ប្រជាសហគមន៍នៅរតនគិរីអំពាវនាវឲ្យស៊ើបអង្កេតករណីកាប់ឈើ

ដោយ រដ្ឋា វិសាល

2008-06-23

ប្រជាសហគមន៍ឃុំត្រពាំងច្រេស ស្រុកកូនមុំ ខេត្តរតនគិរី អំពាវនាវនៅថ្ងៃច័ន្ទដើមសប្តាហ៍នេះសុំឲ្យមានការស៊ើបអង្កេតទៅលើសកម្មភាពលួចកាប់ឈើមូលពីព្រៃសហគមន៍នាំចូលទៅរោងចក្រអារឈើនៃក្រុមហ៊ុនសម្បទានព្រៃគប់មួយដែលមានទីតាំងជាប់ព្រៃសហគមន៍នោះ ។

សេចក្តីអំពាវនាវនេះធ្វើឡើងបន្ទាប់ពីប្រជាសហគមន៍ចំនួនពីរនាក់ដែលចលនាឲ្យអ្នកភូមិប្តឹងពីករណីនេះ ត្រូវបានអាជ្ញាធរប៉ូលិសស្រុកកោះហៅ កាលពីថ្ងៃទី២០ មិថុនាកន្លងទៅ ហើយធ្វើការសម្របសម្រួលឲ្យពួកគាត់ឈប់ប្តឹងក្រោមហេតុផលថា អ្នកភូមិចំនួន៥៤នាក់ក្នុងចំណោម៩២នាក់បានបដិសេធថា មិនបានយល់ស្របក្នុងការប្តឹងពីករណីនេះទេ ។

សមាជិកសហគមន៍ លោក ឡុង ឌី មានប្រសាសន៍បញ្ជាក់ថាសកម្មភាពកាប់ឈើក្នុងព្រៃសហគមន៍ពិតជាកើតមានរាប់រយដើមនាំចូលរោងអារឈើដោយមានការឃុបឃិត ។ លោកថានេះគឺជាបទល្មើសព្រៃឈើដែលមិនអាចលើកលែងបាន ។

លោក ឡុង ឌី បានឲ្យដឹងថា ៖ «ផ្ទុយនឹងច្បាប់ គេមិនត្រឹមតែឲ្យយើងឈប់បន្តទេ ឈប់បន្តលុះត្រាតែអ្នកឯងជាអាជ្ញាធរហ្នឹង ជួយបន្តពីខ្ញុំទៅផង» ។

តាមកំណត់ហេតុឆ្លើយបំភ្លឺរបស់ប្រជាសហគមន៍ដែលបានទៅដល់ទីកើតហេតុកាលពីខែមេសាកន្លងទៅ សមាជិកសហគមន៍ភូមិ២ ឃុំត្រពាំងច្រេស ៤នាក់ បានចុះត្រួតពិនិត្យតំបន់ព្រៃការពារសហគមន៍នៅចំណុចភ្នំស្រួច មានផ្ទៃដីប្រមាណ២០០ហិកតាដែលមានឈើរាប់ពាន់ដើមត្រូវបានគេកាប់និងដឹកជញ្ជូនចូលរោងអារឈើនៃក្រុមហ៊ុនសម្បទានព្រៃគប់ ទើបពួកគេធ្វើពាក្យបណ្តឹងទៅអាជ្ញាធរស្រុកនិងខណ្ឌរដ្ឋបាលព្រៃឈើឲ្យជួយទប់ស្កាត់ ក៏ប៉ុន្តែជាបន្តបន្ទាប់ប្រជាសហគមន៍ដែលនាំមុខក្នុងករណីនេះរងការគំរាមកំហែងកាប់សម្លាប់ ហើយអាជ្ញាធរស្រុកបែរជាចាត់មន្រ្តីប៉ូលិសនិងអាវុធហត្ថស៊ើបអង្កេតទៅលើចលនាទាមទារឲ្យមានការប្តឹងពីករណីនេះជាប្រការធ្វើឲ្យមានការភ័យខ្លាច ហើយអ្នកភូមិចំនួន៥៤នាក់ក្នុងចំណោម៩២នាក់ បដិសេធមិនបានយល់ស្របក្នុងការប្តឹងពីករណីនេះទៅវិញ ។

