងអង្គភាព។
នាយរងប៉ុស្តិ៍រដ្ឋបាលនគរបាលឃុំសំរោងលើ លោក ឥន រៀម បានថ្លែងថាសកម្មភាពបង្ក្រាបបទល្មើសព្រៃឈើនេះត្រូវបានធ្វើឡើងក្រោមកិច្ចសហការពីសំណាក់អាជ្ញាធរមូលដ្ឋានគ្រប់លំដាប់ថ្នាក់ ហើយក៏ទទួលបាននូវការអបអរសាទរពីសំណាក់ប្រជាពលរដ្ឋផងដែរ។
លោក ឥន រៀម បានឲ្យដឹងថា ៖ «រឿងរ៉ាវនេះបើតាមការពិតទៅ មេព្រៃលួចកាប់យកទៅលក់ ហើយពេលក្រោយពីប្រជាពលរដ្ឋរាយការណ៍ដល់កន្លែងប៉ុស្តិ៍ខ្ញុំ ខ្ញុំចាត់តាំងកម្លាំង ហើយសហការជាមួយលោកមេឃុំ ក្រុមប្រឹក្សាឃុំ ដើម្បីចុះមកពិនិត្យ។ ហើយក្រោយពីពិនិត្យទៅឃើញថា វាជាករណីលួច យើងធ្វើការឃាត់តែម្ដង ប្រមូលបានឈើប្រភេទម៉ៃសាក់ហ្នឹងចំនួន៦ដើម ហើយកាត់ជាកង់ៗប្រវែងពីរម៉ែត្រខ្លះ មួយម៉ែត្រកន្លះជាងខ្លះ ៣៧កង់។ ប្រជាពលរដ្ឋដល់ឃើញកម្លាំងខ្ញុំសហការជាមួយអាជ្ញាធរអ៊ីចឹងគាត់អរ ព្រោះថាព្រៃឈើនេះ ដើមម៉ៃសាក់នេះជាប្រភេទឈើលេខ១ ហើយប្រភេទល្អបំផុត ហើយមិនដែលនរណាថ្លើមធំហ៊ានកាប់អ៊ីចឹងទេ»។
មេឃុំសំរោងលើ លោក ញ៉យ ណាន់ បានមានប្រសាសន៍ថា រយៈកាលកន្លងទៅក៏មានសកម្មភាពកាប់បំផ្លាញព្រៃឈើនៅក្នុងមូលដ្ឋានរបស់លោកដែរ ៖ «កាប់ហ្នឹងគេអត់បានមានសួរយោបល់យ៉ាងម៉េចទេ ព្រោះគ្រាន់តែជម្រាបប្រាប់ខ្ញុំថា កាប់ហ្នឹងយកទៅលក់ដោះដូរដើម្បីទិញឈើធ្វើស្នាក់ការរបស់មេព្រៃ។ បើតាមកន្លងមកវាលួចកាប់ហូរហែ ប៉ុន្តែអត់បានធ្វើទ្រង់ទ្រាយធំអ៊ីចឹងទេ ដោយសារកាប់១ដើម ២ដើម វាលួចនៅពេលយប់ ហើយជនកាប់ហ្នឹងវាច្រើនប៉ូលិសអីខាងស្រុកឈូកអីមកចូលកាប់ ហើយមេព្រៃច្រើនឃុបឃិតគ្នាកាប់យប់ហើយអារចេញទៅទាំងយប់តែម្ដងកន្លងមក ប៉ុន្តែទើបលើកហ្នឹងខ្ញុំធ្វើសកម្មភាព ហើយឯកភាពគ្នាជាមួយលោកអិបាលដែរហ្នឹង»។
អភិបាលស្រុកបន្ទាយមាស លោក ឆាយ សន បានមានប្រសាសន៍រៀបរាប់ពីអាយុកាលរបស់ដើមម៉ៃសាក់ ហើយលោកក៏បានឲ្យដឹងដែរថា លោកបានតម្រូវឲ្យមន្ត្រីដែលបានប្រព្រឹត្តនោះធ្វើកិច្ចសន្យាឈប់ប្រព្រឹត្តយ៉ាងដូច្នោះតទៅទៀត។
លោក ឆាយ សន បានមានប្រសាសន៍ថា ៖ «តាំងពីឆ្នាំ៦០ជាង តាំងពីខ្ញុំនៅអាយុ១៧-១៨ឆ្នាំ ឥឡូវខ្ញុំ៦០ជាងហើយ។ វាថាខុសដែរ ព្រោះរបស់នេះសុទ្ធតែឈើប្រហោងបានកាប់ហ្នឹង។ ខ្ញុំថាបើកាប់អ៊ីចឹងក៏វាខុសដែរ វាមិនត្រូវ យើងមេព្រៃ ទៅកាប់ព្រៃវា
ម៉េចនឹងត្រូវ»
។
វិទ្យុអាស៊ីសេរីបានព្យាយាមទាក់ទងសុំការបំភ្លឺជុំវិញបញ្ហានេះពីសំណាក់មេព្រៃទាំងពីររូបតែមិនអាចទាក់ទងបាន។
ប្រជាពលរដ្ឋក៏ដូចជាមន្ត្រីអាជ្ញាធរបានសម្ដែងនូវការសោកស្ដាយដោយសារតែមន្ត្រីមេព្រៃដែលមានតួនាទីក្នុងការថែរក្សានិងការពារព្រៃឈើជាសម្បត្តិសាធារណៈនោះបែរជាធ្វើការកាប់បំផ្លាញព្រៃឈើដោយខ្លួនឯងទៅវិញ៕