អធិការរងប៉ូលិសស្រុកកូនមុំ លោក រ៉េន មុត មានប្រសាសន៍ថាការកាប់ឈើពិតជាកើតមាន ក៏ប៉ុន្តែមិនមែនក្រុមហ៊ុនជាអ្នកប្រព្រឹត្តផ្ទាល់ទេ ទើបស្រុកចាត់ការឲ្យសម្របសម្រួលបញ្ហានេះ ។

លោក រ៉េន មុត បានមានប្រសាសន៍ថា ៖ «ប្រជាពលរដ្ឋយើងទេ អ្នកដែលឈើអារហើយ យកទៅលក់ឲ្យគេទេ ខ្ញុំអត់ត្រូវធ្វើទេ ប៉ុន្តែគាត់បញ្ជាមកអធិការ អធិការបញ្ជាមកខ្ញុំធ្វើ ហៅពីរនាក់មកសម្របសម្រួលដែរ រីឯការធ្វើការដំណោះស្រាយហ្នឹង វាមានជំនាញគេ» ។

នាយផ្នែកនៃខណ្ឌរដ្ឋបាលព្រៃឈើប្រចាំស្រុកកូនមុំ លោក ឡេង យុត មានប្រសាសន៍ដែរថា ធ្លាប់ទទួលបានព័ត៌មានពីការកាប់ឈើ ក៏ប៉ុន្តែរបាយការណ៍របស់អាជ្ញាធរស្រុកបដិសេធថាមិនមានការកាប់ឈើទេ ៖ «ស្រុកគាត់ថា ចុះស្រាវជ្រាវអត់មានបញ្ហាអីផង អ្នកប្ដឹងចេះតែយកមេដៃផ្សេងៗ» ។

កាលពីខែឧសភាបន្ទាប់ពីមានរបាយការណ៍កាប់ឈើ មេឃុំត្រពាំងច្រែស លោក សេង សុង បានផ្តល់បទសម្ភាសន៍ជាមួយវិទ្យុអាស៊ីសេរីថា ប្រជាពលរដ្ឋក្នុងភូមិមួយចំនួនគឺជាអ្នកកាប់ឈើនោះលក់ឲ្យក្រុមហ៊ុន ។

លោក សេង សុង បានមានប្រសាសន៍ថា ៖ «អស់ពាក់កណ្ដាលជាង ។ យកអនុផលព្រៃឈើហ្នឹង មានជ័រដុតលក់រាល់ឆ្នាំហ្នឹង ដល់ឥឡូវគាត់លក់ជ័រហ្នឹងទៀតទៅ ។ ...ក្រុមចម្រុះនៅស្រុកហ្នឹង ក៏ចុះរាល់ថ្ងៃ ក៏ប៉ុន្តែពេលយើងចុះវិញបាត់មក វាដាក់អំពូលម៉ែត្រកាប់» ។

មន្រ្តីឃ្លាំមើលការកាប់បំផ្លាញព្រៃឈើនៃសមាគមអាដហុកខេត្តរតនគិរី លោក ប៉ែន ប៉ុណ្ណារ៍ មានប្រសាសន៍ថាលោកបានដាក់លិខិតអន្តរាគមន៍ជូនខណ្ឌរដ្ឋបាលព្រៃឈើរួចហើយនៅថ្ងៃច័ន្ទនេះ ប្រយោជន៍ធ្វើការស៊ើបអង្កេតសេចក្តីអំពាវនាវរបស់ប្រជាសហគមន៍ ។ លោកថាសកម្មភាពកាប់បំផ្លាញព្រៃឈើគឺជាការទទួលខុសត្រូវរបស់មន្ត្រីព្រៃឈើ ៕

បោះពុម្ព អ៊ីម៉េល

ឧបករណ៍រឿង

	ស្តាប់សំឡេង
	ថតសំឡេង
	អ៊ីម៉េល
	ព្រឹត្តិបត្រព័ត៌មាន
	បោះពុម្ព